ឥណ្ឌូណេស៊ីពិចារណាទិញប្រេងថោកៗពីរុស្ស៊ី ដែលរងទណ្ឌកម្មធ្ងន់ធ្ងរពីលោកខាងលិច
ការចាប់អារម្មណ៍របស់ឥណ្ឌូណេស៊ីលើប្រេងរុស្ស៊ី បានបង្កឱ្យមានការព្រួយបារម្ភថាវាអាចប៉ះពាល់ដល់ទំនាក់ទំនងរបស់ប្រទេសនេះ ជាមួយសម្ព័ន្ធមិត្តលោកខាងលិច។ The post ឥណ្ឌូណេស៊ីពិចារណាទិញប្រេងថោកៗពីរុស្ស៊ី ដែលរងទណ្ឌកម្មធ្ងន់ធ្ងរពីលោកខាងលិច appeared first on Kampuchea Thmey Daily.
ប្រទេសឥណ្ឌូណេស៊ីកំពុងពិចារណាទិញប្រេងពីរុស្ស៊ី ដែលរងទណ្ឌកម្មយ៉ាងធ្ងន់ធ្ងរពីលោកខាងលិច ជាពិសេសអឺរ៉ុប ចាប់តាំងពីមេដឹកនាំរុស្ស៊ី លោក វ៉្លាឌីមៀរ ពូទីន បញ្ជាទ័ពឱ្យឈ្លានពានអ៊ុយក្រែននៅចុងខែកុម្ភៈឆ្នាំ ២០២២។ នេះបើតាមការចុះផ្សាយរបស់កាសែត Jakarta Globe។
រដ្ឋមន្ត្រីថាមពលឥណ្ឌូណេស៊ី លោក Bahlil Lahadalia បាននិយាយកាលពីសប្ដាហ៍មុនថា ការចូលជាសមាជិក BRICS របស់ឥណ្ឌូណេស៊ី បានបង្កើតជាលទ្ធភាពដែលរដ្ឋាភិបាលអាចទិញប្រេងរុស្ស៊ី ដែលមានតម្លៃថោកៗដោយសារតែជាប់ទណ្ឌកម្មអឺរ៉ុប។
យ៉ាងណាមិញ ការចាប់អារម្មណ៍របស់ឥណ្ឌូណេស៊ីលើប្រេងរុស្ស៊ី បានបង្កឱ្យមានការព្រួយបារម្ភថាវាអាចប៉ះពាល់ដល់ទំនាក់ទំនងរបស់ប្រទេសនេះ ជាមួយសម្ព័ន្ធមិត្តលោកខាងលិច។ ទោះបីបែបនេះក្ដី ប្រភពការទូតសហភាពអឺរ៉ុបម្នាក់ បានបង្ហើបប្រាប់ Jakarta Globe ឱ្យដឹងថា ប្លុកអឺរ៉ុបមិនខ្វល់ពីប្រភពផ្គត់ផ្គង់ប្រេងរបស់ឥណ្ឌូណេស៊ីនោះទេ ទោះបីជាវាបានមកពីរុស្ស៊ីក៏ដោយ។
ទន្ទឹមនឹងនេះ ឯកអគ្គរដ្ឋទូតរុស្ស៊ីប្រចាំឥណ្ឌូណេស៊ី លោក Sergei Tolchenov បាននិយាយថា ប្រទេសរបស់លោកបើកចំហសម្រាប់ការចរចាទិញប្រេង។
លោកបានកត់សម្គាល់ថា រុស្ស៊ីបានចូលរួមក្នុងកិច្ចពិភាក្សាមួយចំនួនជាមួយឥណ្ឌូណេស៊ី ដើម្បីប្រើប្រាស់រូបិយប័ណ្ណក្នុងស្រុក រួមមានប្រាក់រូពៀ (ឥណ្ឌូណេស៊ី) និងប្រាក់រូប្លិ៍ (រុស្ស៊ី) សម្រាប់ពាណិជ្ជកម្មទ្វេភាគី ខណៈក្រុងម៉ូស្គូត្រូវបានផ្ដាច់ឱ្យនៅឯកោក្នុងប្រព័ន្ធហិរញ្ញវត្ថុអន្តរជាតិ។
គួរគូសបញ្ជាក់ថា ឥណ្ឌូណេស៊ីអាចផលិតប្រេងបានត្រឹមតែ ៧០០ ០០០-៨០០ ០០០ បារ៉ែល/ថ្ងៃ ប៉ុណ្ណោះ ឬស្មើនឹងពាក់កណ្ដាលនៃតម្រូវការ/ថ្ងៃក្នុងស្រុក។ ប្រទេសនេះនាំចូលប្រេងជាចម្បងពីសមាជិកអង្គការនៃប្រទេសនាំចេញប្រេង (OPEC)។
យោងតាមទិន្នន័ពីទីភ្នាក់ងារស្ថិតិឥណ្ឌូណេស៊ី (BPS) ការនាំចូលប្រេង និងឧស្ម័នរបស់ប្រទេស មានចំនួនសរុបប្រហែល ៣៦,៣ ប៊ីលានដុល្លារ ក្នុងឆ្នាំ ២០២៤៕
The post ឥណ្ឌូណេស៊ីពិចារណាទិញប្រេងថោកៗពីរុស្ស៊ី ដែលរងទណ្ឌកម្មធ្ងន់ធ្ងរពីលោកខាងលិច appeared first on Kampuchea Thmey Daily.
