អាមេរិក កូរ៉េខាងត្បូង រួមគ្នាអំពាវនាវឲ្យកូរ៉េខាងជើងដកទ័ពពីរុស្ស៊ី
លោកបានសន្និដ្ឋានជាមុនថា ក្រុងមូស្គូនឹងមិនស្ដាប់ឡើយ ហើយនៅតែដាក់ពង្រាយទ័ពកូរ៉េខាងជើងសម្រាប់វាយលុក... The post អាមេរិក កូរ៉េខាងត្បូង រួមគ្នាអំពាវនាវឲ្យកូរ៉េខាងជើងដកទ័ពពីរុស្ស៊ី appeared first on Kampuchea Thmey Daily.
រដ្ឋមន្ត្រីក្រសួងការពារជាតិអាមេរិក និងកូរ៉េខាងត្បូង បានរួមគ្នាអំពាវនាវកាលពីថ្ងៃទី៣០ខែតុលាឲ្យកូរ៉េខាងជើងដកកងកម្លាំងរបស់ខ្លួនចេញពីទឹកដីរុស្ស៊ី ខណៈរបាយការណ៍ពីក្រុងវ៉ាស៊ីតោនបានបង្ហាញ ទាហានប្រមាណ១ម៉ឺននាក់របស់ក្រុងព្យុងយ៉ាងត្រូវបានដាក់ពង្រាយត្រៀមធ្វើសកម្មភាពប្រឆាំងនឹងអ៊ុយក្រែន។
លោក Lloyd Austin រដ្ឋមន្ត្រីការពារជាតិអាមេរិក បាននិយាយថា៖ «ខ្ញុំសូមធ្វើការអំពាវនាវឲ្យពួកគេដកកងទ័ពរបស់ពួកគេចេញពីរុស្ស៊ី។ អាមេរិកនឹងធ្វើការជាមួយសម្ព័ន្ធមិត្ត និងដៃគូ ទប់ស្កាត់រុស្ស៊ីមិនឲ្យដាក់ពង្រាយទាហានទាំងនេះចូលសមរភូមិទេ»។ យ៉ាងណា លោកបានសន្និដ្ឋានជាមុនថា ក្រុងមូស្គូនឹងមិនស្ដាប់ឡើយ ហើយនៅតែដាក់ពង្រាយទ័ពកូរ៉េខាងជើងសម្រាប់វាយលុកអ៊ុយក្រែនដដែល។ លោកបន្ថែមថា ទ័ពកូរ៉េខាងជើងកំពុងត្រូវបានបំពាក់ឯកសណ្ឋាន និងប្រើប្រាស់អាវុធរបស់រុស្ស៊ី។
ចំណែកឯ លោក Kim Yong-hyun រដ្ឋមន្ត្រីការពារជាតិកូរ៉េខាងត្បូង បានប្រាប់ថា ការដាក់ពង្រាយកងកម្លាំងរបស់កូរ៉េខាងជើងនេះ អាចបង្កើនការគំរាមកំហែងសន្តិសុខកាន់តែខ្លាំងឡើងនៅឧបទ្វីបកូរ៉េ ព្រោះតែវាមានឱកាសខ្ពស់ដែលថា ក្រុងព្យុងយ៉ាងនឹងស្នើសុំការបញ្ជូនបច្ចេកវិទ្យាពីរុស្ស៊ីសម្រាប់ជំនួយដល់កម្មវិធីអាវុធរបស់ខ្លួន រួមទាំងសព្វាវុធនុយក្លេអ៊ែរ មីស៊ីលប៉ាលិស្ទិកអន្តរទ្វីប និងផ្កាយរណបឈ្លបការណ៍ ដែលទាំងនេះសុទ្ធតែជាដោះដូររវាងសម្ព័ន្ធមិត្តទាំងពីរ។
ទន្ទឹមនោះ លោក Yong-hyun ក៏បានប្រកាសដែរថា កូរ៉េខាងត្បូងនឹងមិនបញ្ជូនកងកម្លាំងរបស់ខ្លួនទៅជួយដល់អ៊ុយក្រែនទេ បើទោះជាមានការអំពាវនាវពីសហរដ្ឋអាមេរិក និងក្រុងកៀវ ឲ្យពិបារណាលើរឿងនេះក៏ដោយ។ ផ្ទុយទៅវិញ លោកថា ក្រុងសេអ៊ូលនឹងមានការបង្កើតក្រុមត្រួតពិនិត្យ ឬក្រុមវិភាគ ដើម្បីឲ្យយោធា និងរដ្ឋាភិបាលរបស់ខ្លួនអាចត្រៀមសម្រាប់ភាពអាសន្នដែលអាចកើតឡើងនាថ្ងៃខាងមុខ។
របាយការណ៍អាមេរិក បានបង្ហាញថា ទ័ពកូរ៉េខាងជើងប្រមាណ១ម៉ឺននាក់ត្រូវបានដាក់ពង្រាយទៅជួយដល់រុស្ស៊ី នៅក្នុងសង្គ្រាមឈ្លានពានអ៊ុយក្រែន ហើយទ័ពទាំងនោះនឹងត្រៀមចូលសមរភូមិប្រយុទ្ធ នាប៉ន្មានសប្ដាហ៍ខាងមុខទៀត។ មន្ទីរបញ្ចកោណ បានប្រកាសកាលពីដើមសប្ដាហ៍ថា សហរដ្ឋអាមេរិកនឹងមិនដាក់កំហិតថ្មីលើអ៊ុយក្រែនក្នុងការប្រើប្រាស់អាវុធអាមេរិកនោះទេ ប្រសិនបើកូរ៉េខាងជើងហ៊ានចូលរួមសង្គ្រាមប្រឆាំងនឹងទីក្រុងកៀវ៕
ដោយ៖ ឈាង
ចុចអាន៖ កូរ៉េខាងត្បូង ប្រាប់ថា ខ្លួននឹងមិនបញ្ជូនទ័ពជួយអ៊ុយក្រែននោះទេ
The post អាមេរិក កូរ៉េខាងត្បូង រួមគ្នាអំពាវនាវឲ្យកូរ៉េខាងជើងដកទ័ពពីរុស្ស៊ី appeared first on Kampuchea Thmey Daily.
