ស៊ុយអែត បង្ហាញជំនួយយោធាថ្មី សម្រាប់អ៊ុយក្រែន ក្នុងទំហំទឹកប្រាក់ ១,៥៩ពាន់លានដុល្លារ

ហែលស៊ីនគី៖ ប្រទេសស៊ុយអែត បានសន្យាផ្តល់ជំនួយចំនួន ១៦ ពាន់លានក្រូនស៊ុយអែត (១.៥៩ ពាន់លានដុល្លារ) ជាជំនួយយោធាថ្មីសម្រាប់អ៊ុយក្រែន នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ចិនស៊ិនហួ។ រដ្ឋាភិបាលស៊ុយអែតបានឲ្យដឹងថា កញ្ចប់នេះនឹងនាំយកជំនួយយោធាសរុប របស់ប្រទេសស៊ុយអែតទៅកាន់ទីក្រុងគៀវដល់ ២៩.៥ ពាន់លានក្រូនស៊ុយអែត នៅឆ្នាំនេះ និងប្រហែល ៨០ ពាន់លានក្រូន ស៊ុយអែត ចាប់តាំងពីឆ្នាំ២០២២។ រដ្ឋមន្ត្រីការពារជាតិស៊ុយអែតលោក Pal Jonson បានឲ្យដឹងនៅលើវេទិកា ប្រព័ន្ធផ្សព្វផ្សាយសង្គម X ថា “នេះគឺជាកញ្ចប់ជំនួយយោធា ដ៏ធំបំផុតរបស់យើង រហូតមកដល់បច្ចុប្បន្ន” ។ គួរបញ្ជាក់ថា ជំនួយនេះនឹងរួមបញ្ចូលប្រព័ន្ធ ការពារដែនអាកាស កាំភ្លើងធំ ទំនាក់ទំនងផ្កាយរណប និងជំនួយកងទ័ពជើងទឹក ក៏ដូចជាឧបករណ៍ពីកងកម្លាំងប្រដាប់អាវុធ និងឧស្សាហកម្មស៊ុយអែត តែម្ដង៕ប្រែសម្រួល ឈូក បូរ៉ា