អាជ្ញាធរ​ស្រុកស្រែអំបិល ស្នើឱ្យមានការចេញបណ្ណអចលនវត្ថុសម្គាល់ដីធ្លី​ឱ្យ​បាន​ឆាប់​រហ័ស

កោះកុង ៖ លោកអភិបាលស្រុកស្រែអំបិល បាន​ស្នើ​ដល់​ប្រធានក្រុមការងាររាជរដ្ឋាភិបាលកម្ពុជា​ចុះ​ជួយ​មូលដ្ឋានស្រុក ជួយ​សម្របសម្រួល​ឱ្យមានការចេញបណ្ណ​អចលនវត្ថុ​សម្គាល់ដីធ្លី​ឱ្យបានឆាប់រហ័ស។

នេះ​ជា​ការ​ស្នើ​ឡើង​របស់​លោក ជា ច័ន្ទកញ្ញា អភិបាលស្រុកស្រែអំបិល ក្នុង​កម្មវិធី​ផ្សព្វផ្សាយ​ឱកាស​ការងារ និងការចុះឈ្មោះចូលរៀនវិជ្ជាជីវៈ និងបច្ចេកទេស ជូនយុវជនមកពីគ្រួសារក្រីក្រ និងងាយរងហានិភ័យប្រមាណ៥០០នាក់នៅសាលាស្រុក។

លោកអភិបាលស្រុកស្រែអំបិល រលឹកដែរថា ការវាស់វែងដីធ្លីតាមបទបញ្ជា០១របស់រាជរដ្ឋាភិបាល បានបញ្ចប់យូរឆ្នាំមកហើយ តែនៅមិនទាន់បានចេញប័ណ្ណជូនប្រជាពលរដ្ឋនៅឡើយ ដូចនេះលលោកស្នើដល់លោក ជា មានិត ប្រធាន​ក្រុមការងាររាជរដ្ឋាភិបាលកម្ពុជា​ចុះ​មូលដ្ឋានស្រុកស្រែអំបិល មេត្តាជួយជំរុញពន្លឿនការចេញប័ណ្ណជូនប្រជាពលរដ្ឋ។

បើតាមលោក ជា ច័ន្ទកញ្ញា ការចុះបញ្ជីដីធ្លីមានលក្ខណៈជាប្រព័ន្ធ បច្ចុប្បន្ន ចុះបញ្ជីបានចប់នៅឃុំស្រែអំបិលបានមួយឃុំ គោលដៅរបស់រាជរដ្ឋាភិបាល ក៏ដូចក្រសួងរៀបចំដែនដី នគរូបណីយកម្ម សំណង់ និងសុរិយោដី បានកំណត់ឱ្យការចុះបញ្ជីដីធ្លីមានលក្ខណៈជាប្រព័ន្ធបញ្ចប់នៅឆ្នាំ២០២៥នេះ ប៉ុន្តែនៅស្រុកស្រែអំបិល មានក្រុមការងារចុះបញ្ជីតែមួយក្រុម មិនអាចអនុវត្តការងារទាន់ពេលវេលាតាមគោលដៅកំណត់បាន សូម ឯកឧត្តមប្រធាន មេត្តាជួយសម្របសម្រួលផ្តល់ក្រុមការងារចុះបញ្ជីទៀត។

ពាក់ព័ន្ធលោក ជា មានិត ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកស្រែអំបិល អះអាងថា លោក​នឹង​ពាំនាំ​នូវ​បញ្ហា​ដែល​ជា​សេចក្តីត្រូវការរបស់ប្រជាពលរដ្ឋ​ទៅកាន់ថ្នាក់ដឹកនាំរាជរដ្ឋាភិបាលបន្ត ដើម្បីធ្វើយ៉ាងណា​ឱ្យចេញបណ្ណសម្គាល់អចលនវត្ថុដីធ្លី​ឱ្យបានឆាប់រហ័ស។

បន្ថែមលើនេះ លោក ជា មានិត ក៏អំពាវនាវដល់អាជ្ញាធរស្រុកស្រែអំបិល និងបណ្តាឃុំទាំងអស់ បន្តឱ្យអនុវត្តតួនាទីភារកិច្ចរបស់ខ្លួន ស្រមតាមគោលនយោបាយ ភូមិ ឃុំ សង្កាត់ មានសុវត្ថិភាព ដោយរក្សាបាននូវសុខសុវត្តិភាពជូនប្រជាពលរដ្ឋ និងភ្ញៀវទេសចរ បានយ៉ាងល្អប្រសើរ​នៅក្នុងមូលដ្ឋាន តបនឹងគោលនយោបាយរបស់រាជរដ្ឋាភិបាលដែលបានដាក់ចេញ៕

អត្ថបទ ៖ សិរីវឌ្ឍនៈ

The post អាជ្ញាធរ​ស្រុកស្រែអំបិល ស្នើឱ្យមានការចេញបណ្ណអចលនវត្ថុសម្គាល់ដីធ្លី​ឱ្យ​បាន​ឆាប់​រហ័ស appeared first on Kampuchea Thmey Daily.