រុស្ស៊ី មិនសប្បាយចិត្ត ថែមប្រតិកម្មខ្លាំងៗទៅ កិច្ចព្រមព្រៀងរ៉ែ អាមេរិក-អ៊ុយក្រែន

ទីបំផុត សហរដ្ឋអាមេរិកនិងអ៊ុយក្រែន បានចុះហត្ថលេខាលើកិច្ចព្រមព្រៀងរ៉ែជាផ្លូវការហើយកាលពីថ្ងៃទី១ខែឧសភាឆ្នាំ២០២៥ ប៉ុន្តែរឿងនោះក៏មានប្រតិកម្មខ្លាំងៗពីសំណាក់ប្រទេសរុស្ស៊ីដែរ។

តាមការចុះផ្សាយរបស់ RT នៅថ្ងៃទី២ខែឧសភា, ជុំវិញកិច្ចព្រមព្រៀងរ៉ែនេះ រដ្ឋមន្ត្រីក្រសួងរតនាគារអាមេរិក Scott Bessent បាននិយាយ​ក្នុងសេចក្តីថ្លែងការណ៍​ថា៖ «កិច្ចព្រមព្រៀងនេះ បង្ហាញយ៉ាងច្បាស់ដល់ប្រទេសរុស្ស៊ីថា រដ្ឋបាល ត្រាំ ប្តេជ្ញាចំពោះដំណើរការសន្តិភាពដែលផ្តោតលើអ៊ុយក្រែនដោយសេរី អធិបតេយ្យភាព និងវិបុលភាពក្នុងរយៈពេលវែង។ លោកប្រធានាធិបតី ត្រាំ មើលឃើញភាពជាដៃគូរវាងប្រជាជនអាមេរិកនិងអ៊ុយក្រែន ដើម្បីបង្ហាញពីការប្តេជ្ញាចិត្តរបស់ភាគីទាំងពីរ ចំពោះសន្តិភាពនិងវិបុលភាពយូរអង្វែងនៅក្នុងប្រទេសអ៊ុយក្រែន»។

ទោះបីជាយ៉ាងណាក៏ដោយ ទីក្រុងមូស្គូមិនសប្បាយចិត្តទេចំពោះរឿងនេះ ដោយអនុប្រធានក្រុមប្រឹក្សាសន្តិសុខរុស្ស៊ី Dmitry Medvedev បានចេញសារលើ Telegram នៅថ្ងៃដដែលនោះថា លោកត្រាំ កំពុងបង្ខំឲ្យទីក្រុងកៀវ លក់ទ្រព្យសម្បត្តិរ៉ែរបស់ខ្លួន ដើម្បីតែការសុំបន្តជំនួយយោធា។

អតីតប្រធានាធិបតីរុស្ស៊ីរូបនេះនិយាយថា៖ «ទីបំផុត លោកត្រាំ ធ្វើអ៊ុយក្រែនបែកហើយ ដោយឲ្យរបបទីក្រុងកៀវប្រគល់រ៉ែទៅអាមេរិក ដូរជាមួយជំនួយយោធា។ ឥឡូវ​នេះ ជំនួយ​យោធា ​នឹង​ត្រូវ​ចំណាយ​ជាមួយ​ទ្រព្យសម្បត្តិ​ជាតិ​នៃ​ប្រទេសមួយ​ដែលកំពុង​បាត់​ខ្លួនបន្តិចម្តងៗ»។

សូមជម្រាបថា ក្រោយចូលកាន់តំណែងជាប្រធានាធិបតីអាមេរិកអាណត្តិទី២មិនបានប៉ុន្មានថ្ងៃផង លោកត្រាំ បានដាក់លក្ខខណ្ឌទៅអ៊ុយក្រែនថា បើទីក្រុងកៀវចង់ឲ្យទីក្រុងវ៉ាស៊ីនតោន បន្តជួយដើម្បីទប់ទល់ជាមួយរុស្ស៊ីទៀតនោះ ពួកគេត្រូវតែផ្តល់ធនធានរ៉ែកម្រមកវិញជាការដោះដូរ។ 

ទីបំផុតបំណងរបស់លោកត្រាំ ក៏បានសម្រេច ហើយដ្បិតតែខ្លឹមសារលម្អិតនៃកិច្ចព្រមព្រៀងរ៉ែដែលចុះហត្ថលេខាកាលពីថ្ងៃព្រហស្បតិ៍ មិនត្រូវបានគេបញ្ចេញជាសាធារណៈក៏ពិតមែន ប៉ុន្តែចំណុចស្នូលរបស់វា ត្រូវគេដឹងថា គឺផ្តោតលើមូលនិធិវិនិយោគកសាងឡើងវិញរួមគ្នា ពោលគឺអ៊ុយក្រែននឹងចែក៥០% នៃប្រាក់ចំណូលដែលបានពីអាជ្ញាប័ណ្ណថ្មីសម្រាប់គម្រោងទាញយកធនធាននាពេលអនាគត ដាក់ទៅក្នុងមូលនិធិនេះ។

បើយោងតាមរបាយការណ៍វេទិកាសេដ្ឋកិច្ចពិភពលោកឆ្នាំ២០២៤, អ៊ុយក្រែន ជាប្រទេសមានសក្តានុពលធំធេង ក្នុងនាមជាអ្នកផ្គត់ផ្គង់វត្ថុធាតុដើមសំខាន់ៗទូទាំងពិភពលោកដែលចាំបាច់សម្រាប់វិស័យឧស្សាហកម្មការពារជាតិ បច្ចេកវិទ្យាទំនើប និងថាមពលបៃតង។

ប្រទេសនេះមានទុនបម្រុងទីតានីញ៉ូមធំជាងគេនៅអឺរ៉ុប ហើយស្មើនឹង៧% នៃទុនបម្រុងពិភពលោក។ ពិសេស មុនពេលផ្ទុះជម្លោះជាមួយរុស្ស៊ីក្នុងឆ្នាំ២០២២ អ៊ុយក្រែនគឺជាអ្នកផ្គត់ផ្គង់ទីតានីញ៉ូមដ៏សំខាន់សម្រាប់ឧស្សាហកម្មយោធា ទៀតផង។

ចំពោះលោហធាតុកម្រ គេដឹងថានៅអ៊ុយក្រែនមានដូចជា បេរីលីយ៉ូម ម៉ង់ហ្គាណែស ហ្គាលីញ៉ូម អ៊ុយរ៉ាញ៉ូម ហ្សីកញ៉ូម ក្រាហ្វីត អាប៉ាទីត ហ្វ្លុយអូរីត និងនីកែល។ មិនត្រឹមប៉ុណ្ណឹង ប្រទេសនេះក៏មានទុនបម្រុងលីចូមធំបំផុតប្រចាំអឺរ៉ុបផងដែរ ដែលគេប៉ាន់ស្មានថាមានចំនួន ៥០០ ០០០តោន៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន និងអាមេរិកចុះហត្ថលេខាលើកិច្ចព្រមព្រៀងរ៉ែ

The post រុស្ស៊ី មិនសប្បាយចិត្ត ថែមប្រតិកម្មខ្លាំងៗទៅ កិច្ចព្រមព្រៀងរ៉ែ អាមេរិក-អ៊ុយក្រែន appeared first on Kampuchea Thmey Daily.