សម្តេចធិបតី ផ្តាំទៅអ្នកនយោបាយប្រឆាំងក្រៅប្រទេស កុំយកគំនុំ គុំកួន វៃបង្អាប់ប្រទេសខ្លួនឯង

ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត ផ្តាំទៅអ្នកនយោបាយមាននិន្នាការប្រឆាំងនៅក្រៅប្រទេស មុននឹងធ្វើការផ្សព្វផ្សាយព័ត៌មានអ្វីមួយគួរមានភស្តុតាងច្បាស់លាស់ និងគិតប្រយោជន៍ជាតិជាធំ ពោលកុំគិតតែគំនុំ គុំកួនជាមួយរដ្ឋាភិបាល ហើយវៃបង្អាប់ប្រទេសខ្លួនឯង។

សាររបស់សម្តេចធិបតីនាពេលនេះ ដោយសង្កេតឃើញថា​ អ្នកធ្វើនយោបាយប្រឆាំងនៅក្រៅប្រទេស​អង្គុយតែឆ្កឹះរឿងធ្វើឱ្យពលរដ្ឋក្នុងស្រុកមានទោមនស្សជាមួយរដ្ឋាភិបាល ជាពិសេសនោះ វៃបង្អាប់ប្រទេសខ្លួនឯងថែមទៀតផង។ តួយ៉ាង អ្នកធ្វើនយោបាយនៅក្រៅប្រទេស នាពេលថ្មីៗនេះ បានបន្តរិះគន់រដ្ឋាភិបាលពាក់ព័ន្ធការរៀបចំពិធីបុណ្យចូលឆ្នាំខ្មែរ ដែលអនុញ្ញាតឱ្យពលរដ្ឋលេងជះទឹក និងបាតម៉្សៅ ។ បន្ថែមពីនេះ អ្នកទាំងនោះបានចោទប្រកាន់រដ្ឋាភិបាលកម្ពុជា ថាបានលើកប្រទេសទាំងមូលទៅឱ្យប្រទេសចិន ដោយគ្មានមូលដ្ឋានច្បាស់លាស់។

ជុំវិញការចោទប្រកាន់ដដែលៗប្រាសចាកពីការពិត នាឱកាស អញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ កំពង់ផែទេសចរណ៍អន្តរជាតិខេត្តកំពត នាថ្ងសទី ២១ ខែមេសានេះ សម្តេចធិបតី ហ៊ុន ម៉ាណែត បានផ្តាំថា ៖«អ្នកឯង ជេររដ្ឋាភិ​បាលស្មើនឹងជេប្រជាពលរដ្ឋរាប់លាននាក់ នេះហើយគុណធម៌នយោបាយ។ បើអ្នកឯងចង់ជេរ គួរមានពេលវេលាគិតគូរផង កុំយករឿងមួយករណី មកផ្សព្វផ្សាយបង្អាប់ប្រទេសខ្លួនឯង នេះហើយគេហៅថាគុណធម៌ និងសីលធម៌ ក្នុងនាមជាអ្នកនយោបាយ»។

សម្តេចធិបតី បានបន្ថែមទៀតថា អ្នកនយោបាយនៅក្រៅប្រទេស គួរគិតគូរពីរឿងធំ កុំមើលរឿងគំនុំ គំុំកួនមួយជ្រុងតូច ដើម្បីវៃបង្អប់ប្រទេសខ្លួនឯង  វៃរដ្ឋាភិបាល ព្រោះអ្វីដែលអស់លោកលើកឡើង គឺលើកឡើងអំពីជ្រុងដែលវៃប្រទេសខ្លួនឯង។ សម្តេចសង្កត់ធ្ងន់ថា៖«នេះបង្កើននូវទោមនស្ស នូវអារម្មណ៍ប្រជាពលរដ្ឋរបស់យើង។ ទី២ សច្ចធម៌ សេចក្តីពិត ដំណើរទៀងត្រង់ អ៊ីចឹង! ការដែលអស់លោកលើកមកថា រដ្ឋាភិបាលនៅក្នុងកិច្ចព្រម ឬសេចក្តីប្រកាសថ្លែងការណ៍រួម(កម្ពុជា-ចិន)នេះថា រដ្ឋាភិបាលបានលើកប្រទេសទាំងមូលឱ្យទៅចិនគ្រប់គ្រង អ្នកឯងកុំពុងតែដើរប្រាសចាកពីសច្ចធម៌ ព្រោះភស្តុតាងប្រជាពលរដ្ឋរាប់លាននាក់អាចមើលបានដែលបង្ហោះនៅសាធារណៈ អត់មានកន្លែងណាថាឱ្យប្រទេសចិនមកគ្រប់គ្រងទេ» ។

បើតាមសម្តេចនាយករដ្ឋមន្រ្តី ហ៊ុន ម៉ាណែត នៅក្នុងសេចក្តីថ្លែងការណ៍រួមរវាងកម្ពុជា-ចិន ក្នុងនោះជាពិសេស ចំណុចទី ៣ បញ្ជាក់យ៉ាងច្បាស់ថា ភាគីទាំងពីរបញ្ជាក់សារជាថ្មី នូវការគាំទ្រផលប្រយោជន៍ស្នូលអធិបតេយ្យភាពជាតិ និងបូរណភាពទឹកដីឱ្យគ្នាទៅវិញទៅមក ព្រមទាំងប្រឆាំងដាច់ខាងការជ្រៀតជ្រែកកិច្ចការផ្ទៃក្នុងរបស់ប្រទេសនីមួយ។  

សម្តេចធិបតីក៏បានចំអកថា៖« និយាយ សូមឱ្យមានភស្តុតាងច្បាស់លាស់ ជាទឡ្ហីករណ៍អំណះអំណាង បើមិនអញ្ចឹងនោះទេ នឹងបាត់នូវជំនឿ»៕

The post សម្តេចធិបតី ផ្តាំទៅអ្នកនយោបាយប្រឆាំងក្រៅប្រទេស កុំយកគំនុំ គុំកួន វៃបង្អាប់ប្រទេសខ្លួនឯង appeared first on Kampuchea Thmey Daily.