អ៊ីរ៉ង់​អះអាង​ពី​សិទ្ធិ​នុយក្លេអ៊ែរ​​​របស់​ខ្លួន មុន​ការ​ចរចា​ជាថ្មី​ជាមួយ​​អាមេរិក

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានបញ្ជាក់យ៉ាងម៉ឺងម៉ាត់ថា ទីក្រុងតេហេរ៉ង់​នឹងមិនសម្របសម្រួលលើសិទ្ធិនុយក្លេអ៊ែររបស់ខ្លួនឡើយ ដោយសង្កត់ធ្ងន់ថា សមត្ថភាពចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ គឺមិនអាចចរចារបាន​ទេ។

ថ្លែងនៅទីក្រុង Doha កាល​ពី​ថ្ងៃ​សៅរ៍​ទី​១០​ឧសភា​មុនពេលកិច្ចចរចានុយក្លេអ៊ែររវាងអាមេរិក និងអ៊ីរ៉ង់នៅ​ប្រទេស​អូម៉ង់​ លោក Araghchi បានព្រមានថា ប្រសិនបើគោលដៅនៃការចរចាគឺ​ដើម្បី​ដកហូតសិទ្ធិនុយក្លេអ៊ែររបស់​អ៊ីរ៉ង់ នោះគ្មានកិច្ចព្រមព្រៀងណាមួយនឹងត្រូវបានសម្រេចឡើយ។

សេចក្តីថ្លែងការណ៍នេះ ធ្វើ​ឡើងចំពេលមានភាពតានតឹងកើនឡើង ជាពិសេសបន្ទាប់ពីរដ្ឋបាលរបស់ប្រធានាធិបតីអាមេរិក ដូណាល់ ត្រាំ បានចាកចេញពីកិច្ចព្រមព្រៀងនុយក្លេអ៊ែរឆ្នាំ​២០១៥ ហើយបានគំរាមកំហែង​ចាត់​សកម្មភាពយោធា បើ​កិច្ចព្រមព្រៀងថ្មី​មិន​បាន​សម្រេច។ មន្ត្រីអាមេរិក រួមទាំងបេសកជនពិសេស លោក Steve Witkoff ទទូចថា គ្រឿងបរិក្ខារនុយក្លេអ៊ែរ​ទាំង​អស់​របស់អ៊ីរ៉ង់ត្រូវតែរុះរើ​ជា​ដាច់​ខាត។

យ៉ាង​ណា លោក Araghchi បានរំលឹកឡើងវិញថា កម្មវិធីនុយក្លេអ៊ែររបស់អ៊ីរ៉ង់ គឺសម្រាប់គោលបំណងស៊ីវិលសុទ្ធសាធ និងបានអះអាងនូវឆន្ទៈបន្តរបស់អ៊ីរ៉ង់ក្នុងការចរចាដោយ​ភាព​ស្មោះត្រង់ ខណៈ​បណ្តាប្រទេសលោកខាងលិច បាន​​បង្ហាញ​ការ​ព្រួយ​បារម្ភ​ថា អ៊ីរ៉ង់​ជិត​សម្រេច​​ការ​ផលិត​អាវុធ​នុយក្លេអ៊ែរ​​​បាន​ហើយ។

លោក Araghchi បាន​និយាយ​ថា៖ «នៅក្នុងកិច្ចពិភាក្សាដោយប្រយោលរបស់ខ្លួនជាមួយសហរដ្ឋអាមេរិក អ៊ីរ៉ង់សង្កត់ធ្ងន់លើសិទ្ធិរបស់ខ្លួនក្នុងការប្រើប្រាស់ថាមពលនុយក្លេអ៊ែរដោយសន្តិវិធី ហើយប្រកាសយ៉ាងច្បាស់ថាខ្លួនមិនស្វែងរកអាវុធនុយក្លេអ៊ែរទេ។ អ៊ីរ៉ង់បន្តការចរចាដោយស្មោះត្រង់ ហើយប្រសិនបើគោលដៅនៃកិច្ចចរចានេះគឺដើម្បីធានាការមិនទទួលបានអាវុធនុយក្លេអ៊ែរ កិច្ចព្រមព្រៀង​អាចធ្វើទៅបាន។ ទោះជាយ៉ាងណាក៏ដោយ ប្រសិនបើគោលបំណងគឺកំណត់សិទ្ធិនុយក្លេអ៊ែររបស់អ៊ីរ៉ង់ អ៊ីរ៉ង់នឹងមិន​បោះបង់​​សិទ្ធិរបស់ខ្លួនឡើយ»៕

ដោយ៖ ឈាង

The post អ៊ីរ៉ង់​អះអាង​ពី​សិទ្ធិ​នុយក្លេអ៊ែរ​​​របស់​ខ្លួន មុន​ការ​ចរចា​ជាថ្មី​ជាមួយ​​អាមេរិក appeared first on Kampuchea Thmey Daily.