ក្រុមហ៊ុនវិនិយោគមួយគ្រោងបូមខ្សាច់ព្រែក​កោះប៉ោ ទៅផ្គត់ផ្គង់ធ្វើតារាងវាយកូនហ្គោលនៅជប៉ុន

អាជ្ញាធរខេត្តកោះកុង បង្ហើបថាមានក្រុមហ៊ុនឯកជនមួយគ្រោងធ្វើអាជីវកម្មយកធនធានខ្សាច់នៅតាមដងព្រែកកោះប៉ោ ស្ថិតនៅក្នុងឃុំប៉ាក់ខ្លង ស្រុកមណ្ឌលសីមា ដើម្បីយកទៅផ្គត់ផ្គង់ធ្វើតារាងវាយកូនហ្គោលនៅប្រទេសជប៉ុន ប៉ុន្តែគម្រោងនេះកំពុងមានការពិគ្រោះយោបល់គ្នាលម្អិតជាមុនសិន។

ក្រុមហ៊ុន Asia Energy International Co.,LTD នឹងគ្រោងធ្វើអាជីវកម្មបូមខ្សាច់ពីបាតដៃព្រែកកោះប៉ោ ដែលមានទំហំ ២៩.៤២ហិកតា ក្រោយការផ្តល់អាជ្ញាបណ្ណពីក្រសួងរ៉ែ និងថាមពល។ នេះបើតាមឯកសាររបស់លោក ទៀ សុរៈឆ័យ អភិបាលរងខេត្តកោះកុង ដែលកម្ពុជាថ្មីទទួលបានថ្មីៗនេះ។

លោកអភិបាលរងខេត្តកោះកុង ដដែលបន្តថា ដើម្បីបញ្ចៀសនូវបញ្ហាណាមួយកើតឡើងអំឡុងពេលប្រតិបត្តិការគម្រោង ក្រសួងរ៉ែ និងថាមពល ក្រុមហ៊ុនវិនិយោគ អាជ្ញាធរខេត្តស្រុក និងប្រជាពលរដ្ឋ បាននិងកំពុងធ្វើវេទិកាពិគ្រោះយោបល់គ្នាលម្អិតអំពីនីតិវីធី បែបបទ និងបច្ចេកទេសនៃការធ្វើអាជីវកម្ម ដើម្បីជាការយល់ដឹងឱ្យកាន់តែស៊ីជម្រៅបន្ថែមទៀត។

លោក ទៀ សុរៈឆ័យ រំពឹងដែរថា អ្វីដែលជាការពន្យល់ផ្នែកបច្ចេកទេសរបស់មន្រ្តីជំនាញ នឹងធ្វើឱ្យប្រជាពលរដ្ឋដែលរស់នៅផ្ទាល់ក្នុងតំបន់ នឹងទទួលបាននូវព័ត៌មានលម្អិត ក៏ដូចជាសុក្រឹតភាពនៃការធ្វើសកម្មភាពបូមខ្សាច់ ជាពិសេសប្រតិបត្តិការរបស់ក្រុមហ៊ុនស្របតាមនីតិវិធី និងត្រឹមត្រូវតាមលក្ខណៈបច្ចេកទេស ដែលអាចបញ្ចៀសបាននូវបញ្ហានានាជាមួយប្រជាពលរដ្ឋរស់នៅ និងប្រកបរបរនេសាទតាមដងព្រែក និងការការពារបរិស្ថានទាំងប្រព័ន្ធអេកូឡូស៊ីតាមបណ្តោយដងព្រែកឱ្យរក្សាបានលំហ្នឹងបរិស្ថានធម្មជាតិ និងជំរុញការអភិវឌ្ឍន៍សេដ្ឋកិច្ចកាន់តែប្រសើរស្របតាមគោលនយោបាយរបស់រាជរដ្ឋាភិបាល។

ដោយឡែកក្រុមហ៊ុនវិនិយោគ ក៏ត្រូវបានអាជ្ញាធរខេត្តកោះកុង ផ្តល់ការណែនាំបន្ថែមសុំអោយមានកិច្ចសហការល្អបំផុតជាមួយអាជ្ញាធរសមត្ថកិច្ច និងមន្រ្តីជំនាញពាក់ព័ន្ធ ដើម្បីអនុវត្តការងារស្របតាមមនីតិវិធីលក្ខណៈបច្ចេកទេស និងគោរពច្បាប់ស្តីពីតំបន់ការពារធម្មជាតិ និងច្បាប់ស្តីពីអាជីវកម្មរ៉ែខ្សាច់សំណង់៕

អត្ថបទ៖ សិរីវឌ្ឍនៈ

The post ក្រុមហ៊ុនវិនិយោគមួយគ្រោងបូមខ្សាច់ព្រែក​កោះប៉ោ ទៅផ្គត់ផ្គង់ធ្វើតារាងវាយកូនហ្គោលនៅជប៉ុន appeared first on Kampuchea Thmey Daily.