ក្រសួងការងារ ប្រកាសតម្រូវការកម្លាំងពលកម្មក្នុងស្រុកជាង ៧ ម៉ឺនកន្លែង បម្រើវិស័យធំៗ ៣
ក្រសួងការងារ ប្រកាសតម្រូវការកម្លាំងពលកម្មក្នុងស្រុកជាង ៧ ម៉ឺនកន្លែង... The post ក្រសួងការងារ ប្រកាសតម្រូវការកម្លាំងពលកម្មក្នុងស្រុកជាង ៧ ម៉ឺនកន្លែង បម្រើវិស័យធំៗ ៣ appeared first on Kampuchea Thmey Daily.
ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសថា គិតត្រឹមថ្ងៃទី ៣១ ខែមករា ឆ្នាំ ២០២៥ កម្ពុជា មានតម្រូវការកម្លាំងពលកម្មក្នុងស្រុកចំនួន ៧៤ ៩១៥ កន្លែង នៅទូទាំងប្រទេស សម្រាប់បម្រើទៅលើវិស័យធំៗ ៣ រួមមាន ៖ វិស័យឧស្សាហកម្ម សេវាកម្ម និងកសិកម្ម។
បើតាម ក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា កម្លាំងពលកម្មក្នុងស្រុកចំនួន ៧៤ ៩១៥ កន្លែង ក្នុងនោះ វិស័យឧស្សាហកម្មមានតម្រូវការចំនួន ៦១ ០៣៩ កន្លែង វិស័យសេវាកម្មមានចំនួន ៨ ៦៥២ កន្លែង និងវិស័យកសិកម្មមានចំនួន ៥ ២២៤ កន្លែង។
ជាមួយគ្នានេះ នៅរាជធានីភ្នំពេញមាន ១៦ ៥០៧ កន្លែង ក្នុងនោះ ផ្នែកឧស្សាហកម្ម ១២ ០៥០ កន្លែង និងផ្នែកសេវាកម្ម ៤ ៤៥៧ កន្លែង។ ខេត្តកំពង់ឆ្នាំងមាន ១៥ ០១៩ កន្លែង ក្នុងនោះ ផ្នែកឧស្សាហកម្ម ១៥ ០០០ កន្លែង និង ផ្នែកសេវាកម្ម ១៩ កន្លែង។ ខេត្តស្វាយរៀងមាន ១១ ៩០២ កន្លែង ក្នុងនោះ ផ្នែកឧស្សាហកម្ម ១០ ៩៧៥ កន្លែង និង ផ្នែកសេវាកម្ម ៩២៧ កន្លែង។ ខេត្តកណ្ដាលមាន ៨ ៤៤៩ កន្លែង ក្នុងនោះ ផ្នែកឧស្សាហកម្ម ៨ ៣៨១ កន្លែង និង ផ្នែកសេវាកម្ម ៦៨ កន្លែង។
ចំណែកខេត្តតាកែវមាន ៥ ៦៤៦ កន្លែង ក្នុងនោះ ផ្នែកឧស្សាហកម្ម ៥ ៦២៥ កន្លែង និង ផ្នែកសេវាកម្ម ២១ កន្លែង។ ខេត្តកំពង់ស្ពឺមាន ៥ ៣៩១ កន្លែង ក្នុងនោះ ផ្នែកឧស្សាហកម្ម ៥ ៣៨៧ កន្លែង និង ផ្នែកសេវាកម្ម ៤ កន្លែង។ ខេត្តរតនគីរីមាន ២ ៩០២ កន្លែង ក្នុងនោះ ផ្នែកកសិកម្មចំនួន ២ ៩០២ កន្លែង។ ខេត្តក្រចេះមាន ២ ១០៥ កន្លែង ក្នុងនោះ ផ្នែកសេវាកម្ម ៥ កន្លែង និង ផ្នែកកសិកម្ម ២ ១០០ កន្លែង។
ដោយឡែកខេត្តកំពង់ចាមមានតម្រូវការកម្លាំងពលកម្មចំនួន ១ ៩២៣ កន្លែង ក្នុងនោះ ផ្នែកឧស្សាហកម្ម ១ ៧៩១ កន្លែង និង ផ្នែកសេវាកម្ម ១៣២ កន្លែង។ ខេត្តបន្ទាយមានជ័យមានតម្រូវការកម្លាំងពលកម្មចំនួន ១ ៥១៨ កន្លែង ក្នុងនោះ ផ្នែកឧស្សាហកម្ម ៤៨៤ កន្លែង សេវាកម្ម ១ ០២៩ កន្លែង និង កសិកម្ម ៥ កន្លែង និងខេត្តផ្សេងៗ មាន ៣ ៥៥៣ កន្លែង ក្នុងនោះ ផ្នែកឧស្សាហកម្ម ១ ៣៤៦ កន្លែង សេវាកម្ម ១ ៩៩០ កន្លែង និងកសិកម្ម ២១៧ កន្លែង។
ក្រសួងការងារ បានឲ្យដឹងទៀតថា កម្លាំងពលកម្មជាង ៧ ម៉ឺនកន្លែង នឹងត្រូវបែងចែកទៅតាមប្រភេទមុខរបរចំនួន ១០ រួមមាន ៖ អ្នកបញ្ជាម៉ាស៊ីនដេរ កម្មករខ្ចប់វេចដោយដៃ កម្មករចម្ការដំណាំ យន្តការី និងអ្នកដំឡើងអគ្គិសនី កម្មករក្នុងផលិតកម្ម វិជ្ជាជីវៈខាងការផ្សព្វផ្សាយ និងទីផ្សារ មន្ត្រីឥណទាន និងកម្ចីប្រាក់ អ្នកបញ្ជាម៉ាស៊ីនធ្វើស្បែកជើង កម្មករដំណាំចម្រុះ និងចិញ្ចឹមបសុសត្វ អ្នកឯកទេសត្រួតពិនិត្យ និងដំណើរការផលិត និងមុខរបរផ្សេងៗ។
សូមជម្រាបថា លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ធ្លាប់បានអំពាវនាវដល់ប្រជាពលរដ្ឋខ្មែរទាំងអស់ សូមស្វែងរកឱកាសការងារធ្វើនៅក្នុងស្រុក ជៀសវាងទៅធ្វើការដោយខុសច្បាប់នៅក្រៅប្រទេសតាមរយៈមេខ្យល់នាំឲ្យបាត់បង់អត្ថប្រយោជន៍ ឬ មានការរំលោភបំពានផ្លូវច្បាប់ ពិសេសប្រឈមនឹងការចាប់ខ្លួនពីសំណាក់អាជ្ញាធរបរទេសទៀតផង។
លោកបានបន្តថា ការស្វែងរកការងារធ្វើនៅក្នុងស្រុកពុំមានការលំបាកនោះទេ ពីព្រោះឱកាសការងារក្នុងស្រុកត្រូវបានប្រកាសជារៀងរាល់សប្ដាហ៍តាមរយៈទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ ទាំងនៅលើបណ្ដាញសង្គម និងតាមរោងចក្រ សហគ្រាស ក៏ដូចជានៅតាមមូលដ្ឋានរបស់ប្រជាពលរដ្ឋដោយផ្ទាល់តែម្ដង ដែលការងារទាំងនោះទទួលបានអត្ថប្រយោជន៍ច្រើនដូចទៅនឹងបណ្ដាប្រទេសជិតខាងផងដែរ ដូចជា ទទួលបានប្រាក់ឈ្នួលសមរម្យបើធៀបជាមួយបណ្ដាប្រទេសជិតខាងមួយចំនួននាពេលបច្ចុប្បន្ន , កន្លែងការងារនៅក្បែរផ្ទះ និងការចំណាយទាប ដែលអាចឲ្យប្រជាពលរដ្ឋសន្សំសំចៃបានច្រើន៕
អត្ថបទ ៖ ពិសី
The post ក្រសួងការងារ ប្រកាសតម្រូវការកម្លាំងពលកម្មក្នុងស្រុកជាង ៧ ម៉ឺនកន្លែង បម្រើវិស័យធំៗ ៣ appeared first on Kampuchea Thmey Daily.
