ផ្លូវថ្មើរជើង ៖ រដ្ឋបាលរាជធានីមិនអនុញ្ញាតឱ្យក្រាលកន្ទេល លក់ដូរលើសួនច្បារ និង លើស្មៅទេ
លោកស្រីដោ សម្ផស្ស នាយិការងនិងជាអ្នកនាំពាក្យរដ្ឋបាលរាជធានីភ្នំពេញបានអំពាវនាវដល់ បងប្អូនអាជីវករអ្នកលក់ដូរតាមបណ្តោយផ្លូវថ្មើរជើង The post ផ្លូវថ្មើរជើង ៖ រដ្ឋបាលរាជធានីមិនអនុញ្ញាតឱ្យក្រាលកន្ទេល លក់ដូរលើសួនច្បារ និង លើស្មៅទេ appeared first on Kampuchea Thmey Daily.
លោកស្រីដោ សម្ផស្ស នាយិការងនិងជាអ្នកនាំពាក្យរដ្ឋបាលរាជធានីភ្នំពេញបានអំពាវនាវដល់ បងប្អូនអាជីវករអ្នកលក់ដូរតាមបណ្តោយផ្លូវថ្មើរជើង គឺហាមមិនឱ្យក្រាលកន្ទេលលក់ដូរ និងអង្គុយញាំលើស្មៅលើសួនច្បារ ដែលបណ្តាលឱ្យងាប់ស្មៅ ងាប់ផ្កានិងប៉ះពាល់ដល់បរិស្ថាន។
មួយរយៈកន្លងមកនេះ គេសង្កេតឃើញមានការក្រាលកន្ទេលលក់ និងមានអ្នកអង្គុយញាំលើស្មៅ និងចាក់កាកសំណល់តាមមាត់លូហើយថែមទាំងមានអ្នកទិញកាន់មកញាំលើស្មៅដែរ គឺទាំងអ្នកលក់ និងអ្នកទិញត្រូវហាមមិនឱ្យអង្គុយលើស្មៅដាច់ខាត។
លោកស្រីដោ សម្ផស្ស គូសបញ្ជាក់ថា ផ្លូវថ្មើរជើងជាតំបន់ស្ងួតហាមលេងបាញ់ទឹក ជះទឹក តែបើបងប្អូនចង់បានតំបន់ត្រជាក់ចិត្តសូមទៅលេងនៅសង្គ្រាន្តវត្តភ្នំជុំវិញបរិវេណរមណីយដ្ឋានវប្បធម៌ប្រវត្តិសាស្ត្រវត្តភ្នំដែលរដ្ឋបាលរាជធានីភ្នំពេញបានរៀបចំសង្គ្រាន្តវត្តភ្នំ ដើម្បីផ្តល់ឱកាសជូនបងប្អូនប្រជាពលរដ្ឋយើងរួម ទាំងភ្ញៀវទេសចរណ៍ជាតិ អន្តរជាតិមានកន្លែងលេងកំសាន្តសម្បូរបែប និងច្រើនទីតាំងក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក្ត ព.ស២៥៦៩ ត្រូវនឹងគ.ស២០២៥ ដែលពិធីបុណ្យចូលឆ្នាំថ្មីនឹងប្រព្រឹត្តទៅរយះពេល៣ថ្ងៃគឺពីថ្ងៃទី១៤ដល់១៦មេសា។
នៅល្ងាចថ្ងៃសៅរ៍ទី៥ ខែមេសា ដែលជាសប្តាហ៍ទី១ នៃខែថ្មី លោកឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី បានអញ្ជេីញអមដំណេីរលោកជំទាវបណ្ឌិត ពេជចន្ទ័មុនី ហ៊ុនម៉ាណែត ខណៈលោកជំទាវអញ្ជើញទៅពិនិត្យមើលស្ថានភាពជាក់ស្តែងនៅតាមបណ្តោយផ្លូវថ្មើរជើងមាត់ទន្លេ ដោយលោកឃួង ស្រេង បានធ្វើការណែនាំបន្ថែមដល់អាជ្ញាធរ និងសមត្ថកិច្ចពាក់ព័ន្ធត្រូវយកចិត្តទុកដាក់ទៅលើបញ្ហាសន្តិសុខ សណ្តាប់ធ្នាប់ របៀបរៀបរយសាធារណៈឱ្យបានល្អប្រសើរដោយត្រូវធានាថា ទាំងសង្គ្រាន្តវត្តភ្នំ និងផ្លូវថ្មើរជើងក្នុងឱកាសបុណ្យចូលឆ្នាំថ្មីនេះប្រព្រឹត្តទៅដោយរលូននិងផ្តល់ភាពសប្បាយរីករាយដល់ប្រជាពលរដ្ឋនៅរាជធានីភ្នំពេញ និងបងប្អូនមកពីតាមបណ្តាខេត្តរួមទាំងភ្ញៀវទេសចរណ៏បរទេសផង បានសប្បាយរីករាយ និងមានភាពកក់ក្តៅក្នុងឱកាសបុណ្យចូលឆ្នាំថ្មីប្រពៃណីជាតិរបស់យើង។
តាមបណ្តោយផ្លូវថ្មើរជើង រដ្ឋបាលរាជធានីភ្នំពេញបានរៀបចំឱ្យមានការលក់ដូរលើដងផ្លូវនាពេល រាត្រីភាគច្រើនជាផលិតផលផលិតដោយដៃ រួមទាំងការរៀបចំឱ្យមានការសម្តែងសិល្បៈបុរាណសម័យច្រើនទម្រង់ដើម្បីទាក់ទាញភ្ញៀវទេសចរណ៍ឱ្យចូលមកលេងកំសាន្ត២ថ្ងៃក្នុងមួយសប្តាហ៍ គឺថ្ងៃសៅរ៍ និងថ្ងៃអាទិត្យ។
ដោយឡែកសម្រាប់ ពិធីបុណ្យចូលឆ្នាំ៣ថ្ងៃរដ្ឋបាលរាជធានីភ្នំពេញ នឹងបើកឱ្យមានការលេងកំសាន្ត បន្ថែម៣ថ្ងៃទៀត។
លោកអភិបាលបានអំពាវនាវឱ្យបងប្អូនអាជីវករលក់ដូរ នៅ ផ្លូវថ្មើរជើងក៏ដូចបងប្អូនដែលមកលេងកំសាន្ត ឱ្យចូលរួមលើកកម្ពស់អនាម័យបរិស្ថាន,វេចខ្ចប់កាកសំណល់ហូបចុករួចត្រូវច្រកក្នុងថង់រួមយកទៅដាក់ក្នុងធុងសំរាមដែលនៅជិតបងប្អូន។ បងប្អូនត្រូវយល់ថា ទីក្រុងស្អាត មានអនាម័យល្អ គឺ ផ្តើមចេញពីយើងម្នាក់ និងធ្វើខ្លួនជាប្រជាពលរដ្ឋរស់នៅក្នុងទីក្រុងដែលស៊ីវិល័យ និងថ្លៃថ្នូរ៕
ដោយ ៖ ស្រីរ័ត្ន
The post ផ្លូវថ្មើរជើង ៖ រដ្ឋបាលរាជធានីមិនអនុញ្ញាតឱ្យក្រាលកន្ទេល លក់ដូរលើសួនច្បារ និង លើស្មៅទេ appeared first on Kampuchea Thmey Daily.
