សោភ័ណភាព សណ្ដាប់ធ្នាប់ និងបរិស្ថានអនាម័យ រៀបចំរួចរាល់ សម្រាប់ពិធីបុណ្យអុំទូក
សោភ័ណភាព សណ្ដាប់ធ្នាប់ និងបរិស្ថានអនាម័យ... The post សោភ័ណភាព សណ្ដាប់ធ្នាប់ និងបរិស្ថានអនាម័យ រៀបចំរួចរាល់ សម្រាប់ពិធីបុណ្យអុំទូក appeared first on Kampuchea Thmey Daily.
សោភ័ណភាព សណ្ដាប់ធ្នាប់ របៀបរៀបរយ និងបរិស្ថានអនាម័យ ត្រូវបានគិតគូររៀបចំរួចរាល់ នៅតំបន់ជុំវិញទីតាំងពិធី សម្រាប់ព្រះរាជពិធីបុណ្យអុំទូក។
ការតុបតែងលម្អង ជាស្លាក និងភ្លើងបំភ្លឺជាច្រើនតាមដងផ្លូវ និងសួនច្បារនានាសំខាន់ ក្នុងរង្វង់ទីតាំងសម្រាប់ពិធី បានដំឡើងរួចរាល់ អមជាមួយកងកម្លាំងសមត្ថកិច្ចជាច្រើន ដើម្បីត្រៀមការពារសន្តិសុខសុវត្ថិភាពជូនប្រជាពលរដ្ឋ។
នៅសល់តែមួយថ្ងៃទៀតប៉ុណ្ណោះ ព្រះរាជពិធីបុណ្យអុំទូកចូលមកដល់នោះ គេក៏សង្កេតឃើញមានប្រជាពលរដ្ឋ ភ្ញៀវជាតិ និងអន្តរជាតិជាច្រើន បាននាំគ្នាទៅដើរលេងកម្សាន្តនៅតាមសួនច្បារទល់មុខព្រះបរមរាជវាំងផងដែរ ដើម្បីដើរមើលប្រទីបជាច្រើនដែលបញ្ឈរជើងតាមមាត់ច្រាំងទន្លេ រួមជាមួយការហ្វឹកហាត់សមសមត្ថភាពរបស់ក្រុមកីឡាករចំណុះទូកទាំងអស់ ដែលបាននិងកំពុងយកចិត្តទុកដាក់ក្នុងការបង្កើនកម្លាំងត្រៀមសម្រាប់ការប្រកួតថ្នាក់ជាតិនៅថ្ងៃស្អែកនេះ។
ប្រជាពលរដ្ឋបានបង្ហាញអារម្មណ៍រីករាយនៅពេលបានដើរលេងកម្សាន្ត ដោយពួកគេបានមើលឃើញថា សោភ័ណភាព និងបរិស្ថានអនាម័យ មានភាពស្អាតល្អប្រសើរខ្ពស់។ ពលរដ្ឋ រំពឹងខ្ពស់ថា បុណ្យអុំទូកឆ្នាំនេះ នឹងមានភាពអធិកអធមខ្លាំង ហើយបុណ្យរបស់ជាតិមួយនេះ នឹងទាក់ទាញភ្ញៀវទេសចរទាំងក្នុងស្រុក និងអន្តរជាតិ មកចូលរួមឱ្យកាន់តែកុះករផងដែរ។
ទាក់ទងនឹងបញ្ហាសន្តិសុខសណ្ដាប់ធ្នាប់វិញ កម្លាំងសមត្ថកិច្ចចម្រុះទាំងអស់ សរុបចំនួនជាង ១ ម៉ឺន ៦ ពាន់នាក់ បានត្រៀមលក្ខណៈរួចរាល់ ១០០ ភាគរយហើយ ដើម្បីពង្រាយកម្លាំងចេញការពារសន្តិសុខសុវត្ថិភាព និងសម្រួលចរាចរណ៍ ជូនប្រជាពលរដ្ឋ ទាំងក្នុងបរិវេណទីតាំងប្រារព្ធពិធី និងក្រៅបរិវេណជាដើម។
សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក នឹងប្រារព្ធឡើងរយៈពេល ០៣ ថ្ងៃ គឺ នៅថ្ងៃទី ១៤ , ១៥ , ១៦ ខែវិច្ឆិកា ឆ្នាំ ២០២៤។ ឆ្នាំនេះដែរ មានទូកង សរុបចំនួន ៣៤៦ ទូក បានចុះឈ្មោះចូលរួមប្រណាំង ដោយកីឡាករសរុបជាង ២ ម៉ឺននាក់ ផងដែរ៕
អត្ថបទ ៖ សុភា
The post សោភ័ណភាព សណ្ដាប់ធ្នាប់ និងបរិស្ថានអនាម័យ រៀបចំរួចរាល់ សម្រាប់ពិធីបុណ្យអុំទូក appeared first on Kampuchea Thmey Daily.
