ប្រធានាធិបតីកូរ៉េខាងត្បូងបន្ទោស ហ្សេលេនស្គី ថា មិនចេះនយោបាយ ចូលចិត្តតែធ្វើឲ្យពូទីន ខឹង 

ចូលកាន់តំណែងមិនទាន់បានមួយសប្តាហ៍ផង ប្រធានាធិបតីកូរ៉េខាងត្បូង លី ចេម្យុង បានស្តីបន្ទោសមេដឹកនាំអ៊ុយក្រែ​ន វ៉ូឡូឌីមៀរ ហ្សេលេនស្គី ចំៗថា ប្រមុខរដ្ឋាភិបាលទីក្រុងមកៀវរូបនេះ មិនចេះនយោបាយឬការទូតទេ ហើយចូលចិត្តតែធ្វើឲ្យប្រធានាធិបតីរុស្ស៊ី វ្ល៉ាឌីមៀរ ពូទីន ខឹង។

លោកអះអាងបែបនេះ ក្នុងសេចក្តីថ្លែងការណ៍កាលពីថ្ងៃសុក្រទី៧ខែមិថុនាឆ្នាំ២០២៥ ហើយក្នុងនោះប្រធានាធិបតីវ័យ៦១ឆ្នាំរូបនេះក៏និយាយដែរថា លោកហ្សេលេនស្គីនេះហើយ ដែលគួរបន្ទោសចំពោះសកម្មភាពរបស់ពូទីន នៅប្រទេសអ៊ុយក្រែន។

លោក លី ត្រូវគេប្រដូចទៅនឹងប្រធានាធិបតីអាមេរិក ដូណាល់ ត្រាំ ដោយសារតែជំហរប្រឆាំងអ៊ុយក្រែន ដូចគ្នា។ ជាក់ស្តែង ក្នុងអំឡុងយុទ្ធនាការឃោសនារកសំឡេងឆ្នោតក្នុងការបោះឆ្នោតសកលកូរ៉េខាងត្បូង លោក លី បន្ទោសថា ព្រោះតែ ហ្សេលេនស្គី ចិញ្ចឹមចិត្តចូលអង្គការណាតូ ទើបពូទីន បើកការវាយលុកអ៊ុយក្រែន។

សូមជម្រាបថា លោក លីន បានចាប់ផ្ដើម​កាន់​តំណែង​ជាប្រធានាធិបតីកូរ៉េខាងត្បូង​ផ្លូវការ នៅពី​ថ្ងៃ​ពុធ​ទី​៤ខែ​មិថុនា ជាមួយនឹងការសន្យាយ៉ាងម៉ឺងម៉ាត់ ធ្វើ​ឲ្យ​សេដ្ឋកិច្ចប្រទេស​រស់ឡើងវិញ និង​ចាត់វិធានការ​លើ​ជន​ទាំង​ឡាយ​ណា​ដែល​ពាក់ព័ន្ធ​នឹង​ការដាក់ច្បាប់អាជ្ញាសឹកកាលពីឆ្នាំមុន។

លោក លី ដែលជាអតីតមេធាវីសិទ្ធិមនុស្ស និងជាមេដឹកនាំគណបក្សប្រជាធិបតេយ្យសេរី បានឈ្នះការបោះឆ្នោតដោយសំឡេងគាំទ្រ ៤៩,៤២% ផ្តួលបេក្ខជន​បក្ស​អភិរក្សនិយមលោក គីម មូនស៊ូ ដែល​មាន​សំឡេង​គាំទ្រ​ត្រឹម ៤១,១៥%។

ការបោះឆ្នោត​នេះ ​ធ្វើ​​ឡើង​បន្ទាប់​ពី​មាន​ការចោទប្រកាន់ និងការដកតំណែងអតីតប្រធានាធិបតី យូន សុកយុល ដែលបានប្រកាសច្បាប់អាជ្ញាសឹក​កាល​ពី​ខែធ្នូ ឆ្នាំ​២០២៤ និង​បង្ក​ឲ្យ​មាន​ការជាប់គាំងនយោបាយ៕

អត្ថបទ៖ សុខ សុវណ្ណ

ចុចអាន៖ លោក Lee Jae-myung ផ្ដើមពី​កម្មករ​រោងចក្រ​ក្លាយទៅ​ជា​ប្រធានាធិបតី​កូរ៉េខាងត្បូង

The post ប្រធានាធិបតីកូរ៉េខាងត្បូងបន្ទោស ហ្សេលេនស្គី ថា មិនចេះនយោបាយ ចូលចិត្តតែធ្វើឲ្យពូទីន ខឹង  appeared first on Kampuchea Thmey Daily.