ឆ្នាំ ២០២៤ រដ្ឋប្រមូលចំណូលចាក់ចូលថវិកាជាតិបានប្រមាណ ៩០ លានដុល្លារ ពីអាជីវកម្មរ៉ែថ្មអារ
រដ្ឋាភិបាលបានប្រមូលចំណូលពីវិស័យធនធានរ៉ែថ្មអាបានប្រមាណ ៩០ លាន..... The post ឆ្នាំ ២០២៤ រដ្ឋប្រមូលចំណូលចាក់ចូលថវិកាជាតិបានប្រមាណ ៩០ លានដុល្លារ ពីអាជីវកម្មរ៉ែថ្មអារ appeared first on Kampuchea Thmey Daily.
បើតាមមន្ត្រីអគ្គនាយកដ្ឋានធនធានរ៉ែបានឲ្យដឹងថា នៅឆ្នាំ ២០២៤ រដ្ឋាភិបាលបានប្រមូលចំណូលពីវិស័យធនធានរ៉ែថ្មអាបានប្រមាណ ៩០ លានដុល្លារចាក់ចូលក្នុងថវិកាជាតិ។
លោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែបានគូសបញ្ជាក់ថា វិស័យរ៉ែថ្មអារបាននាំចំណូលមិនមែនសារពើពន្ធចូលថវិកាជាតិបានប្រមាណជិត ៩០ លានដុល្លារអាមេរិកនៅឆ្នាំ ២០២៤។
លោកបន្តថា វិស័យថ្មអារបានរួមចំណែកជាកម្លាំងចលករមួយដ៏សំខាន់សម្រាប់ចំណូលថវិកាជាតិ តាមរយៈការបង់ពន្ធសួយសារអាករ រួមទាំងពន្ធនាំចេញ។
ទាក់ទងការធ្វើអាជីវកម្មរ៉ែថ្មអារ អគ្គនាយកដ្ឋានធនធានរ៉ែបានបញ្ជាក់ថា ក្រុមហ៊ុនដែលអាចធ្វើអាជីវកម្មរ៉ែថ្មអាបានត្រូវមានទុនវិនិយោគខ្ទង់លានដុល្លារ ទើបអាចដំណើរការប្រតិបត្តិការខ្សែសង្វាក់ផលិតកម្មឧស្សាហកម្មធុនធ្ងន់នេះ ដោយសារការដំណើរការអាជីវកម្មវិស័យរ៉ែថ្មអារ ត្រូវការបច្ចេកទេសជាមួយបទពិសោធន៍ រួមទាំងមានស្ថិរភាពហិរញ្ញវត្ថុដ៏រឹងមាំ។
ទិន្នន័យពីក្រសួងរ៉ែ និងថាមពលបង្ហាញថា នៅប្រទេសកម្ពុជាបច្ចុប្បន្នមានក្រុមហ៊ុនជាង ៧០ កំពុងធ្វើអាជីវកម្មរ៉ែថ្មអារនៅ ១១ ខេត្ត ខណៈនៅខេត្តក្រចេះជាមូលដ្ឋានដ៏ធំដែលមានក្រុមហ៊ុនប្រមាណ ២០ កំពុងធ្វើអាជីវកម្មរ៉ែថ្មអាច្រើនជាងគេដើម្បីកែច្នៃនាំចេញទៅក្រៅប្រទេស។
ពាក់ព័ន្ធវិស័យអាជីវកម្មថ្មអារ លោកស្រី ឡេង ដាវី អនុប្រធានសមាគមថ្មអារគូសបញ្ជាក់ថា ស្ទើរតែ៩០% នៃផលិតផលរ៉ែថ្មអារដែលកែច្នៃក្នុងប្រទេសកម្ពុជា ត្រូវបាននាំចេញទៅក្រៅប្រទេស។
យ៉ាងណាមិញ កន្លងទៅដោយសារវិបត្តិសេដ្ឋកិច្ចសាកលបានធ្វើឲ្យតម្រូវការថ្មអារធ្លាក់ចុះ ដែលនាំឲ្យអាជីវកម្មរ៉ែថ្មអារនៅក្នុងប្រទេសកម្ពុជា ស្ទើរតែឈានទៅរកការដួលរលំ។
បើតាមលោកស្រី ឡេង ដាវី ការចេញមុខជួយសង្រ្គោះទាន់ពេលវេលារបស់រដ្ឋាភិបាល បានជួយស្រោចស្រង់ស្ថានភាពឧស្សាហកម្មថ្មអារក្នុងប្រទេសកម្ពុជាឲ្យរស់រានឡើងវិញ តាមរយៈការដាក់ចេញចំណាត់ការរបស់រដ្ឋាភិបាលក្នុងការបន្ធូរបន្ថយពន្ធ រួមទាំងការសម្រួលនីតិវិធីនាំចេញ ដែលបានជួយឲ្យអាជីវកម្មរ៉ែថ្មអារដែលស្ទើរតែដួលរលំទៅហើយនោះមានសន្ទុះរីកចម្រើនឡើងវិញ ដែលកើនដល់ ៤ ដង គិតដល់ឆ្នាំ២០២៤។
បន្ថែមពីនេះ ប្រមុខរដ្ឋាភិបាលបានណែនាំឲ្យមានការសហការគ្នារវាងក្រសួង ស្ថាប័នពាក់ព័ន្ធនានា ជាមួយសមាគមថ្មអារកម្ពុជាដើម្បីធ្វើឲ្យអាជីវកម្មរ៉ែថ្មអារកាន់តែរីកចម្រើន កុំឲ្យមានការបិទ រឺផ្អាក ដែលនាំឲ្យប៉ះពាល់ដំណើរការអាជីវកម្មវិស័យថ្មអារនៅក្នុងប្រទេសកម្ពុជា៕
The post ឆ្នាំ ២០២៤ រដ្ឋប្រមូលចំណូលចាក់ចូលថវិកាជាតិបានប្រមាណ ៩០ លានដុល្លារ ពីអាជីវកម្មរ៉ែថ្មអារ appeared first on Kampuchea Thmey Daily.
