ប្រធានមន្ទីរបញ្ចកោណជឿជាក់ថា ណាតូនឹងសម្រេចបានគោលដៅចំណាយការពារជាតិ ៥%
រដ្ឋមន្ត្រីការពារជាតិអាមេរិក លោក Pete Hegseth បានបង្ហាញទំនុកចិត្តយ៉ាងមុតមាំថា សម្ព័ន្ធមិត្តណាតូនឹងយល់ព្រមតាមការទាមទាររបស់ប្រធានាធិបតី... The post ប្រធានមន្ទីរបញ្ចកោណជឿជាក់ថា ណាតូនឹងសម្រេចបានគោលដៅចំណាយការពារជាតិ ៥% appeared first on Kampuchea Thmey Daily.
រដ្ឋមន្ត្រីការពារជាតិអាមេរិក លោក Pete Hegseth បានបង្ហាញទំនុកចិត្តយ៉ាងមុតមាំថា សម្ព័ន្ធមិត្តណាតូនឹងយល់ព្រមតាមការទាមទាររបស់ប្រធានាធិបតី ដូណាល់ ត្រាំ សម្រាប់ការបង្កើនការចំណាយលើវិស័យការពារជាតិដល់ ៥% នៃផលិតផលក្នុងស្រុកសរុប (GDP) របស់ប្រទេសសមាជិកនីមួយៗ។
គោលដៅដែលបានស្នើឡើងនេះ គឺជាការកើនឡើងគួរឲ្យកត់សម្គាល់ពីការកំណត់គោលដៅ ២% បច្ចុប្បន្ន ហើយត្រូវបានគេរំពឹងថានឹងក្លាយជាប្រធានបទដ៏សំខាន់នៅក្នុងកិច្ចប្រជុំកំពូលណាតូ ដែលនឹងធ្វើនៅទីក្រុងឡាអេនាថ្ងៃទី២៤-២៥ខែមិថុនា។
លោក Hegseth បាននិយាយនៅក្នុងកិច្ចប្រជុំក្រុមរដ្ឋមន្ត្រីការពារជាតិណាតូនៅទីក្រុងប៊្រុលសែលកាលពីថ្ងៃទី៥ខែមិថុនាថា «យើងនៅទីនេះដើម្បីបន្តការងារដែលប្រធានាធិបតី ត្រាំ បានចាប់ផ្តើម ដែលជាការប្តេជ្ញាចិត្តចំពោះការចំណាយលើវិស័យការពារជាតិ ៥% នៅទូទាំងសម្ព័ន្ធភាពនេះ ដែលយើងគិតថានឹងអាចធ្វើបាន»។
បច្ចុប្បន្ន ពុំទាន់មានប្រទេសណាមួយអាចឈានដល់ចំណាយ ៥%នៃ GDP ទេ សូម្បីតែអាមេរិក ប៉ុន្តែលោក Hegseth បាននិយាយថា វាកំពុងមានដំណើរការហើយលើការសម្រេចបានគោលដៅនេះ។
អគ្គលេខាធិការអង្គការណាតូលោក Mark Rutte បានស្នើផែនការវិនិយោគថ្មីមួយដែលបែងចែក ៣,៥% នៃ GDP សម្រាប់ការចំណាយលើវិស័យការពារជាតិដោយផ្ទាល់ និង ១,៥%បន្ថែមទៀតសម្រាប់ការចំណាយយោធាដោយប្រយោលដែលពាក់ព័ន្ធនឹងសន្តិសុខជាតិ ដូចជា សន្តិសុខតាមអ៊ីនធឺណិត និងហេដ្ឋារចនាសម្ព័ន្ធដែលមានសមត្ថភាពយោធា។ ផែនការនេះ មានគោលបំណងព្យាយាមពង្រឹងការការពាររបស់ណាតូប្រឆាំងនឹងការគំរាមកំហែងដ៏ស្មុគស្មាញនាពេលបច្ចុប្បន្ននេះ ទន្ទឹមនឹងនោះក៏មានភាពយុត្តិធម៌ចំពោះប្រទេសដែលមានសេដ្ឋកិច្ចតូច ឬខ្សោយជាង ដោយអនុញ្ញាតឲ្យមានមធ្យោបាយបត់បែនបន្ថែមទៀតដើម្បីឈានទៅដល់គោលដៅ។
សមាជិកចំនួន២៣ក្នុងចំណោមរដ្ឋសមាជិកទាំង៣២របស់ណាតូ បច្ចុប្បន្នសម្រេចបាននូវគោលដៅចំណាយ ២% តែមិនទាន់មាននរណាម្នាក់ឈានដល់កម្រិត ៥% ដូចដែលបានស្នើឡើងនៅឡើយទេ។ សមាជិកសម្ព័ន្ធនៅតែកំពុងជជែកវែកញែកគ្នាសម្រាប់កាលបរិច្ឆេទក្នុងការសម្រេចបាននូវគោលដៅ ៥%។ លោក Rutte បានដាក់កាលកំណត់នៅត្រឹមឆ្នាំ២០៣២ ហើយសមាជិកខ្លះបានយល់ថា កាលកំណត់នេះពិតជាលឿនពេកសម្រាប់ប្រទេសពួកគេ។ យ៉ាងណា ប្រទេសមួយចំនួននៅអឺរ៉ុបខាងកើត ដូចជា លីទុយអានី បែរជាមានមហិច្ឆតាចង់សម្រេចគោលដៅឲ្យលឿនជាងនេះទៅវិញ៕
ដោយ៖ ឈាង
The post ប្រធានមន្ទីរបញ្ចកោណជឿជាក់ថា ណាតូនឹងសម្រេចបានគោលដៅចំណាយការពារជាតិ ៥% appeared first on Kampuchea Thmey Daily.
