កុំឱ្យកកស្ទះចរាចរណ៍ពលរដ្ឋ នាយករដ្ឋមន្ត្រីឱ្យពិនិត្យឡើងវិញការបិទផ្លូវ ពេលក្បួនឆ្លងកាត់

ដើម្បីបញ្ចៀសការកកស្ទះចរាចរណ៍ប្រជាពលរដ្ឋយូរ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យកម្លាំងមានសមត្ថកិច្ចពិនិត្យឡើងវិញរាល់ការបិទផ្លូវ នៅពេលក្បួនថ្នាក់ដឹកនាំឆ្លងកាត់ រួមទាំងក្បួនរបស់សម្ដេច ដោយធ្វើយ៉ាងណាសម្រួលឱ្យលំហូរចរាចរណ៍របស់ពលរដ្ឋអាចធ្វើដំណើរបានជាធម្មតា។

ការបិទផ្លូវនេះដែរ សម្ដេចធិបតី នាយករដ្ឋមន្ត្រី បានបញ្ជាឱ្យបើកផ្លូវ ហើយផ្ដល់អាទិភាពឱ្យរថយន្តសង្គ្រោះបន្ទាន់អាចធ្វើដំណើរលើផ្លូវដែលត្រូវបិទជាបន្ទាន់ ព្រោះអាយុជីវិតអ្នកជំងឺសំខាន់ជាង។ តាមរយៈសារសំឡេង នារសៀលថ្ងៃទី០៩ ខែមីនា ឆ្នាំ២០២៥នេះ សម្ដេចធិបតី ហ៊ុន ម៉ាណែត លើកឡើងថា ទោះជាយ៉ាងនេះក្តី ការអនុវត្តភារកិច្ចនេះ គឺប្រកបដោយភាពបត់បែនទៅតាមករណីចាំបាច់នីមួយៗ ជាពិសេសករណីពាក់ព័ន្ធជាមួយការសង្គ្រោះអាយុជីវិតរបស់ប្រជាពលរដ្ឋ ជាកិច្ចការដែលត្រូវខិតខំបន្តរួមគ្នាដោះស្រាយ ដើម្បីកាត់បន្ថយផលប៉ះពាល់ដល់ប្រជាពលរដ្ឋ។

សម្ដេចធិបតី បន្តថា ការបំពេញភារកិច្ចតាមតួនាទីការពារសុវត្ថិភាពជូនថ្នាក់ដឹកនាំជាតិ និងអន្តរជាតិ គឺគប្បីមានការធានាតុល្យភាពរវាងកិច្ចការពារសុវត្ថិភាពថ្នាក់ដឹកនាំ ជាមួយនឹងការសម្រួលសកម្មភាពចរាចរណ៍ជូនប្រជាពលរដ្ឋនៅក្នុងតំបន់ការពារសុវត្ថិភាពមួយចំនួន។ ក្នុងន័យនេះ សម្ដេច សុំការយោគយល់អំពីប្រជាពលរដ្ឋ ដែលបើទោះបីជាសមត្ថកិច្ចខិតខំប្រឹងប្រែងកាត់បន្ថយផលប៉ះពាល់ជាអតិបរមាយ៉ាងណាក៏ដោយ ក៏ពេលខ្លះមិនអាចជៀសផុតពីការរំខានដល់លំហូរចរាចរណ៍រយៈពេលខ្លីនៅតាមផ្លូវសាធារណៈមួយចំនួននោះទេ។

សម្ដេចធិបតី នាយករដ្ឋមន្ត្រី បានអរគុណសមត្ថកិច្ចទាំងអស់ ពិសេសនគរបាលចរាចរណ៍ដែលបានខិតខំប្រឹងប្រែងគ្រប់ពេលវេលា ដើម្បីធានានូវសុវត្ថិភាព និងសណ្ដាប់ធ្នាប់ចរាចរណ៍តាមបណ្តោយដងផ្លូវសាធារណៈនៅទូទាំងប្រទេស ជាពិសេសនៅរាជធានីភ្នំពេញ ដែលមានប្រជាជនច្រើនហើយសកម្មភាពសេដ្ឋកិច្ចក៏រស់រវើកខ្លាំង៕

The post កុំឱ្យកកស្ទះចរាចរណ៍ពលរដ្ឋ នាយករដ្ឋមន្ត្រីឱ្យពិនិត្យឡើងវិញការបិទផ្លូវ ពេលក្បួនឆ្លងកាត់ appeared first on Kampuchea Thmey Daily.