មាននិស្សិតស្រី ៨៣,៣% បាន​ចុះ​ឈ្មោះរៀននៅសាកលវិទ្យាល័យពាណិជ្ជសាស្ត្រអេស៊ីលីដា

ក្នុងរយៈពេលប្រាំបួនឆ្នាំកន្លងទៅនេះ សាកលវិទ្យាល័យពាណិជ្ជសាស្ត្រអេស៊ីលីដា ទទួលបាននិស្សិតចុះ ឈ្មោះចូលសិក្សាបានចំនួន ០៩ជំនាន់ ដែលមាននិស្សិតសរុបចំនួន ៩,២៣២នាក់ និស្សិតស្រីចំនួន ៧,០៤៤នាក់ស្មើនឹង៨៣,៣% គិតត្រឹមថ្ងៃទី០៤ ខែកុម្ភៈ ឆ្នាំ២០២៥ ។ នេះបើតាមប្រសាសន៍លោកបណ្ឌិត ផុន ណារិន សាកលវិទ្យាធិកាសាកលវិទ្យាល័យ ពាណិជ្ជសាស្ត្រ អេស៊ីលីដា បានថ្លែងឱ្យដឹងក្នុងឱកាសបើកបវេសនកាលឆ្នាំសិក្សាថ្មី ២០២៤- ២០២៥ នាព្រឹកថ្ងៃទី១០ ខែកុម្ភៈ ឆ្នាំ២០២៥។

លោកបានបន្ថែមថា សាកលវិទ្យាល័យបាននឹងកំពុងអភិវឌ្ឍន៍ធនធានមនុស្សយ៉ាងច្រើនពិសេសធនធាននិស្សិតស្រី ខណៈកាលពីអតីតកាលនិស្សិតស្រីមានមិនច្រើនទេ ពោលគឺស្ទើរតែមិនបាន៥០%ផង និងអាចនិយាយបានថា នៅកម្ពុជាប្រហែលជាមានតែសាកលវិទ្យាល័យពាណិជ្ជសាស្រ្តអេស៊ីលីដាមួយទេ ដែលមាននិស្សិតស្រីចុះឈ្មោះរៀនច្រើនជាងគេ។ បច្ចុប្បន្ននិស្សិតកំពុងបន្តការសិក្សាកម្រិតថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ ខ្ពស់សរុបចំនួន ៥,០៦៦នាក់ និស្សិតស្រីមានចំនួន ៣,៨៥៨នាក់ ជាមធ្យមនិស្សិត ចំនួន ២៥នាក់ ក្នុងមួយថ្នាក់។

លោកបណ្ឌិតបានបន្ថែមថា និស្សិតបញ្ចប់ការសិក្សា ថ្នាក់បរិញ្ញាបត្ររង ៦ជំនាន់ មានចំនួន ៥៦៩នាក់ ស្រីចំនួន ៤៨៣ នាក់ លើជំនាញ ហិរញ្ញវត្ថុ និងធនាគារ/គណនេយ្យ/គ្រប់គ្រងអាហរ័ណ នីហរ័ណ ចលនូបត្ថម្ភ និងថ្នាក់បរិញ្ញាបត្រ ៥ជំនាន់ មានចំនួន ១,២៩៧នាក់ ស្រីចំនួន ១,០២៦ នាក់ លើ ជំនាញហិរញ្ញវត្ថុ និងធនាគារ ពាណិជ្ជកម្មអន្តរជាតិ បច្ចេកវិទ្យាហិរញ្ញវត្ថុប ច្ចេកវិទ្យាព័ត៌មានធុរកិច្ច គ្រប់គ្រង បណ្តាញផ្គត់ផ្គង់ និងចលនូបត្ថម្ភ គណនេយ្យ និង ថ្នាក់បរិញ្ញាបត្រជាន់ខ្ពស់ ២ ជំនាន់និស្សិតចំនួន ៥៣ នាក់ ស្រី ២៤ នាក់ លើ ជំនាញ គ្រប់គ្រងហិរញ្ញវត្ថុ។ ហិរញ្ញវត្ថុ និងធនាគារ សរុបនិស្សិតបញ្ចប់ការសិក្សា មានចំនួន ១,៩១៩នាក់ ស្រីចំនួន១,៥៣៣នាក់។

សូមជម្រាបថា សាកលវិទ្យាល័យពាណិជ្ជសាស្ត្រ អេស៊ីលីដា ជាក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី និងជាថ្នាលអប់រំធុរកិច្ចប្រកបដោយគុណភាពឈានមុខ ដើម្បីរួមចំណែកក្នុងការអភិវឌ្ឍសេដ្ឋកិច្ចកម្ពុជា និងថ្នាក់តំបន់។ យោងអនុក្រឹត្យលេខ ២៧ អនក្រ.បក ចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ស្តីពីការទទួលស្គាល់ការប្រែក្លាយ វិទ្យាស្ថានពាណិជ្ជសាស្ត្រ អេស៊ីលីដា ទៅជា សាកលវិទ្យាល័យពាណិជ្ជសាស្ត្រ អេស៊ីលីដា ដោយធ្វើការបណ្ដុះបណ្ដាលកម្រិត បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ដូចខាងក្រោម៖

បរិញ្ញាបត្ររង ជំនាញហិរញ្ញវត្ថុ និងធនាគារ ជំនាញគណនេយ្យ ជំនាញធានារ៉ាប់រង ជំនាញចលនូបត្ថម្ភ ជំនាញគ្រប់គ្រងអាហរ័ណ-នីហរ័ណ ជំនាញទីផ្សារ ជំនាញភាសាអង់គ្លេស, បរិញ្ញាបត្រជំនាញហិរញ្ញវត្ថុ និងធនាគារ ជំនាញគណនេយ្យ ជំនាញគ្រប់គ្រងហានិភ័យ និងធានារ៉ាប់រង ជំនាញសេដ្ឋកិច្ចពាណិជ្ជកម្ម ជំនាញនីតិសាស្ត្រ ជំនាញគ្រប់គ្រងបណ្តាញផ្គត់ផ្គង់ និងចលនូបត្ថម្ភ ជំនាញពាណិជ្ជកម្មអន្តរជាតិ ជំនាញទីផ្សារ ជំនាញគ្រប់គ្រងធុរកិច្ច និងសហគ្រាស ជំនាញបច្ចេកវិទ្យាព័ត៌មានធុរកិច្ច ជំនាញវិទ្យាសាស្ត្រ និងវិស្វកម្មកុំព្យូទ័រ ជំនាញបច្ចេកវិទ្យាហិរញ្ញវត្ថុ ជំនាញភាសាអង់គ្លេសសម្រាប់ទំនាក់ទំនងធុរកិច្ច ជំនាញការបង្រៀនភាសាអង់គ្លេស ជំនាញភាសាអង់គ្លេសសម្រាប់បំណិនបកប្រែ។ ចំពោះបរិញ្ញាបត្រជាន់ខ្ពស់ រួមមាន៖ ជំនាញហិរញ្ញវត្ថុ និងធនាគារ ជំនាញហិរញ្ញវត្ថុ ជំនាញគ្រប់គ្រង៕

ដោយ ៖ សុខា

The post មាននិស្សិតស្រី ៨៣,៣% បាន​ចុះ​ឈ្មោះរៀននៅសាកលវិទ្យាល័យពាណិជ្ជសាស្ត្រអេស៊ីលីដា appeared first on Kampuchea Thmey Daily.