របេង​អាចជាឃាតករ​​បន្ទាប់ពីកូវីដ​១៩ ខណៈ មនុស្ស​៨លាននាក់ឆ្លង​ក្នុង​ឆ្នាំ​​​២០២៣​

អង្គការសុខភាពពិភពលោក (WHO) ​បានឲ្យដឹងថា មនុស្សជាង​៨​លាននាក់ត្រូវបាន​ធ្វើរោគវិនិច្ឆ័យ​ឃើញ​ថា មានជំងឺរបេង​កាលពីឆ្នាំមុនដែលជាចំនួនខ្ពស់បំផុតដែលបានកត់ត្រាចាប់តាំងពីទីភ្នាក់ងារ​សុខភាពរបស់អង្គការសហប្រជាជាតិបាន​ចាប់ផ្តើមតាមដានមក។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៣០ខែតុលានេះ។

របាយការណ៍ថ្មីបានបង្ហាញថា មនុស្សប្រហែល​១​លាន​២៥ម៉ឺន​នាក់បានស្លាប់ដោយសារជំងឺរបេងកាលពីឆ្នាំមុន ដោយជំងឺ​របេងទំនងជាត្រលប់ទៅជាឃាតករជំងឺឆ្លងកំពូលរបស់ពិភពលោកបន្ទាប់ពីត្រូវបានជំនួសដោយ​កូវីត១៩ ក្នុងអំឡុងពេលរាតត្បាត ខណៈចំនួនអ្នកស្លាប់គឺស្ទើរតែទ្វេដងនៃចំនួនអ្នកស្លាប់ដោយសារមេរោគអេដស៍ក្នុងឆ្នាំ ២០២៣។

WHO បាននិយាយថា ជំងឺរបេងនៅតែបន្តប៉ះពាល់ដល់មនុស្សភាគច្រើននៅអាស៊ីអាគ្នេយ៍ អាហ្វ្រិក និងប៉ាស៊ីហ្វិកខាងលិច។ លើសពីនេះប្រទេសឥណ្ឌា ឥណ្ឌូនេស៊ី ចិន ហ្វីលីពីន និងប៉ាគីស្ថាន មានច្រើនជាងពាក់កណ្តាលនៃករណីរបស់ពិភពលោក។

អគ្គនាយកអង្គការ WHO លោក Tedros Adhanom Ghebreyesus បាននិយាយនៅក្នុងសេចក្តីថ្លែងការណ៍មួយថា «ការពិតដែលថាជំងឺរបេងនៅតែសម្លាប់ និងធ្វើឱ្យមនុស្សជាច្រើនឈឺ បើទោះបីយើងមានឧបករណ៍ដើម្បីការពារវា រកឃើញ និងព្យាបាលវាក៏ដោយ»។

ទោះជាយ៉ាងណាក៏ដោយ ការស្លាប់របស់ជំងឺរបេងនៅតែបន្តធ្លាក់ចុះជាសកល ហើយចំនួនអ្នកឆ្លងថ្មីកំពុងចាប់ផ្តើមមានស្ថេរភាព។ ទីភ្នាក់ងារនេះបានកត់សម្គាល់ថាក្នុងចំណោមមនុស្ស ៤០០០០០ នាក់ដែលត្រូវបានប៉ាន់ប្រមាណថាមានជំងឺរបេង ប៉ុន្តែតិចជាងពាក់កណ្តាលត្រូវបានធ្វើរោគវិនិច្ឆ័យឃើញ និងព្យាបាល។

គួរបញ្ជាក់ថាជំងឺរបេងគឺបណ្តាលមកពីបាក់តេរីក្នុងខ្យល់ ដែលភាគច្រើនប៉ះពាល់ដល់សួត។ ប្រហែលមួយភាគបួននៃចំនួនប្រជាជនពិភពលោកត្រូវបានគេប៉ាន់ប្រមាណថាមានជំងឺរបេង ប៉ុន្តែមានតែប្រហែលតែ ៥-១០% ប៉ុណ្ណោះនៃអ្នកកើតជំងឺនេះដែលមានរោគសញ្ញា៕

អត្ថបទ៖ ប៊ុន សុភាព

The post របេង​អាចជាឃាតករ​​បន្ទាប់ពីកូវីដ​១៩ ខណៈ មនុស្ស​៨លាននាក់ឆ្លង​ក្នុង​ឆ្នាំ​​​២០២៣​ appeared first on Kampuchea Thmey Daily.