និយាយជាមួយពូទីនចប់ភ្លាម ត្រាំ ថា បើផ្ទុះសង្គ្រាមលោកលើកទី៣ ទ័ពអាមេរិក ក៏អាចចូលប្រយុទ្ធដែរ

ក្រោយចំណាយពេល២ម៉ោងកន្លះសន្ទនាតាមទូរស័ព្ទជាមួយប្រធានាធិបតីរុស្ស៊ី វ្ល៉ាឌីមៀរ ពូទីន រួចមក, មេដឹកនាំអាមេរិក ដូណាល់ ត្រាំ បានឆ្លៀតផ្តល់បទសម្ភាសជាមួយទូរទស្សន៍ Fox News ទៀតនៅថ្ងៃពុធទី១៩ខែមីនាឆ្នាំ២០២៥ ដោយក្នុងនោះ លោកបានព្រមានថា កងទ័ពអាមេរិកក៏អាចនឹងចូលប្រយុទ្ធផងដែរ ប្រសិនបើជម្លោះរុស្ស៊ី-អ៊ុយក្រែន រីករាលដាលទៅជាសង្គ្រាមលោកលើកទី៣។

លោកប្រាប់ទៅពិធីការិនី Laura Ingraham ថា «យើងចង់បញ្ចប់សង្គ្រាមឥឡូវនេះ អ្នកមានកាំភ្លើងច្រើនភ្ជង់ដាក់គ្នា ហើយបើបទឈប់បាញ់មិនបន្តទៅមុខទេនោះ វានឹងពិបាកហើយ។ សូមមើលចុះ យើងកំពុងធ្វើរឿងនេះ! មិនមានជនជាតិអាមេរិកណាម្នាក់ចូលរួមទេ ប៉ុន្តែវាអាច ប្រសិនបើកើតសង្គ្រាមលោកលើកទី៣។ អាចនិយាយថា វាជារឿងគួរឲ្យអស់សំណើច ប៉ុន្តែតើអ្នកដឹងទេ មានរឿងចម្លែកៗជាច្រើនបានកើតឡើង»។

ទោះបីជាយ៉ាងណាក៏ដោយ លោក ត្រាំ មិនបញ្ជាក់ឡើយថាតើ ក្នុងករណីសង្គ្រាមលោកលើកទី៣ ផ្ទុះឡើងមែន តើទ័ពអាមេរិក នឹងចូលជួយប្រយុទ្ធឲ្យខាងណា។

នេះមិនមែនទើបលើកដំបូងឡើយដែលលោក ត្រាំ ព្រមានផ្ទុះសង្គ្រាមលោកលើកទី៣ ពោលកាលពីសប្តាហ៍មុន ប្រធានាធិបតីអាមេរិករូបនេះ ក៏ព្រមានដែរថា សង្គ្រាមលោកលើកទី៣ នឹងផ្ទុះឡើង ប្រសិនបើបទឈប់បាញ់រុស្ស៊ី-អ៊ុយក្រែន ត្រូវបរាជ័យ ហើយសង្គ្រាមនោះទៀតសោត នឹងមានទំហំធំបំផុត។

យ៉ាងណា កាលពីថ្ងៃអង្គារទី១៨ខែមីនា លោកពូទីន បានឯកភាពផ្អាកការវាយប្រហារលើសំណង់ហេដ្ឋារចនាសម្ព័ន្ធនិងរោងចក្រថាមពលអ៊ុយក្រែន រយៈពេល៣០ថ្ងៃ ដ្បិតមិនយល់ព្រមចំពោះបទឈប់បាញ់ទាំងស្រុងក៏ដោយ។

ក្នុងកិច្ចសន្ទនាតាមទូរស័ព្ទ លោកត្រាំនិងពូទីន បានពិភាក្សាគ្នាអំពីបញ្ហាអ៊ុយក្រែន ស្ថានភាពនៅមជ្ឈិមបូព៌ា ក៏ដូចជាកិច្ចសហប្រតិបត្តិការដ៏មានសក្តានុពល ក្នុងគោលបំណងការពារជម្លោះនាពេលអនាគតនៅក្នុងតំបន់នោះផងដែរ។ 

ប្រធានបទសំខាន់ផ្សេងទៀតនៅក្នុងរបៀបវារៈរបស់មេដឹកនាំទាំងពីរ គឺតម្រូវការបញ្ឈប់ការរីកសាយភាយអាវុធយុទ្ធសាស្ត្រនៅទូទាំងពិភពលោក និងកិច្ចសហប្រតិបត្តិការស្តារទំនាក់ទំនងរវាងប្រទេសទាំងពីរឡើងវិញ៕

អត្ថបទ៖ សុខ សុវណ្ណ

ចុចអាន៖ ត្រាំ ព្រមានផ្ទុះសង្គ្រាមលោកលើកទី៣ បើបទឈប់បាញ់ រុស្ស៊ី-អ៊ុយក្រែន បរាជ័យ

The post និយាយជាមួយពូទីនចប់ភ្លាម ត្រាំ ថា បើផ្ទុះសង្គ្រាមលោកលើកទី៣ ទ័ពអាមេរិក ក៏អាចចូលប្រយុទ្ធដែរ appeared first on Kampuchea Thmey Daily.