គ្មានឈ្មោះ ពូទីន ទេ ក្នុងបញ្ជីគណៈប្រតិភូរុស្ស៊ី ដែលនឹងទៅចរចាជាមួយ អ៊ុយក្រែន នៅ តួកគី

វិមានក្រឹមឡាំងបានបង្ហាញឈ្មោះគណៈប្រតិភូដែលនឹងត្រូវទៅជួបចរចាជាមួយភាគីអ៊ុយក្រែននៅទីក្រុងអ៊ីស្តង់ប៊ុលនៃប្រទេសតួកគីហើយ ប៉ុន្តែអ្វីដែលគួរឲ្យកត់សម្គាល់ក្នុងនោះគឺថា មិនមានឈ្មោះលោកប្រធានាធិបតី វ្ល៉ាឌីមៀរ ពូទីន ទេ។

ផ្ទុយទៅវិញ គណៈប្រតិភូនោះគឺនឹងត្រូវដឹកនាំដោយលោក Vladimir Medinsky ដែលជាជំនួយការប្រធានាធិបតី ហើយក៏មានការចូលរួមពីសំណាក់អនុរដ្ឋមន្ត្រីការបរទេស Mikhail Galuzin, អនុរដ្ឋមន្ត្រីការពារជាតិ Aleksandr Fomin និងមេចារកម្មយោធា Igor Kostyukov។ នេះបើតាមការចុះផ្សាយរបស់ RT នៅថ្ងៃព្រហស្បតិ៍ទី១៥ខែឧសភាឆ្នាំ២០២៥។

កាលពីសប្តាហ៍មុន លោក ពូទីន បានស្នើ​ឲ្យ​​មាន​​កិច្ច​ចរចាសន្តិភាពផ្ទាល់ជាមួយអ៊ុយក្រែន នៅ​ទីក្រុង​ អ៊ីស្តង់ប៊ុល នា​ថ្ងៃទី​១៥​ខែ​ឧសភា​ ដោយ​​និយាយ​ថា ការ​ពិភាក្សា​​មិន​គួរ​ពន្យារ​ពេល​​ត​ទៅ​ទៀត​ទេ ​បន្ទាប់ពី​សង្គ្រាម​បាន​ផ្ទុះ​ឡើង​ក្នុងខែកុម្ភៈឆ្នាំ​២០២២។

លោកសង្កត់ធ្ងន់ថា៖ «កិច្ចពិភាក្សាដែលស្នើឡើងគួរតែផ្តោតលើការដោះស្រាយបញ្ហាឫសគល់នៃជម្លោះ។ យើងស្វែងរកការពិភាក្សាដ៏ច្បាស់លាស់ ដើម្បីដកចេញនូវឫសគល់នៃជម្លោះ ហើយចាប់ផ្តើមឆ្ពោះទៅរកសន្តិភាពយូរអង្វែង និងរឹងមាំ»។

ជុំវិញរឿងនេះ ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ក៏ធ្លាប់អះអាងដែរថា លោកនឹងចូលរួមកិច្ចពិភាក្សានិងជួបជាមួយពូទីនដោយផ្ទាល់ ប្រសិនបើមេដឹកនាំរុស្ស៊ីយល់ព្រម ហើយនឹងធ្វើអ្វីគ្រប់យ៉ាងតាមដែលអាចធ្វើបាន ដើម្បីធានាឲ្យជំនួបទល់មុខ កើតឡើងឲ្យខាងតែបាន។

សូមជម្រាបថា លោកពូទីននិងហ្សេលេនស្គី មិនដែលជួបគ្នាផ្ទាល់ទេ ចាប់តាំងពីខែធ្នូឆ្នាំ២០១៩មក ប៉ុន្តែមន្ត្រីរុស្ស៊ីនិងអ៊ុយក្រែន បានធ្វើការចរចាដោយផ្ទាល់លើកចុងក្រោយក្នុងខែមីនាឆ្នាំ២០២២ នៅទីក្រុងអ៊ីស្តង់ប៊ុល ពោលគឺភ្លាមៗបន្ទាប់ពីទីក្រុងមូស្គូ បើកបើកប្រតិបត្តិការសឹកពេញទំហឹងលើប្រទេសជិតខាងរបស់ខ្លួន៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ព្រមជួបពូទីន ទល់មុខ នៅតួកគី តែមានលក្ខខណ្ឌមួយ 

The post គ្មានឈ្មោះ ពូទីន ទេ ក្នុងបញ្ជីគណៈប្រតិភូរុស្ស៊ី ដែលនឹងទៅចរចាជាមួយ អ៊ុយក្រែន នៅ តួកគី appeared first on Kampuchea Thmey Daily.