នាយករដ្ឋមន្ត្រីស្នើពលរដ្ឋបើកចិត្តឱ្យទូលាយចំពោះកិច្ចសហការនគរបាលជាមួយប្រទេសជិតខាង

នាយករដ្ឋមន្ត្រីកម្ពុជា សម្ដេច​ធិបតី ហ៊ុន ម៉ាណែត បានបញ្ជាក់​ថា​កង​កម្លាំង​ជាតិ​គឺ​ជាអ្នក​ការ​ពារ​ផលប្រយោជន៍ជាតិទោះបី​ទៅ​សិក្សា ឬ​សហការជាមួយនៅប្រទេសណាក៏ដោយគឺ​នៅ​តែ​ការពារ​ផលប្រយោជន៍ជាតិ​មាតុភូមិដដែល។

ថ្លែង​ក្នុង​ពិធី​អបអរខួប៨០​ឆ្នាំ​នៃ​ទិវា​កំណើត​នគរបាលជាតិនៅក្នុង​ខេត្តកណ្ដាល ព្រឹកថ្ងៃទី១៦ ខែឧសភា ឆ្នាំ២០២៥នេះ សម្ដេចធិបតី ហ៊ុន ម៉ាណែត បាន​ថ្លែង​ថាក្នុង​សម័យ​បច្ចុប្បន្ន​គ្មានប្រទេស​ណា​មួយ​រស់​ដោយឯកោបាន​ទេ ការដែល​នគរបាលចេញ​ទៅ​ទទួល​ការ​បណ្ដុះ​បណ្ដាលពីបរទេសពិសេស​ប្រទេស​ជិត​ខាង​ ហើយនគរបាលប្រទេស​ទាំង​នោះ​មក​បណ្ដុះបណ្ដាលនៅកម្ពុជាគឺជាកិច្ចសហប្រតិបត្តិការដើម្បីការងារ​សន្ដិសុខប្រទេស​រៀងខ្លួន។

សម្ដេច​ថ្លែងថា៖ «យើង​បញ្ជូន​សិក្ខាកាម​ទៅ គេ​បញ្ជូន​សិក្ខា​កាម​មក​ រៀនភាសា រៀនច្បាប់ ចែករម្លែក បទ​ពិសោធន៍ព្រោះឥឡូវសម័យ​នេះយើង​ត្រូវ​ទទួល​ស្គាល់​ថា​យើង​មិន​អាច​នៅដាច់​ដោយ​ឡែក​ទេ»។

ការ​លើក​ឡើង​របស់​សម្ដេច​គឺ​បន្ទាប់​ពី​សម្ដេច​ឃើញ​មាន​ការ​លើក​ឡើង​ក្នុង​បណ្ដាញ​សង្គម​របស់​ពលរដ្ឋ​មួយ​ចំនួន​ដែល​មិន​ពេញ​ចិត្ត​ពេល​ដែល​ឃើញ​រូប​ភាពកង​កម្លាំង​កម្ពុជាទៅ​ទទួល​ការបណ្ដុះ​បណ្ដាលនៅប្រទេស​ជិតខាង ក៏ដូចជា​កងកម្លាំង​ប្រទេសជិត​ខាង​សិក្សា​ភាសាជាតិខ្មែរ​ ដោយ​សម្ដេច​ស្នើ​ដល់​ពលរដ្ឋ​គួរ​បើក​ចិត្ត​ឱ្យទូលាយ​និង​មើលឱ្យបាន​វែង​ឆ្ងាយ។

សម្ដេច​បាន​បង្ហាញ​ពី​ជំនឿ​ចិត្ត​លើ​ការ​ស្នេហាជាតិ​ ភក្ដីភាព​ របស់​កង​កម្លាំង​នគរបាល​ចំពោះ​ជាតិ​មាតុភូមិ ព្រមទាំង​បានលើក​ឡើងថាការ​ពឹង​ផ្អែក​គ្នា​ជាមួយប្រទេស​ជាមិត្ត​ធ្វើ​ឱ្យ​ប្រទេស​កម្ពុជាអាច​ឆ្លើយតប​នឹង​ឧក្រិដ្ឋកម្មឆ្លង​ដែន​ ​ការ​ចែករម្លែកព័ត៌មាន​ចារកិច្ចទប់ស្កាត់​មុខសញ្ញាភារវករ បង្កើន​កិច្ចសហប្រតិបត្តិការ​ចាប់ឧក្រិដ្ឋកម្មឆ្លង​ដែនកាន់​តែ​មាន​ប្រសិទ្ធភាព រួម​ទាំង​ការ​បណ្ដុះបណ្ដាល​បច្ចេកទេស​ដល់​កម្លាំង​ជំនាញរបស់កម្ពុជា​ងផងដែរ៕

អត្ថបទដោយ ហ៊ុន សិរីវឌ្ឍន៍

The post នាយករដ្ឋមន្ត្រីស្នើពលរដ្ឋបើកចិត្តឱ្យទូលាយចំពោះកិច្ចសហការនគរបាលជាមួយប្រទេសជិតខាង appeared first on Kampuchea Thmey Daily.