ថៃ បារម្ភថា ភ្លៀងធ្លាក់ខ្លាំងដូចហែកមេឃ អាចបង្កជាទឹកជំនន់ធំ ដូចឆ្នាំ២០១១

ប្រទេសថៃកំពុងបារម្ភថា ភ្លៀងធ្លាក់ដូចហែកមេឃនាពេលថ្មីៗនេះ កំពុងទាញស្ថានការណ៍ឲ្យដូចទៅនឹងឆ្នាំ២០១១ ដែលជាឆ្នាំកើតទឹកជំនន់ធំ បង្កទុក្ខលំបាកដល់ប្រជាជន។

កាលពីឆ្នាំ២០១១ ប្រទេសថៃជួបទឹកធំដោយសារឥទ្ធិពលព្យុះភ្លៀងមូសុង បណ្តាលឲ្យមនុស្សស្លាប់ជាង៨០០នាក់ និងប៉ះពាល់ពលរដ្ឋជាង១៣លាននាក់ និងឈានដល់ការប្រកាសអាសន្ននៅខេត្តចំនួន៦០។ 

យ៉ាងណាឆ្នាំនេះ បាតុភូតព្យុះភ្លៀងមូសុងបានវាយប្រហារប្រទេសថៃសាជាថ្មី ដោយទិន្នន័យគិតចាប់ពីថ្ងៃទី១-១៤ខែឧសភាបង្ហាញថា ទីក្រុងបាងកក មានភ្លៀងធ្លាក់ឈានដល់កម្រិត១៨៨.៥មិល្លីម៉ែត្រ  ពោលគឺកើនឡើង ៩៥% បើធៀបនឹងកម្រិតទឹកភ្លៀងជាមធ្យមរយៈពេល៣០ឆ្នាំ ដែលកត់ត្រាដោយនាយកដ្ឋានលូនិងប្រព័ន្ធលូនៃប្រទេសថៃ។

សាស្ត្រាចារ្យ Seree Supratid នាយកមជ្ឈមណ្ឌលបម្រែបម្រួលអាកាសធាតុនិងគ្រោះមហន្តរាយ នៃសាកលវិទ្យាល័យ Rangsit បានឲ្យដឹងថា ដោយសារបាតុភូត La Niña ធ្វើឲ្យអាកាសធាតុនិងរដូវប្រែប្រួលមិនអាចស្មានដឹង។ ភ្លៀងធ្លាក់យ៉ាងគំហុក ក្លាយជាគំរូអាកាសធាតុមួយទៀត ដែលមិនអាចទាយទុកជាមុនបាន ហើយបង្ហាញពីបញ្ហាប្រឈមនៃភ្លៀងធ្លាក់ខ្លាំងក្នុងរយៈពេលដ៏ខ្លីដែលពិបាកនឹងព្យាករ។លោក​​បន្ត​ថា បរិមាណ​ទឹកភ្លៀង​ជា​មធ្យម​ត្រឹមមួយ​ខែ​ឧសភា គឺ​មាន​កម្រិត ២១៤មិល្លីម៉ែត្រ ដែល​ខ្ពស់​ជាងកម្រិតមធ្យម​ក្នុង​រយៈពេល៣០ឆ្នាំ​កន្លងមកនេះ បាត់ទៅហើយ។

ទោះបីជាយ៉ាងណាក៏ដោយ ជាវិធានការបង្ការ ថៃ បានរៀបចំប្រព័ន្ធលូនិងធារាសាស្រ្តទូទាំងប្រទេស ជាពិសេសក្នុងរាជធានីបាងកកតែម្តង ដើម្បីធានាថា ស្ថានភាពនឹងមិនអាក្រក់ដូចឆ្នាំ២០១១នោះទេ។

សូមជម្រាបថា ក្រៅពីសម្លាប់មនុស្ស, ទឹកជំនន់ឆ្នាំ២០១១នៅប្រទេសថៃ គឺស្ថិតក្នុងចំណោមគ្រោះមហន្តរាយធម្មជាតិដែលបង្កការខាតបង់ទឹកប្រាក់ច្រើនបំផុតលើពិភពលោកនាពេលនោះ ដោយបំផ្លាញសេដ្ឋកិច្ចថៃ ក្នុងទំហំទឹកប្រាក់ ៤៥ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ ថៃ ប្រញាប់ពិនិត្យទំនប់ទឹក ១១កន្លែងក្រោយរញ្ជួយដី ៤.៥រ៉ិចទ័រ

The post ថៃ បារម្ភថា ភ្លៀងធ្លាក់ខ្លាំងដូចហែកមេឃ អាចបង្កជាទឹកជំនន់ធំ ដូចឆ្នាំ២០១១ appeared first on Kampuchea Thmey Daily.