ព្រឹត្តិការណ៍«សាទរកម្ពុជា» ជាការបង្ហាញឱ្យឃើញពីកត្តាសន្តិភាពរបស់ប្រទេស

ព្រឹត្តិការណ៍ «សាទរ​កម្ពុជា» គឺជា​ការ​បង្ហាញ​ឱ្យ​ឃើញ​យ៉ាង​ច្បាស់​ពី​កត្តា​មាន​សុខ​សន្តិភាព​ពេញ​លេញ​របស់​ប្រទេសជាតិ​នា​យុគសម័យ​បច្ចុប្បន្ន​នេះ។

ការ​រៀបចំ​តុបតែង​ត្រៀម​សម្រាប់​ព្រឹត្តិការណ៍ «សាទរ​កម្ពុជា» បាន​ធ្វើ​ឱ្យ​ប្រជាពលរដ្ឋ​មាន​ការ​ចាប់​អារម្មណ៍​ច្រើន និង​ប្លែក​ភ្នែក ដែល​វា​ជា​ព្រឹត្តិការណ៍​មិន​ដែល​មាន​នៅ​រាជធានី​ភ្នំពេញ។ ទៀតសោត ព្រឹត្តិការណ៍​ដ៏​អស្ចារ្យ​នេះ នឹង​ធ្វើឡើង​ចំ​ថ្ងៃ​ឆ្លង​ឆ្នាំ​តែម្ដង ដែល​ជា​ពេលវេលា​មួយ​ល្អ អាច​នឹង​មាន​ប្រជាពលរដ្ឋ​ចូលរួម​ទស្សនា​កម្សាន្ត​បាន​ដោយ​ភាព​អធិកអធម។

ប្រជាពលរដ្ឋ មើល​ឃើញ​យ៉ាង​ច្បាស់​ថា ព្រោះតែ​កត្តា​សុខ​សន្តិភាព​នេះ​ហើយ ទើប​កម្ពុជា​អាច​ប្រារព្ធ​នូវ​ព្រឹត្តិការណ៍​ធំ​ជា​ច្រើន​ឡើង​មក​បាន បើ​គ្មាន​សន្តិភាព គឺ​គ្មាន​អ្វីៗ គ្រប់យ៉ាង​នោះ​ទេ។

ប្រជាពលរដ្ឋ បាន​បន្ត​លើក​ឡើង​ថា នាំគ្នា​ចូលរួម​ក្នុង​ព្រឹត្តិការណ៍ ដើម្បី​មើល​ពី​ទិដ្ឋភាព​ទូទៅ​ផ្សេង ដែល​បង្ហាញ​ពី​វប្បធម៌ និង​របស់​បុរាណៗ។

សូម​បញ្ជាក់​ថា «​សាទរ​កម្ពុជា​» ជា​ព្រឹត្តិការណ៍​អបអរសាទរ​សង្គម និង​គុណ​តម្លៃ​រួមគ្នា ដែល ស.ស.យ.ក ធ្វើឡើង ដើម្បី​បង្ហាញ​មោទនភាព​ចំពោះ​សមិទ្ធផល នៃ​ការ​អភិវឌ្ឍ​សង្គម​សេដ្ឋកិច្ច និង​ផ្សារភ្ជាប់​ប្រជាជន​ទៅ​សង្គមជាតិ តាមរយៈ​កម្មវិធី​នានា។ ព្រឹត្តិការណ៍​សាទរ​នេះ នឹង​ធ្វើ​ឡើង​នា​ថ្ងៃ​ទី ៣១ ខែ​ធ្នូ នៅ​តាម​សួនច្បារ​ប្រប​មាត់​ទន្លេ​ចតុមុខ។

ព្រឹត្តិការណ៍​នេះ នឹង​រៀបចំ​ឡើង​ដោយ​មាន​ការ​តាំង​លម្អ រចនា​តុបតែង និង​ផ្សារភ្ជាប់​គំនិត​ច្នៃប្រឌិត​បុរាណ និង​សហ​សម័យ នៅ​បរិវេណ​ព្រះបរមរាជវាំង។ ក្រៅពី​នេះ ក៏​មាន​ក្បួន​ដង្ហែ​សាទរ​កម្ពុជា ដែល​មាន​អ្នក​ចូលរួម​ប្រមាណ ៣ ០០០ នាក់ ការ​សម្ដែង​ទស្សនីយភាព​វប្បធម៌ និង​កីឡា​ជាដើម៕

អត្ថបទ ៖ សុភា

The post ព្រឹត្តិការណ៍«សាទរកម្ពុជា» ជាការបង្ហាញឱ្យឃើញពីកត្តាសន្តិភាពរបស់ប្រទេស appeared first on Kampuchea Thmey Daily.