ចិនថ្កោលទោសពន្ធ ត្រាំ នៅ WTO និងព្រមានពីការធ្លាក់ចុះសេដ្ឋកិច្ចសកល
ចិនបានថ្កោលទោសវិធានការ និងការគំរាមកំហែងពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ នៅក្នុងកិច្ចប្រជុំរបស់អង្គការពាណិជ្ជកម្មពិភពលោក (WTO)។ The post ចិនថ្កោលទោសពន្ធ ត្រាំ នៅ WTO និងព្រមានពីការធ្លាក់ចុះសេដ្ឋកិច្ចសកល appeared first on Kampuchea Thmey Daily.
ប្រទេសចិនបានថ្កោលទោសវិធានការ និងការគំរាមកំហែងពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ នៅក្នុងកិច្ចប្រជុំរបស់អង្គការពាណិជ្ជកម្មពិភពលោក (WTO) កាលពីថ្ងៃអង្គារ ដោយព្រមានថា «ផលប៉ះពាល់ធ្ងន់ធ្ងរភ្លាមៗនៃពន្ធ» អាចគំរាមកំហែងដល់ប្រព័ន្ធពាណិជ្ជកម្ម និងប្រថុយនឹងការធ្លាក់ចុះនៃសេដ្ឋកិច្ចសកល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ឯកអគ្គរដ្ឋទូតចិនប្រចាំ WTO លោក Li Chenggang បាននិយាយក្នុងកិច្ចប្រជុំបិទទ្វារនៅ WTO ថា៖ «ផលប៉ះពាល់ធ្ងន់ធ្ងរភ្លាមៗនៃពន្ធគយទាំងនេះ បង្កើនភាពមិនច្បាស់លាស់នៃសេដ្ឋកិច្ច រំខានដល់ពាណិជ្ជកម្មពិភពលោក បង្កហានិភ័យអតិផរណាក្នុងស្រុក បង្ខូចទ្រង់ទ្រាយទីផ្សារ ឬអាចឈានទៅដល់សូម្បីតែការធ្លាក់ចុះនៃសេដ្ឋកិច្ចពិភពលោក»។ នេះបើយោងតាមឯកសារផ្ញើទៅកាន់រ៉យទ័រ។
លោកបន្តថា៖ «កាន់តែអាក្រក់ទៅទៀត គោលការណ៍ឯកតោភាគីនិយមរបស់សហរដ្ឋអាមេរិក គំរាមកំហែងដល់ការពង្រឹងប្រព័ន្ធពាណិជ្ជកម្មពហុភាគីដែលមានមូលដ្ឋានលើច្បាប់»។
គួរគូសបញ្ជាក់ថា លោក ត្រាំ បានប្រកាសដាក់ពន្ធបន្ថែមថ្មី ១០ ភាគរយ លើគ្រប់មុខទំនិញនាំចូលពីចិន ហើយជាការឆ្លើយតប ចិនបានចេញវិធានការពន្ធវាយបក និងដាក់ពាក្យបណ្ដឹងទៅ WTO ដើម្បីប្រឆាំងជំទាស់។
ការពិភាក្សារបស់ WTO ដែលបានចាប់ផ្តើមកាលពីល្ងាចថ្ងៃអង្គារ គឺជាលើកទី១ហើយដែលភាពតានតឹងជម្លោះពាណិជ្ជកម្ម ត្រូវបានដោះស្រាយជាផ្លូវការក្នុងរបៀបវារៈនៃស្ថាប័នធ្វើការសម្រេចចិត្តកំពូលរបស់ WTO គឺក្រុមប្រឹក្សាទូទៅ។
គេមិនទាន់ដឹងច្បាស់ថា តើប្រទេសផ្សេងទៀត រួមទាំងសហរដ្ឋអាមេរិក ដែលមិនទាន់មានឯកអគ្គរដ្ឋទូតពាណិជ្ជកម្ម នៅទីក្រុងហ្សឺណែវ នឹងឆ្លើយតបយ៉ាងណាចំពោះបញ្ហានេះ។
រហូតមកដល់ពេលនេះ អគ្គនាយក WTO អ្នកស្រី Ngozi Okonjo-Iweala បានជំរុញឱ្យប្រទេសសមាជិកទាំង ១៦៦ របស់ WTO ចៀសវាងការសងសឹកក្នុងករណីរងវិធានពន្ធគយ ដើម្បីជៀសវាង «សង្គ្រាមពាណិជ្ជកម្មដ៏មហន្តរាយ»។
បើតាមរ៉យទ័រ ប្រតិភូពាណិជ្ជកម្ម WTO បាននិយាយមុនពេលកិច្ចប្រជុំថា ពួកគេមិនរំពឹងថានឹងមានលទ្ធផលភ្លាមៗពីកិច្ចប្រជុំនោះទេ ប៉ុន្តែប្រតិកម្មរបស់ប្រទេសនានា អាចបង្ហាញពីលទ្ធភាពនៃសង្គ្រាមពាណិជ្ជកម្ម ដើម្បីឆ្លើយតបទៅនឹងវិធានការពន្ធ ដែលសហរដ្ឋអាមេរិកបានគ្រោងទុក។
គួរំឭកថា ក្រៅពីចិន លោក ត្រាំ បានប្រកាសដាក់ពន្ធ ២៥ ភាគរយ លើទំនិញម៉ិកស៊ិក និងកាណាដា ប៉ុន្តែត្រូវពន្យារពេល ១ ខែសិន ក្រោយចរចាគ្នា។ ប៉ុន្តែលោកក៏គំរាមកំហែងដាក់ពន្ធលើប្រទេសផ្សេងៗទៀតផងដែរ ជាពិសេសប្រទេសដែលមានអតិរេកពាណិជ្ជកម្មច្រើនជាមួយប្រទេសអាមេរិក ក៏ដូចជាប្រទេសដែលដាក់ពន្ធលើទំនិញអាមេរិក។
ខណៈគេឃើញមានប្រទេសមួយចំនួនប្រឹងចរចាជាមួយរដ្ឋបាល ត្រាំ ប្រទេសមួយចំនួន រួមទាំងប្លុកសហភាពអឺរ៉ុប ក៏ព្រមានវាយបកលើអាមេរិកវិញផងដែរ ប្រសិនបើ ត្រាំ នឹងអនុវត្តពន្ធលើពួកគេពិតមែន។ អ្នកជំនាញមើលឃើញថា ការណ៍នេះនឹងធ្វើឱ្យពាណិជ្ជកម្មសកលធ្លាក់ចុះ៕
The post ចិនថ្កោលទោសពន្ធ ត្រាំ នៅ WTO និងព្រមានពីការធ្លាក់ចុះសេដ្ឋកិច្ចសកល appeared first on Kampuchea Thmey Daily.
