ក្រសួងកសិកម្ម ដាក់ចេញវិធានការសេដ្ឋកិច្ច រក្សាស្ថិរភាពថ្លៃកសិផល

ក្រសួងកសិកម្ម រុក្ខាប្រមាញ់ និងនេសាទ បានដាក់ចេញ វិធានការសេដ្ឋកិច្ច ក្នុងការដាក់​ពង្រាយ​មន្ត្រី​កសិកម្មឃុំ ការសម្រួលខ្សែច្រវាក់តម្លៃរក្សាស្ថិរភាពថ្លៃ និងតម្រង់ទិសដល់កសិករ។

វិធានការនេះ បានធ្វើឡើងក្នុងកិច្ចប្រជុំពិភាក្សាអន្តរក្រសួងលើសេចក្តីព្រាងអនុក្រឹត្យស្តីពី ការ​រៀប​ចំ​និងការ​ប្រព្រឹត្តទៅរបស់ក្រសួងកសិកម្ម រុក្ខាប្រមាញ់ និងនេសាទ នៅសាលាភូមិន្ទរដ្ឋ​បាល​នៅ​រសៀលថ្ងៃទី ០៧ ខែកុម្ភៈ ឆ្នាំ ២០២៥។

កិច្ចប្រជុំនេះធ្វើឡើងក្នុងគោលបំណងពិនិត្យ និងផ្តល់យោបល់រៀបចំមុខងារ រចនាសម្ព័ន្ធ លើ​សេច​​ក្តី​ព្រាងអនុក្រឹត្យស្តីពី ការរៀបចំនិងការប្រព្រឹត្តទៅរបស់ក្រសួងកសិកម្ម រុក្ខាប្រមាញ់ និង​នេ​សាទឱ្យបានសមស្របជាមួយនឹងគោលដៅរួមរបស់រាជរដ្ឋាភិបាល។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ក្រសួង​កសិកម្ម​បានដាក់ចេញការងារស្នូលចំនួន​ ១១ចំណុច​លើការវិភាគមុខងាររួមមាន ១. វិធានការ សេដ្ឋកិច្ច ក្នុងការដាក់ពង្រាយមន្ត្រីកសិកម្មឃុំ ការសម្រួលខ្សែច្រវាក់តម្លៃរក្សាស្ថិរភាពថ្លៃ និង តម្រង់ទិសដល់កសិករ ២.ការផ្តល់បច្ចេកទេសកសិកម្ម និងការប្រមូល​ផល ៣.តម្រង់ទិស សម្រួល ខ្សែច្រវាក់តម្លៃ ៤.ការស្រាវជ្រាវធាតុចូលកសិកម្ម ៥.ការគ្រប់គ្រងធាតុចូលកសិកម្ម ៦.ការគ្រប់គ្រងអនាម័យ និងភូតគាមអនាម័យ ៧.ការផ្តល់សេវាពិសោធន៍ធាតុចូលកសិកម្ម ផ្សេងៗ ៨.ការផ្តល់បច្ចេក​ទេសកែច្នៃបឋម ៩.ការគ្រប់គ្រងធនធានធម្មជាតិកសិកម្ម រួមមានធន ធានដី ព្រៃឈើ សត្វព្រៃ និងបរិស្ថាន ១០.ការស្រាវជ្រាវ និងបណ្តុះបណ្តាល អភិវឌ្ឍន៍ធនធានមនុស្ស និងជំនាញវិជ្ជាជីវៈកសិកម្ម ១១.ការគ្រប់គ្រងផលិតកម្មដៃគូ និងវិស័យឯកជន​។

លោករដ្ឋមន្ត្រី បានបង្ហាញសុទិដ្ឋិនិយមខ្ពស់​ចំពោះសេចក្តីព្រាងអនុក្រឹត្យនេះនឹងចេញជាផ្លូវការ​ ហើយ​​ក្រសួងកសិកម្ម រុក្ខាប្រមាញ់ និងនេសាទ ប្តេជ្ញាក្នុងការអនុវត្តឱ្យបានម៉ឺងម៉ាត់​ ក្នុងស្មារតី​ទទួល​ខុសត្រូវខ្ពស់​ សំដៅលើកស្ទួយវិស័យកសិកម្មឱ្យកាន់តែរីកចម្រើន និងអភិវឌ្ឍទៅមុខ​បន្ថែម​ទៀត និងជាគំរូមួយដ៏ល្អសម្រាប់ក្រសួងស្ថាប័នពាក់ព័ន្ធ៕

The post ក្រសួងកសិកម្ម ដាក់ចេញវិធានការសេដ្ឋកិច្ច រក្សាស្ថិរភាពថ្លៃកសិផល appeared first on Kampuchea Thmey Daily.