រកឃើញ​ជំងឺផ្តាសាយបក្សី​​កើត​លើ​សត្វចៀម​ដំបូង​បំផុត​​​នៅ​​ចក្រភពអង់គ្លេស

ប្រធានពេទ្យសត្វ​នៃ​ប្រទេស​អង់គ្លេស​​ បានបញ្ជាក់ថា ខ្លួន​បាន​រកឃើញករណីជំងឺគ្រុនផ្តាសាយបក្សី (H5N1) ដែល​កើតលើសត្វចៀម​ដំបូងបង្អស់​​នៅ​​ក្នុង​ពិភពលោក នៅក្នុងកសិដ្ឋានមួយក្នុងប្រទេសអង់គ្លេស។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី២៥ខែមីនានេះ។

ទីតាំងពិតប្រាកដនៃកសិដ្ឋានមិនត្រូវបានគេបង្ហាញឱ្យដឹងនោះទេ ប៉ុន្តែអ្នកនាំពាក្យរដ្ឋាភិបាល បាននិយាយថា ករណីនេះត្រូវ​បានរកឃើញនៅក្នុងកសិដ្ឋានមួយក្នុងទីក្រុង Yorkshire ប្រទេសអង់គ្លេស។ អ្នកនាំពាក្រដ្ឋាភិបាលបានឲ្យដឹង​ថា ចៀម​ដែល​ឆ្លងមេរោគជាចៀមញីនិងមានតែមួយប៉ុណ្ណោះ ហើយត្រូវបានសម្លាប់ដើម្បីទប់ស្កាត់ការឆ្លងរាលដាល​។ ចំណែក​កូនចៀមនិងសត្វចៀមផ្សេងទៀតបានធ្វើតេស្តអវិជ្ជមានចំពោះមេរោគនេះ។

នាយកដ្ឋានបរិស្ថាន អាហារ និងកិច្ចការជនបទ (Defra) ​នៃ​ប្រទេស​អង់គ្លេស​ បានឲ្យដឹងថា នេះជាលើកទីមួយហើយនៅក្នុងពិភពលោក​ដែល​មេរោគគ្រុនផ្ដា​សាយ​បក្សីត្រូវបានរកឃើញនៅក្នុងសត្វចៀម ខណៈជំងឺ​​នេះ​​ត្រូវបានគេរកឃើញពីមុនមានតែនៅក្នុងបសុសត្វនៅក្នុងប្រទេសផ្សេងទៀតប៉ុណ្ណោះ។

លោកស្រី Christine Middlemiss ប្រធានពេទ្យសត្វរបស់ចក្រភពអង់គ្លេស បាននិយាយថា បន្ទាប់ពីការរកឃើញនេះ វិធានការតឹងរឹង​ត្រូវបានដាក់ចេញ ដើម្បីទប់ស្កាត់ការរីករាលដាលនៃជំងឺនេះបន្ថែមទៀត។ លោកស្រីក៏បានសំណូម​ពរ​​ដល់ម្ចាស់សត្វទាំងអស់រាយការណ៍ពីរោគសញ្ញានៃការឆ្លងមេរោគផ្ដាសាយបក្សីលើសត្វរបស់ពួកគេទៅកាន់ភ្នាក់ងារពេទ្យសត្វជាបន្ទាន់។

ទោះបីហានិភ័យនៃការឆ្លងមានកម្រិតទាប នាយកដ្ឋានបរិស្ថាន អាហារ និងកិច្ចការជនបទ បានដាក់ប្រទេសអង់គ្លេសនៅក្នុង «តំបន់ការពារជំងឺគ្រុនផ្តាសាយបក្សី» ដើម្បី​បង្ការ​ជំងឺផ្តាសាយបក្សី និងបញ្ឈប់ការរីករាលដាល។ តំបន់ចំនួន ១៣ ត្រូវបានរឹតបន្តឹង រួមមាន Cheshire, Hull, East Riding of Yorkshire, Herefordshire, Lancashire, Merseyside, Norfolk, North Yorkshire, Shropshire, Suffolk, Worcestershire និង York ។

ទីភ្នាក់ងារស្តង់ដារអាហារក៏បានណែនាំឲ្យប្រជាជន ចម្អិន​ឱ្យបាន​ឆ្អិន​ល្អ​​ នូវ​អាហារ​ធ្វើ​ពីសាច់បក្សី និងផលិតផលបសុបក្សី រួមទាំងស៊ុតដើម្បីមានសុវត្ថិភាពក្នុងការបរិភោគ។

ជំងឺគ្រុនផ្តាសាយបក្សី (ឬH5N1) គឺជាជំងឺដែលបង្កឡើងដោយមេរោគដែលឆ្លងដល់សត្វស្លាប និងជួនកាលឆ្លងដល់សត្វដទៃទៀត ដូចជាសត្វគោយកទឹកដោះនៅអាមេរិកជាដើម​។ សត្វបក្សីចិញ្ចឹមចំនួន ១.៧៨ លានក្បាលត្រូវបានសម្លាប់នៅចន្លោះខែវិច្ឆិកា និងខែកុម្ភៈ ដោយសារតែការរីករាលដាលនៃជំងឺនៅទូទាំងចក្រភពអង់គ្លេស៕

អត្ថបទ៖ ប៊ុន សុភាព

The post រកឃើញ​ជំងឺផ្តាសាយបក្សី​​កើត​លើ​សត្វចៀម​ដំបូង​បំផុត​​​នៅ​​ចក្រភពអង់គ្លេស appeared first on Kampuchea Thmey Daily.