រដ្ឋមន្ត្រីពាណិជ្ជកម្មបដិសេធ កម្ពុជាដាក់ពន្ធអាមេរិក ៩៧%

នៅថ្ងៃទី ០៣ ខែមេសា ឆ្នាំ ២០២៥ លោក ដូណាល់ ត្រាំ ប្រធានាធិបតីសហរដ្ឋអាមេរិកបានប្រកាសដំឡើងពន្ធបន្ថែមទៅលើប្រទេស ដែលសហរដ្ឋអាមេរិកមានឱនភាពពាណិជ្ជកម្មជាមួយ។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានលើកឡើងនៅថ្ងៃទី ០៣ ខែមេសា ឆ្នាំ ២០២៥ នេះថា នៅពេលដែលតុល្យភាពនៃជញ្ជីងពាណិជ្ជកម្មមិនស្មើគ្នា លោក ដូណាល់ ត្រាំបានដាក់ចេញការដំឡើងពន្ធ ដើម្បីឱ្យមានលំនឹងជញ្ជីងពាណិជ្ជកម្ម ក្នុងនោះកម្ពុជា ជាប្រទេសនាំចូលផលិតផលដ៏លេចធ្លោមួយទៅសហរដ្ឋអាមេរិក។

ហេតុអ្វីកម្ពុជាទទួលរងនូវពលដល់ទៅ ៤៩% ពីអាមេរិក? តើកម្ពុជាពិតជាបានដាក់ពន្ធទៅលើផលិតផលនាំចូលទំនិញពីសហរដ្ឋអាមេរិកដល់ ៩៧% មែនទេ? 

លោកស្រី ចម និម្មល បានលើកឡើងថា កម្ពុជា ជាសមាជិករបស់អង្គការពាណិជ្ជកម្មពិភពលោក (WTO) ក៏ដូចគ្នាទៅនឹងសហរដ្ឋអាមេរិក និងប្រទេស១៦៦ ផ្សេងទៀត ដែលសុទ្ធតែជាសមាជិក WTO ដែលមានការកំណត់បន្ទាត់ពន្ធគយជាមួយគ្នា។

លោកស្រីបានបញ្ជាក់ឱ្យដឹងថា កម្ពុជាបានកំណត់កាតព្វកិច្ចរបស់ខ្លួន គឺការយកពន្ធផលិតផលនាំចូល មិនថាផលិតផលរបស់សហរដ្ឋអាមេរិក ឬក៏ផលិតផលរបស់ប្រទេសជាដៃគូពាណិជ្ជកម្មផ្សេងៗ គឺមានចន្លោះពី ០ ដល់ ៣៥%។​ នៅក្នុងឆ្នាំ ២០២៤ ការនាំចូលផលិតផលរបស់អាមេរិកមក​កម្ពុជាមានទំហំប្រមាណជិត ៣០០ លានដុល្លារ។

បើតាមលោកស្រីរដ្ឋមន្ត្រី៖ «បន្ទាត់ពន្ធខ្ពស់បំផុតដែលយើងមានផលិតផលរបស់អាមេរិកមកកម្ពុជា គឺមានត្រឹមតែ ២៩,៤%  បានន័យថា ទាបជាង ៣៥% ដែលជាបន្ទាត់ពន្ធខ្ពស់បំផុតដែលយើងមាន»។

លោកស្រី ចម និម្មល បានបន្ថែមថា៖ «ប្រទេសកម្ពុជាដូចជាប្រទេសអភិវឌ្ឍតិចតួចផ្សេងៗទៀត គឺតែងតែមានអតិរេកនៃការនាំចេញរបស់ខ្លួន ទៅប្រទេសដែលមានសេដ្ឋកិច្ចធំៗ ពីព្រោះអី ទី១ គឺដោយសារថា ទំហំនៃកម្លាំងបញ្ជាទិញ ពិតណាស់ទីផ្សារអាមេរិក មានប្រជាពលរដ្ឋរហូតទៅដល់ ៣៤០ លាននាក់ ហើយកម្ពុជាយើងមានតែ ១៧ លាននាក់ អញ្ចឹងច្បាស់ណាស់ថា តម្រូវការ ការបញ្ជាទិញពីសហរដ្ឋអាមេរិកមកលើផលិតផលដែលកម្ពុជាអាចផលិតបានចូលទៅទីផ្សាររបស់ខ្លួននោះ គឺពិតណាស់មានចំនួនច្រើន ដូច្នេះហើយថាតើកម្ពុជាមាន ១៧ លាននាក់មានលទ្ធភាពបញ្ជាទិញផលិតផលអាមេរិកវិញបានប៉ុន្មាន។ នេះហើយដែលសំដៅឱ្យឃើញថា ទីផ្សារដ៏ធំរបស់សហរដ្ឋអាមេរិក គឺជាទីផ្សារដែលបានស្រូបទាញផលិតកម្មរបស់យើងមិនថាផលិតផលកាត់ដេរ សម្លៀកបំពាក់ និងស្បែកជើង និងផលិតផលផ្សេងៗទៀត»។

ដោយសារតែទំហំនៃការបញ្ជាទិញនេះហើយ ដែលយើងឃើញថា ជញ្ជីងពាណិជ្ជកម្មកម្ពុជា មានអតិរេក ឬក៏ប្រទេសអភិវឌ្ឍន៍តិចតួចដ៏ទៃទៀត មិនថានៅក្នុងតំបន់ និងពិភពលោក គឺសុទ្ធតែមានអតិរេកដូចៗគ្នា ជាមួយសហរដ្ឋអាមេរិក។

លោកស្រីរដ្ឋមន្ត្រីបន្តថា ជាការពិតនៅពេលដែលដំឡើងបន្ទាត់ពន្ធគយ ដំឡើងនូវអត្រាពន្ធទៅលើផលិតផលនៃការនាំចេញ។ ផលិតផលតែកាលណាថែមពន្ធ ផលិតផលនឹងឡើងថ្លៃ ហើយវានឹងឡើងថ្លៃនៅប្រទេសគោលដៅដែលជាប្រទេសនាំចូល ដូច្នេះការដំឡើងពន្ធបន្ថែម គឺមានន័យថា ប្រជាជននៅសហរដ្ឋអាមេរិកលោកជាអ្នកបញ្ជាទិញផលិតផលពីកម្ពុជានោះ គឺលោកជាអ្នកប៉ះពាល់ដំបូង ហើយផលប៉ះពាល់បន្ទាប់គឺនៅលើកម្ពុជា ពិសេសអ្នកដែលធ្វើធុរកិច្ចនៅក្នុងវិស័យសំខាន់ៗទាំងប៉ុន្មាននៅក្នុងវិស័យវាយនភណ្ឌ។

លោក ស្រី ចម និម្មល បន្ថែមថា៖«តួលេខដែលយើងទទួលបាន មានន័យថា ភាគីសហរដ្ឋអាមេរិកបានយកទំហំពាណិជ្ជកម្មរួមរបស់យើង ដកនឹងតួលេខឱនភាពដែលអាមេរិកមានជាមួយកម្ពុជា អញ្ចឹងហើយបានជាឃើញថា លេខនោះមានន័យថា ៩៧% នៃទំហំពាណិជ្ជកម្មរួមទ្វេភាគី គឺជាផលិតផលនាំចេញពីកម្ពុជាទៅទីផ្សារអាមេរិក ហើយ ៣% ទៀត គឺជាទំហំនៃផលិតផលរបស់អាមេរិកចូលមកទីផ្សារកម្ពុជាវិញ»។

លោកស្រី ចម និម្មល ពន្យល់ថា ស្ដាប់ទៅ ៤៩% សម្រាប់កម្ពុជាខ្ពស់ណាស់ ហេតុអ្វីកម្ពុជាខ្ពស់ជាងគេ ពីព្រោះ ឱនភាពដែលជញ្ជីងពាណិជ្ជកម្មវាមាន ៩៧% និង ៣% គឺវាធំ អញ្ចឹងហើយបើយើងគិតអំពីភាគរយឃើញខ្ពស់ តែបើយើងគិតជាតម្លៃនៃទំហំទឹកប្រាក់វិញ គឺមិនខ្ពស់ទេ គឺនៅក្នុងកម្រិតមួយទាប បើប្រៀបធៀបជាមួយនិងប្រទេសក្នុងតំបន់ និងដៃគូផ្សេងៗទៀតរបស់អាមេរិនៅលើសកលលោក។

ពាក់ព័ន្ធនឹងបញ្ហានេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានដាក់នូវវិធានការជាបន្ទាន់ ឱ្យលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ និងវិស័យឯកជន ក្នុងការចូលរួមសិក្សា និងលើកយោបល់ជូនសម្ដេច ដើម្បីរៀបចំវិធានការឆ្លើយតប ហើយទិសដៅធំជំរុញពាណិជ្ជកម្មកម្ពុជា មិនថាជាមួយអាមេរិក និងដៃគូពាណិជ្ជកម្មផ្សេងៗ ទិសដៅធំគឺបន្តធ្វើពិពិធកម្ម និងការសហការជាមួយគ្នានៅក្នុងមូលដ្ឋាននៃពាណិជ្ជកម្មអន្តរជាតិ ដោយមានច្បាប់ និងមានភាពច្បាស់លាស់។

លោកស្រី ចម និម្មល បញ្ជាក់ថា ការដំឡើងពន្ធរបស់លោកដូណាល់ ត្រាំ គឺជាវិធានការសេដ្ឋកិច្ច ដែលលោកព្យាយាមធ្វើតុល្យភាពជញ្ជីងពាណិជ្ជកម្មរបស់ខ្លួន ជាមួយដៃគូទាំងអស់នៅលើពិភពលោក មិនមែនតែកម្ពុជានោះទេ។ លោកស្រីអំពាវនាវដល់សាធារណៈជនទាំងអស់កុំឱ្យមានការព្រួយបារម្ភ ឬសង្ស័យចំពោះដំណោះស្រាយចំពោះមុខ ខណៈប្រមុខរាជរដ្ឋាភិបាលបានយកចិត្តទុកដាក់ខ្ពស់។ សូមឱ្យពលរដ្ឋទុកចិត្តលើរាជរដ្ឋាភិបាលក្នុងការពារអត្ថប្រយោជន៍របស់ប្រជាពលរដ្ឋ ក៏ដូចជាកម្មករកម្មការិនី ពិសេសនៅក្នុងឧស្សាហកម្មដែលលេចធ្លោ៕

អត្ថបទ៖ ឡេង ដេត

The post រដ្ឋមន្ត្រីពាណិជ្ជកម្មបដិសេធ កម្ពុជាដាក់ពន្ធអាមេរិក ៩៧% appeared first on Kampuchea Thmey Daily.