ក្រសួងព័ត៌មាន ស្នើឱ្យប្រព័ន្ធផ្សព្វផ្សាយធំជាងគេនៅចិន ជួយផ្នែកបច្ចេកទេស និងសម្ភារៈឧបករណ៍
រដ្ឋមន្ត្រីក្រសួងព័ត៌មានកម្ពុជា និងតំណាងប្រព័ន្ធផ្សព្វផ្សាយ CMG ប្រទេសចិន បញ្ជាក់ពីការបន្តពង្រីកកិច្ចសហប្រតិបត្តិការដែលមានពីមុន The post ក្រសួងព័ត៌មាន ស្នើឱ្យប្រព័ន្ធផ្សព្វផ្សាយធំជាងគេនៅចិន ជួយផ្នែកបច្ចេកទេស និងសម្ភារៈឧបករណ៍ appeared first on Kampuchea Thmey Daily.
រដ្ឋមន្ត្រីក្រសួងព័ត៌មានកម្ពុជា និងតំណាងប្រព័ន្ធផ្សព្វផ្សាយ CMG ប្រទេសចិន បញ្ជាក់ពីការបន្តពង្រីកកិច្ចសហប្រតិបត្តិការដែលមានពីមុន និងបង្កើនកិច្ចសហការថ្មីទៀត ដើម្បីប្រសិទ្ធិការងារផ្សព្វផ្សាយបានកាន់តែល្អប្រសើរ។
កិច្ចសហប្រតិបត្តិការល្អរវាងក្រសួងព័ត៌មាន និងប្រព័ន្ធផ្សព្វផ្សាយ CMG ប្រទេសចិន នៃមជ្ឈមណ្ឌលកម្មវិធីភាសាតំបន់អាស៊ីនិងអាហ្វ្រិក នៃអគ្គស្ថានីយវិទ្យុនិងទូរទស្សន៍មជ្ឈិមចិននាពេលកន្លងមកនេះ គឺបានអនុវត្តន៍ស្របតាមទំនាក់ទំនងពី“ មិត្តដែកថែប មកមិត្ត ត្បូងពេជ្រ “កម្ពុជា ចិន,។
ក្នុងកិច្ចពិភាក្សាការងាររវាង រដ្ឋមន្ត្រីក្រសួងព័ត៌មាន ជាមួយ អ្នកនាង Xu Xiaoxia អនុប្រធានផ្នែកភាសាខ្មែរនៃមជ្ឈមណ្ឌលកម្មវិធីភាសាតំបន់អាស៊ីនិងអាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន រួមទាំងប្រធានគ្រប់គ្រងវិទ្យុមិត្តភាពកម្ពុជា-ចិន នៅព្រឹកថ្ងៃទី៧ ខែមីនា ឆ្នាំ២០២៥ នាទីស្តីការក្រសួងព័ត៌មាន លោក រដ្ឋមន្ត្រី នេត្រ ភក្ត្រា បានជម្រាបជូនថា បច្ចុប្បន្ននេះ ទីភ្នាក់ងារសារព័ត៌មានកម្ពុជា AKP មានការផ្សាយជាភាសាខ្មែរ ភាសាបារាំង អង់គ្លេស អារ៉ាប់ ហើយចង់ឱ្យបង្កើតជាភាសាចិន ១ទៀត។
ជាមួយនេះ វិទ្យុជាតិកម្ពុជា មានកិច្ចសហប្រតិបត្តិការជាមួយវិទ្យុមិត្តភាពកម្ពុជា ចិន ហើយវិទ្យុជាតិក៏មានកម្មវិធីផ្សាយជាភាសាបារាំង អង់គ្លេស ហើយចង់ឱ្យមានកម្មវិធីផ្សាយជាភាសាចិនផងដែរ។
ក្នុងកិច្ចសហប្រតិបត្តិការក្នុងការផ្លាស់ប្តូរព័ត៌មានពីគ្នាទៅវិញទៅមកបន្តទៅមុខទៀត លោក រដ្ឋមន្ត្រី នេត្រ ភក្ត្រា ចង់ពង្រីកកិច្ចសហការរួមគ្នាលើការបកប្រែព័ត៌មានសំខាន់ៗ ដែលកើតមានឡើងនៅកម្ពុជា ពីភាសាខ្មែរ ទៅភាសាចិន ហើយក៏បកប្រែព័ត៌មាននៅប្រទេសចិន ពីភាសាចិន មកខ្មែរ ដែលជាក្របខណ្ឌនៃការផ្សារភ្ជាប់នូវទំនាក់ទំនងល្អរវាងប្រជាជន និងប្រជាជន តាមរយៈការផ្សព្វផ្សាយព័ត៌មានពិត ត្រឹមត្រូវ ។
ឆ្លៀតក្នុងឱកាសនេះដែរ លោករដ្ឋមន្រ្តី បានស្នើ ដល់ប្រព័ន្ធផ្សព្វផ្សាយ CMG ចិន ជួយលើផ្នែកបច្ចេកទេស និងសម្ភារៈឧបករណ៍ដើម្បីសម្រួលដល់ការផ្សព្វផ្សាយបានកាន់ល្អប្រសើរបន្ថែមទៀត ជាពិសេស CMG ដែលមានបណ្តាញផ្សាយជាច្រើន ជួយបង្កើនការផ្សព្វផ្សាយពីបរិបទនៃការរស់នៅរបស់ប្រជាជនកម្ពុជា ប្រពៃណី វប្បធម៌ ទំនៀមទម្លាប់ និងសម្បត្តិធម្មជាតិ ពិសេសតំបន់ទេសចរណ៍ដ៏សម្បូរណ៍បែបនៅប្រទេសកម្ពុជា ទៅឱ្យប្រជាជនចិន បានដឹងសុីជម្រៅបន្ថែមទៀត។
អ្នកនាង Xu Xiaoxia បានសំដែងនូវការរីករាយដោយឃើញពីលទ្ធផលល្អនៃកិច្ចសហប្រតិបត្តិការគ្នារវាង ប្រព័ន្ធផ្សព្វផ្សាយ CMG ប្រទេសចិន និងក្រសួងព័ត៌មានកម្ពុជា។
ជាមួយនេះ អ្នកស្រី អនុប្រធានផ្នែកភាសាខ្មែរនៃមជ្ឈមណ្ឌលកម្មវិធីភាសាតំបន់អាស៊ីនិងអាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន បានឯកភាពបន្តពង្រឹងកិច្ចសហការនូវរាល់ចំណុចសំខាន់ៗដែល លោករដ្ឋមន្ត្រី បានលើកឡើង ហើយត្រូវតែរួមគ្នាអនុវត្តន៍ឲ្យទទួលលទ្ធផលថ្មីៗបន្ថែមទៀត។
អ្នកនាង Xu Xiaoxia បានជម្រាបជូនថា CMG គឺជាប្រពន្ធ័ផ្សព្វផ្សាយរដ្ឋរបស់ប្រទេសចិន ដែលមានទ្រង់ទ្រាយធំជាងគេ និងបានផលិតកម្មវិធីច្រើនជាងគេលើពិភពលោក តាមរយៈប្រពន្ធ័ផ្សាយ CGTN និង CCTV ។ សម្រាប់វិទ្យុមិត្តភាពកម្ពុជា-ចិន គឺជាសាខាផ្សព្វផ្សាយព័ត៌មាន និងកម្មវិធីនានា មកកាន់ប្រទេសកម្ពុជា តាមរយៈ CGTN ហើយដំណើរទំហំនៃការផ្សាយរបស់ CGTN មានចំនួន ៦៨ ភាសា ដើម្បីផ្សាយទៅកាន់ពិភពលោក។
គួររំលឹកឡើងវិញដែរថា កាលពីកំឡុងខែវិច្ឆិកា ឆ្នាំ២០២៣ ទូរទស្សន៍ជាតិកម្ពុជា និងបណ្តាញប្រព័ន្ធផ្សព្វផ្សាយចិន CMG បានចុះហត្ថលេខាចុះអនុស្សរណៈនៃការយោគយល់គ្នារវាង លោក ឃឹម វុទ្ធី អគ្គនាយកទូរទស្សន៍ជាតិកម្ពុជា និង លោក Li Yi ប្រធានស្ថានីយ៍អាសុីប៉ាសុីហ្វិក នៃអគ្គស្ថានីយ៍វិទ្យុ និងទូរទស្សន៍មជ្ឈឹមចិន ក្រោមអធិបតីភាព លោក នេត្រ ភក្ត្រា រដ្ឋមន្រ្តីក្រសួងព័ត៌មាន និង លោក Hu Jinjun អគ្គនាយករង នៃអគ្គស្ថានីយ៍វិទ្យុ និងទូរទស្សន៍មជ្ឈឹមចិន។
តាមរយៈកិច្ចសហប្រតិបត្តិការកន្លងមកនេះ ទូរទស្សន៍ជាតិកម្ពុជា មានការអភិវឌ្ឍថែមមួយកម្រិតទៀត ជាពិសេសតាមរយៈកម្មវិធីបណ្តុះបណ្តាលមន្រ្តីជំនាញ អ្នកយកព័ត៌មាន អ្នកបច្ចេកទេស អ្នកផលិតកម្មវិធី ការផ្សាយព័ត៌មានអន្តរជាតិ ជាភាសាខ្មែរតាមរយៈ China Global Television Network -CGTN៕
The post ក្រសួងព័ត៌មាន ស្នើឱ្យប្រព័ន្ធផ្សព្វផ្សាយធំជាងគេនៅចិន ជួយផ្នែកបច្ចេកទេស និងសម្ភារៈឧបករណ៍ appeared first on Kampuchea Thmey Daily.
