Orn Richard គ្រោងបន្ថែមកុំព្យូរទ័រ ២០គ្រឿង សម្រាប់ជាថ្នាក់សិក្សាក្នុងបណ្ណាល័យសាធារណៈរបស់ខ្លួន

ក្រោយបើកដំណើរការបណ្ណាល័យ គោប្រាក់ ជាង ១ខែ អ្នកផលិតមាតិកាល្បីឈ្មោះ Orn Richard គ្រោងបន្ថែមកុំព្យូរទ័រ ២០គ្រឿង សម្រាប់ជាថ្នាក់សិក្សាក្នុងបណ្ណាល័យសាធារណៈរបស់ខ្លួន ក្នុងពេលឆាប់ៗនេះ។

តាមរយៈសារលើទំព័រហ្វេសប៊ុកផ្លូវការរបស់បណ្ណាល័យ លោករៀបរាប់ថា មួយរយៈពេលនេះ ខ្លួនពិតជារវល់ខ្លាំងក្នុងការប្តូររូបរាងថ្មីរបស់បណ្ណាល័យ។ លោកបង្ហើបថា “មួយរយៈនេះរវល់ដើម្បី បណ្ណាល័យ – គោប្រាក់ ប្តូររូបរាងថ្មីជាមួយនឹងសៀវភៅសរុប ៩ ៥៥៤ក្បាល បន្ថែមការស្រាវជ្រាវ និងថ្នាក់សិក្សាកុំព្យូរទ័រ ២០គ្រឿង ក្នុងពេលឆាប់ៗ អាចមកអានបានដោយឥតគិតថ្លៃ”។

បណ្ណាល័យសាធារណៈមួយនេះ មិនត្រឹមតែអាចឱ្យយុវជននិងកុមារ ចូលអានសៀវភៅដោយឥតគិតថ្លៃប៉ុណ្ណោះទេ ថែមទាំងមានផ្តល់កន្លែងអានសៀវភៅផងដែរ។ មិនតែប៉ុណ្ណោះ គ្រប់សៀវភៅទាំងអស់ សុទ្ធតែបើកទូលាយឱ្យអ្នកចូលចិត្តអាន អាចខ្ចីយកទៅអានដោយឥតគិតថ្លៃទៀតផង។

យ៉ាងណាមិញ ដើម្បីរួមចំណែកនឹងកិច្ចការសង្គមក្នុងការលើកកម្ពស់ធនធានមនុស្ស លោកនឹងបន្ថែមថ្នាក់សិក្សាបន្ថែមជាកុំព្យូទ័រសរុប ២០គ្រឿង ដែលអាចជាជំនួយដល់ការសិក្សាស្រាវជ្រាវរបស់សាធារណជន ពិសេសយុវជននិងកុមារ។ គម្រោងនេះ ត្រូវបានសាធារណជន ពិសេសអ្នកផលិតមាតិការដូចគ្នា បង្ហាញការកោតស្ញប់ស្ញែងលោកផងដែរ។

គួររំលឹកដែរថា ក្រោយការដើរប្រមូលទិញសៀវភៅពីគ្រប់ទិសទី និងការខិតខំប្រឹងប្រែងក្នុងការគៀរគរឱ្យមានការបរិច្ចាគ បណ្ណាល័យ គោប្រាក់ បានលេចចេញជារូបរាងយ៉ាងពិតប្រាកដ កាលថ្ងៃទី២៦ ខែមេសា ដោយនាំយកនូវចំណេះដឹងដ៏ទូលំទូលាយតាមរយៈសៀវភៅដែលត្រូវបានរៀបចំពេញផ្ទៃនៃបណ្ណាល័យ។ បណ្ណាល័យនេះ មានទីតាំងស្ថិតក្នុងក្រុងសៀមរាប ខេត្តសៀមរាប ចម្ងាយប្រមាណ ៥០០ម៉ែត្រ ពីមន្ទីរពេទ្យគន្ធបុផ្ផាសៀមរាប ។

Orn Richard ជាអ្នកផលិតមាតិកាមួយរូប ដែលតែងចូលរួមក្នុងសកម្មភាពមនុស្សធម៌ផ្សេងៗ ដូចជាការជួយសហគមន៍មនុស្សចាស់ ការជួយជនក្រីក្រ កុមារកំព្រា មន្ទីរពេទ្យ ក៏ដូចជាសាលារៀននៅតំបន់ដាច់ស្រយាលផងដែរ។ ខណៈកាលពីខែកុម្ភៈកន្លងទៅ លោកទើបតែបានបន្ថែម​ផ្ទះជួល​ ២​កន្លែង សម្រាប់​ឱ្យ​និស្សិត​មាន​កន្លែងស្នាក់​នៅ ព្រម​ទាំង​ទិញ​សម្ភារៈសិក្សា​ រួមនិងសម្ភារៈ​ប្រើប្រាស់​ទៅចែកជូន​កុមារ​ៗ​នៅ​ទីជនបទដាច់ស្រយាល​នៃ​ខេត្ត​ពោធិ៍សាត់៕

The post Orn Richard គ្រោងបន្ថែមកុំព្យូរទ័រ ២០គ្រឿង សម្រាប់ជាថ្នាក់សិក្សាក្នុងបណ្ណាល័យសាធារណៈរបស់ខ្លួន appeared first on Kampuchea Thmey Daily.