មិនទាន់រំសាយចិត្ត! G-Devith ប្រកាសបញ្ចេញបទ Disstrack មួយទៀត ស្អែកនេះ

លោក ងួន ចាន់ដេវីត ប្រកាសបញ្ចេញបទចម្រៀង Disstrack មួយទៀតស្អែកនេះ ចំណងជើង “អ្ហែងចង់ទៅណា?” ទន្ទឹមនឹងបញ្ជាក់ថា ចម្រៀងមួយបទនេះមានពាក្យពេចន៍មិនសមរម្យ។ ការប្រកាសនៃបទថ្មីដែលគ្រោងបញ្ចេញស្អែកនេះ គឺបន្ទាប់ពីលោកទើបតែបញ្ចេញចម្រៀងរ៉េបមួយបទចំណងជើង “ថីអ្ហែងថី?” ហើយទទួលបានការទស្សនាដល់ទៅ ជាង ១០លានដង។

បើទោះបីជាមហាជន ពុំទាន់បានជ្រាបច្បាប់ពីខ្លឹមសារនៃចម្រៀង ដែលត្រៀមនឹងបញ្ចេញជាផ្លូវការស្អែកនេះ តែគេសន្មត់ថា ជាការតភាគនៃបទមុន ខណៈជាវេលានៃការចាប់ផ្តើមសង្គ្រាម Disstrack ក្នុងវិស័យចម្រៀងរ៉េបជាថ្មី។

គួររំលឹកថា ចម្រៀង Disstrack មួយបទមុន បានធ្វើឱ្យផ្អើលពិភពនៃចម្រៀងរ៉េបយ៉ាងខ្លាំង ខណៈមូលហេតុនៃការចាប់ផ្តើមនៃកំដៅសង្គ្រាម Disstrack នេះ ត្រូវបានសាធារណជន ក៏ដូចជាអ្នកល្បីៗមួយចំនួន យល់ថា គឺផ្តើមចេញពីសម្តីរបស់ភាគីម្ខាង ខណៈម្ខាងទៀត យល់ថា ជាការដាក់ចំៗមកកាន់ខ្លួន ទើបតបតដោយបែបនេះ។

មហាជន បានជ្រាបរួចមកហើយ ចំពោះជម្លោះរវាងកំពូលតារាចម្រៀងរ៉េបល្បីប្រចាំប្រទេស Vannda និង G-Devith ដែលកន្លងមក បានធ្វើឱ្យវិស័យចម្រៀងរ៉េបមានកម្តៅខ្លាំង តាមរយៈការតបតគ្នាដោយចម្រៀង។ ប៉ុន្តែជម្លោះមុន បានស្ងប់រលុតមួយរយៈ ក្រោយមានការស្នើនិងផ្សះផ្សាររបស់សិល្បការិនីល្បីឈ្មោះ ក្នុងកម្មវិធីមង្គលរបស់ស្រីនា និង លោក ហេង វិសាល កាលពីថ្ងៃទី២៨ ខែមីនា ឆ្នាំ២០២៤ ។

ទោះមានការចាប់ដៃគ្នានៅគ្រានោះ តែបើកទំព័រឆ្នាំថ្មី ជម្លោះថ្មីរវាងអ្នកទាំងពីរ ក៏មានកម្តៅឡើងជាថ្មី ខណៈអ្នកគាំទ្របានឈរខាង idol រៀងខ្លួន។ ជុំវិញសង្គ្រាមឌឺដងគ្នានេះដែរ អ្នកសិល្បៈ ក៏ដូចជាបុគ្គលល្បីឈ្មោះជាច្រើន បានចេញមករៀបរាប់គុណសម្បត្តិនៃផ្កាយទាំងពីរដួងនេះ និងសង្ឈឹមថាអ្នកទាំងពីរនឹងមិនវិលទៅរកវេលា Disstrack គ្នាជាថ្មី៕

The post មិនទាន់រំសាយចិត្ត! G-Devith ប្រកាសបញ្ចេញបទ Disstrack មួយទៀត ស្អែកនេះ appeared first on Kampuchea Thmey Daily.