សម្ដេចតេជោ៖ ខ្ញុំនឹងកំចាត់ចោលអ្នកណាក៏ដោយដែលចង់សម្លាប់ខ្ញុំនិងគ្រួសារខ្ញុំ

ប្រធានព្រឹទ្ធសភា សម្ដេចតេជោ ហ៊ុន សែន ប្រកាសកំចាត់ចោលអ្នកដែលចង់សម្លាប់សម្ដេច និងគ្រួសារ ដោយថាសម្ដេចបានដឹងមេខ្លោងជាអ្នកណាហើយ តែពេលនេះ«ត្រូវកំចាត់ពួកជ្រុលនិយមនិងហិង្សាឱ្យអស់សិន»។

ក្នុងសារបង្ហោះនៅហ្វេសបុកផេកនៅថ្ងៃទី១៣ ខែកុម្ភៈ នេះសម្ដេចតេជោ ហ៊ុន សែន បានបង្ហោះនូវសំឡេងចំនួន២របស់ស្ត្រីម្នាក់ដែលប្រមាថដល់សម្ដេចតេជោ និងគ្រួសារដោយប្រើភាសាហិង្សាគ្មានមនុស្សធម៌ចង់យកដ្រូនកសិកម្មដាក់សាំងបាញ់លើផ្ទះសម្ដេចរួចដុតដៃកេះដុតសម្លាប់មិនទុកអ្នកណាម្នាក់នោះទេសូម្បីតែកូនតូចក្នុងអង្រឹង។

សម្ដេចតេជោថានេះគ្រាន់តែជាព័ត៌មានតូចមួយនៃផែនការភារវកម្មលើគ្រួសារសម្ដេចប៉ុណ្ណោះជាមួយនឹងការប្រកាសថានឹងកំចាត់ចោលអ្នកដែលចង់សម្លាប់សម្ដេចនិងគ្រួសារ។

សម្ដេចបានសរសេរបង្ហោះថា៖ «យើងដឹងមេធំរបស់គេជាអ្នកណាហើយនៅទីណា?តែយើងមិនទាន់បញ្ចេញនៅពេលនេះទេព្រោះយើងត្រូវកំចាត់ពួកជ្រុលនិយមនិងហិង្សានិយមឲ្យអស់សិន។ តើប្រទេសដែលអួតខ្លួនថាប្រជាធិបតេយ្យនិងគោរពសិទ្ធមនុស្សគាំទ្រអំពើបែបនេះនិងឲ្យជនទាំងនេះស្នាក់នៅក្នុងប្រទេសខ្លួនឬទេ? យើងរង់ចាំមើលបណ្តាបក្សនយោបាយនិងអ្នកនយោបាយណាខ្លះដែលចេញមុខថ្កោលទោសឬនៅស្ងៀមឬគាំទ្រចំពោះទង្វើបែបនេះ? ខ្ញុំសូមប្រកាសថាខ្ញុំនឹងកំចាត់ចោលអ្នកណាក៏ដោយដែលចង់សម្លាប់ខ្ញុំនិងគ្រួសារខ្ញុំ»។

គួរឱ្យដឹងដែរថា គម្រោងការធ្វើឃាតសម្ដេចតេជោត្រូវបានទម្លាយដោយសម្ដេចតេជោកាលពីថ្ងៃទី១១ ខែកុម្ភៈ ឆ្នាំ២០២៥ ក្នុងពេលសម្ដេចអញ្ជើញថ្លែងក្នុងពិធីសម្ពោធអាគារសិក្សានៅវត្តព្រះឥន្ទសាមគ្គីធម៌ នៅស្រុកអង្គស្នួល ខេត្តកណ្តាល។ សម្ដេចបានចាត់ទុកសកម្មភាពនេះជាអំពើភេរវកម្ម និងផ្ដាំទៅបរទេសកុំលូកលាន់ចូលកិច្ចការផ្ទៃក្នុងប្រទេស ខណៈសមត្ថកិច្ចបានឃាត់ខ្លួនមនុស្សដែលចូលរួមក្នុងផែនការនេះជាបន្តបន្ទាប់ហើយ៕

អត្ថបទដោយ ហ៊ុន សិរីវឌ្ឍន៍

The post សម្ដេចតេជោ៖ ខ្ញុំនឹងកំចាត់ចោលអ្នកណាក៏ដោយដែលចង់សម្លាប់ខ្ញុំនិងគ្រួសារខ្ញុំ appeared first on Kampuchea Thmey Daily.