រដ្ឋអាចនឹងចាប់ផ្ដើមទទួលពាក្យស្នើសុំដីពីពលរដ្ឋ​ក្រីក្រចាប់ពីខែកុម្ភៈ

នាយករដ្ឋមន្ត្រី សម្ដេចធិបតី ហ៊ុន ម៉ាណែត ឱ្យដឹងថាកម្មវិធីផ្ដល់ដីដល់ពលរដ្ឋក្រីក្រពិតប្រាកដអាចនឹងចាប់ផ្ដើមទទួលពាក្យពីពលរដ្ឋចាប់ពីខែកុម្ភៈ ដើម្បីផ្ដល់ដីជូនពលរដ្ឋក្រីក្រពិតប្រាកដ និងទប់ស្កាត់ការទន្ទ្រានដីរដ្ឋធ្វើជាកម្មសិទ្ធិឯកជនផងដែរ។

ក្នុងសារពិសេសនៅយប់ថ្ងៃទី២៨ ខែមករា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានលើកឡើងថា ដើម្បីសម្រួលដល់ការងារនេះ រដ្ឋាភិបាលបានបង្កើតគណកម្មាការជាតិមួយដែលមានលេខាធិការដ្ឋានមួយធ្វើជាសេនាធិការ។ ហើយចំពោះនីតិវិធីបែបបទទីកន្លែងដាក់ពាក្យស្នើសុំនិងលក្ខណៈសម្បត្តិគ្រប់គ្រាន់ដើម្បីទទួលបានដី លេខាធិការដ្ឋាននឹងចាប់ផ្ដើមជូនដំណឹងជាបន្តបន្ទាប់ហើយនឹងអាចចាប់ផ្ដើមទទួលពាក្យស្នើសុំរបស់ប្រជាពលរដ្ឋចាប់ពីខែកុម្ភៈ ឆ្នាំ២០២៥នេះតទៅ។

សម្ដេចថា៖ «ជាយុទ្ធសាស្ត្រព្រួញមួយបាញ់បានសត្វ២។ ទី១គឺយុទ្ធសាស្ត្រផ្ដល់ពលរដ្ឋ​ដែលខ្វះដីពិតប្រាកដ និងទី២ប្រជាពលរដ្ឋ​ខ្មែរនឹងមានលទ្ធភាពផ្ទាល់ក្នុងការការពារដី និងសហគមន៍ដែលខ្លួនបានរស់នៅ»។

បើតាមសម្ដេចធិបតីក្រៅពីផ្ដល់ដីជូនរដ្ឋាភិបាលក៏នឹងរៀបចំជាភូមិករជូនផងដែរ។

គួរឱ្យដឹងដែរថាក្នុងពេលបិទកិច្ចប្រជុំគណៈរដ្ឋមន្ត្រីកាលពីថ្ងៃទី២៤ ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត បាន​សម្រេចកំណត់ យកចំណុចអូរសែវ ភូមិហាងសារ៉ាត ឃុំសាមហួយ ស្រុកសេសាន ខេត្តស្ទឹងត្រែង ជាទីតាំងជំហានទី១ ដោយគ្រោង ផ្តល់ដីជូនប្រជាពលរដ្ឋក្រីក្រីគ្មានដីពិតប្រាកដ ហើយមានបំណងទៅរស់នៅទីតាំងនេះ ចំនួន ៥០០គ្រួសារ ដោយ ក្នុងមួយគ្រួសារទទួលបានដីលំនៅឋាន និងដឹកសិកម្មទំហំសរុប ៣ហិកតា។ ជំហានបន្ទាប់នឹងផ្តល់ជូនចំនួន ៥០០គ្រួសារ បន្ថែមទៀតនៅទីតាំងដដែល។ តំបន់នេះ មានទំហំជិត ១០ ០០០ហិកតា ស្ថិតនៅជាប់ទីតាំងគម្រោង ដីសម្បទានសង្គមកិច្ច៕

អត្ថបទដោយ ហ៊ុន សិរីវឌ្ឍន៍

The post រដ្ឋអាចនឹងចាប់ផ្ដើមទទួលពាក្យស្នើសុំដីពីពលរដ្ឋ​ក្រីក្រចាប់ពីខែកុម្ភៈ appeared first on Kampuchea Thmey Daily.