វិស័យអចលនទ្រព្យថៃធ្លាក់ចូលសម្ពាធនៃការហក់ឡើងតម្លៃ

របាយការណ៍របស់មជ្ឈមណ្ឌលព័ត៌មានអចលនទ្រព្យថៃ (REIC) បាន​បង្ហាញ​ថា​ ទីផ្សារអចលនទ្រព្យរបស់ប្រទេសថៃកំពុងប្រឈមមុខនឹងសម្ពាធកាន់តែខ្លាំង ដោយ​សារតែកំណើនថ្លៃដី និងការសាងសង់ ដែលធ្វើឱ្យតម្លៃផ្ទះ និងខុនដូថ្មីកើនឡើងខ្ពស់។ នេះបើតាម​ការ​ចុះផ្សាយ​របស់​កាសែត The Nation កាលពីថ្ងៃសៅរ៍។

ក្នុងរយៈពេលប៉ុន្មានឆ្នាំចុងក្រោយនេះ វិស័យលំនៅដ្ឋានបាន​ឡើងថ្លៃជាបន្តបន្ទាប់ ដែលរងឥទ្ធិពលពីកត្តាជាច្រើន រួមទាំងការកើនឡើងនៃការចំណាយលើការសាងសង់ និងតម្លៃដីនៅក្នុងទីតាំងសំខាន់ៗ ជាពិសេសនៅទីក្រុងបាងកក តាមបណ្ដោយខ្សែរថភ្លើង BTS និង MRT ។

ទិន្នន័យរបស់ REIC បង្ហាញថា តម្លៃអចលនទ្រព្យថ្មីនៅសង្កាត់ Minburi សង្កាត់ Nong Chok និងសង្កាត់ Lat Krabang បានឃើញការកើនឡើងខ្លាំងបំផុតនៅក្នុងត្រីមាសទី ៤ នៃឆ្នាំ ២០២៤ ខណៈតម្លៃខុនដូនៅសង្កាត់ Huai Khwang សង្កាត់ Chatuchak និងសង្កាត់ Din Daeng ក៏មានការឡើងខ្ពស់ផងដែរ។

តម្លៃអចលនទ្រព្យលំនៅដ្ឋានថ្មី បាន​កើនឡើង ០,៨ ភាគរយ​ ដែលជាកំណើន ៩ ត្រីមាស​ជាប់ៗគ្នា​ ខណៈតម្លៃខុនដូថ្មី បាន​កើនឡើង ៣,៦ ភាគរយ ដែល​ជា​កំណើន ៨ ត្រីមាសជាប់ៗគ្នា៕

The post វិស័យអចលនទ្រព្យថៃធ្លាក់ចូលសម្ពាធនៃការហក់ឡើងតម្លៃ appeared first on Kampuchea Thmey Daily.