អង្ករសែនក្រអូបកម្ពុជា ឈ្នះជើងឯកពានរង្វាន់មាសជាថ្មី

អង្ករម៉ាកសមូហភាព SKO ពូជស្រូវសែនក្រអូប០១ បានឈ្នះពានរង្វាន់មាសក្នុងកម្មវិធីវាយតម្លៃ គុណភាពរសជាតិ ប្រភេទអង្ករគ្រាប់វែង ចិន-អាស៊ានលើកទី២ នៅថ្ងៃទី ០៨ ខែវិច្ឆិកា ឆ្នាំ ២០២៤។

កញ្ញា អ៉ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា អង្ករសែនក្រអូបរបស់ខ្មែរ SKO បានទទួលដំណឹងល្អមួយទៀត ជាប់ជាពូជស្រូវល្អជាងគេ ឈ្នះពានរង្វាន់មាសនៅក្នុងកម្មវិធី វាយតម្លៃគុណភាពរសជាតិប្រភេទអង្ករវែង ចិន-អាស៊ាន ជាលើកទី២ ពោលគឺជាប់ជើងឯកពានរង្វាន់មាស ២ ឆ្នាំជាប់គ្នា នៅប្រទេសចិន។

អង្ករម៉ាក សមូហភាព “SKO” ដែលមានពូជស្រូវឈ្មោះសែនក្រអូប ត្រូវបានទទួលស្គាល់ជាពូជ​ស្រូវល្អ និងមានរសជាតិឆ្ងាញ់ព្រមទាំងបានជាប់ពានរង្វាន់មាសក្នុង​ចំណោមពានមាសរបស់ពូជ​ស្រូវ​វារបស់ប្រទេសផ្សេងទៀត។

សហព័ន្ធស្រូវអង្ករកម្ពុជាសូមអំពាវនាវដល់ប្រជាកសិករខិតខំបន្តនូវការងារដាំដុះដែល ប្រកបដោយគុណភាពនិងមោទក​ភាពនេះជា​បន្តទៀត។​ ការទទួលបាននូវពាន​រង្វាន់​មាស​​​នេះនឹងជួយឱ្យតម្លៃអង្ករ សែនក្រអូបមានការទទួលស្គាល់កាន់តែច្រើនឡើង និងមានទីផ្សារ​កាន់តែធំទូលាយថែមទៀត។

ពូជស្រូវសែនក្រអូបជាពូជស្រូវមិនប្រកាន់រដូវដែលត្រូវបានដាំដុះដោយប្រជាកសិករ តាំងពីពាក់​កណ្តាលទសវត្សរ៍៩០ ដើម្បីឆ្លើយតបទៅកាន់ទីផ្សារ ក្រសួងកសិកម្ម រុក្ខាប្រមាញ់ និងនេសាទ តាមរយៈ វិទ្យាស្ថានស្រាវជ្រាវនិងអភិវឌ្ឍន៍កសិកម្មកម្ពុជាសកល​វិទ្យាល័យភូមិន្ទ​កសិកម្ម​សហព័ន្ធ​ស្រូវអង្ករកម្ពុជា សាជីវកម្ម ហិរញ្ញវត្ថុអន្តរជាតិ និងកម្មវិធីខ្សែច្រវ៉ាក់តម្លៃកសិកម្មកម្ពុជា-អូស្ត្រាលី បានរៀបចំកិច្ចព្រមព្រៀងសហប្រតិបត្តិការ លើបច្ចេកទេស និងហិរញ្ញវត្ថុ ដើម្បីរៀប​ចំឱ្យមានពូជស្រូវសែនក្រអូបមួយច្បាស់លាស់ ឆ្លងតាមការសិក្សានិងកិច្ច ខិតខំរបស់អ្នកវិទ្យាសាស្ត្រស្រូវនៃវិទ្យាស្ថាន​ស្រាវជ្រាវ និងអភិវឌ្ឍន៍កសិកម្មកម្ពុជាបានសម្រាំងឡើងដោយជម្រើស ឯកទត្តចេញពីពូជស្រូវក្រអូបផ្សេងៗរហូតទទួលបានពូជស្រូវសែនក្រអូបមួយដែលល្អហើយត្រូវបានប្រកាសដាក់ ឱ្យប្រើប្រាស់ជាផ្លូវការនៅក្នុងឆ្នាំ២០១៩ ក្រោមឈ្មោះជាផ្លូវការថា៖ សែនក្រអូប ០១៕

The post អង្ករសែនក្រអូបកម្ពុជា ឈ្នះជើងឯកពានរង្វាន់មាសជាថ្មី appeared first on Kampuchea Thmey Daily.