ស៊ូដង់កំពុងជួបវិបត្តិមនុស្សធម៌ដ៏អាក្រក់បំផុតនៅក្នុងពិភពលោក

សហភាពអាហ្វ្រិក បានព្រមានថា សង្គ្រាមស៊ីវិលនៅ​ប្រទេស​ស៊ូដង់បាន​និង​កំពុង​បង្កើត​នូវ​«វិបត្តិមនុស្សធម៌ដ៏អាក្រក់បំផុតនៅក្នុងពិភពលោក» ខណៈសង្គ្រាមនេះបានរាំរាំងការរផ្តល់ជំនួយដល់ប្រជាជនដែលកំពុងរងផលប៉ះពាល់។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី១២ខែកុម្ភៈនេះ។

ជម្លោះរវាងរ​យោធាស៊ូដង់​គាំទ្រ​​​ឧត្តមសេនីយ៍ និងកងកម្លាំងគាំទ្ររហ័ស (RSF)​ គាំទ្រ​ប្រធានាធិបតី​​ កំពុងរារាំងដល់ការផ្តល់​ជំនួយដល់ប្រជាជនដែលទទួលរងការវាយប្រហារ និងការគំរាមកំហែងនៃគ្រោះទុរភិក្ស ដែលនឹងធ្វើឲ្យវិបត្តិមនុស្សធម៌​កាន់អាក្រក់ទៅៗ។

លោក Mohamed Ibn Chambas ប្រធានក្រុមប្រឹក្សាជាន់ខ្ពស់សហភាពអាហ្វ្រិក ( AU ) ស្តីពីប្រទេសស៊ូដង់ (HLP-Sudan) បាននិយាយថា៖«​សង្រ្គាមបានរារាំងដល់ការទទួលបានជំនួយមនុស្សធម៌ ដែលនាំឱ្យមានការខ្វះខាតស្បៀងអាហារ និងការស្រេកឃ្លានកាន់តែធ្ងន់ធ្ងរ»។ លោក​បាន​បន្ត​ថា៖ «កុមារ និង​ស្ត្រី​ត្រូវ​បាន​គេ​រំលោភ​បំពាន​ជា​បន្ត​បន្ទាប់ ហើយ​មនុស្ស​ចាស់ ឈឺ​ខ្វះ​ជំនួយ​ផ្នែក​វេជ្ជសាស្រ្ដ។ ទាំងនេះគឺជាវិបត្តិមនុស្សធម៌ដ៏អាក្រក់បំផុតនៅក្នុងពិភពលោក»។

ចំណែកលោក Wilson Almeida Adao មន្ត្រីជាន់ខ្ពស់សហភាពអាហ្វ្រិក AU សម្រាប់សុខុមាលភាពកុមារ បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា ការចូលមន្ទីរពេទ្យដោយសារកង្វះអាហារូបត្ថម្ភបានកើនឡើង៤៤ភាគរយក្នុងឆ្នាំ ២០២៤ជាមួយនឹងកុមារជាង ៤៣១០០០ នាក់បានទទួលការព្យាបាល ហើយកុមារ​រាប់​សែន​នាក់​ឥឡូវ​នេះ​កំពុងខ្វះ​អាហារូបត្ថម្ភ។ លើសពីនេះក៏មានរបាយការណ៍នៃការរំលោភធ្ងន់ធ្ងរ រួមទាំងការវាយប្រហារលើសាលារៀន និងមន្ទីរពេទ្យ ការបង្ខំឱ្យជ្រើសរើសកុមារធ្វើទាហាន និងការរារាំងមិនឲ្យទទួលបានជំនួយមនុស្សធម៌ជាដើម។

គួរបញ្ជាក់ថាសង្គ្រាមនៅស៊ូដង់បានផ្ទុះឡើងក្នុងខែមេសា ឆ្នាំ ២០២៣ រវាងរដ្ឋាភិបាលយោធាស៊ូដង់ និងកងកម្លាំងគាំទ្ររហ័ស (RSF) ដែលបានធ្វើឲ្យជម្លៀសប្រជាជនប្រមាណ១២លាននាក់។ យោធាស៊ូដង់គ្រប់គ្រងភាគខាងកើត និងខាងជើងនៃប្រទេស ខណៈដែល RSF កាន់កាប់ភាគច្រើននៃតំបន់ Darfur៕

អត្ថបទ៖ ប៊ុន សុភាព

The post ស៊ូដង់កំពុងជួបវិបត្តិមនុស្សធម៌ដ៏អាក្រក់បំផុតនៅក្នុងពិភពលោក appeared first on Kampuchea Thmey Daily.