ផ្ទុះហ្គាសនៅម៉ាឡេស៊ី បណ្តាលឲ្យមនុស្សជាង ១០០នាក់រងរបួស និងខូចខាតផ្ទះ ៤៩ខ្នង

បរទេស៖ អគ្គីភ័យដែលបង្កឡើងដោយការផ្ទុះបំពង់ហ្គាស បានរាលដាលដល់ផ្ទះជាច្រើនខ្នង និងបានបញ្ជូនដុំភ្លើងឡើងទៅលើមេឃនៅខាងក្រៅទីក្រុងដ៏ធំបំផុត របស់ប្រទេសម៉ាឡេស៊ីកាលពីថ្ងៃអង្គារ ដោយបានបណ្តាលឲ្យមនុស្សជាង ១០០នាក់រងរបួស។

យោងតាមសារព័ត៌មាន AP ចេញផ្សាយនៅថ្ងៃទី១ ខែមេសា ឆ្នាំ២០២៥ បានឱ្យដឹងថា គ្រោះមហន្ដរាយដ៏មហិមានៅជិតស្ថានីយ៍ប្រេងឥន្ធនៈមួយក្នុងទីក្រុង Putra Heights នៅខាងក្រៅទីក្រុងគូឡាឡាំពួ អាចមើលឃើញរាប់គីឡូម៉ែត្រ (ម៉ាយ) និងមានរយៈពេលជាច្រើនម៉ោង។ វាបានកើតឡើងក្នុងអំឡុងពេលថ្ងៃឈប់សម្រាកជាសាធារណៈ ខណៈដែលអ្នកកាន់សាសនាឥស្លាម ដែលភាគច្រើននៅក្នុងប្រទេសម៉ាឡេស៊ី ប្រារព្ធថ្ងៃទីពីរនៃពិធីបុណ្យ Eid ។

ក្រុមហ៊ុនប្រេងជាតិ Petronas បាននិយាយថា ភ្លើងបានចាប់ផ្តើមឆេះនៅបំពង់បង្ហូរឧស្ម័នមួយរបស់ខ្លួននៅម៉ោង ៨៖១០នាទី ព្រឹក ហើយបំពង់ដែលរងផលប៉ះពាល់ នៅដាច់ដោយឡែក។ មន្ត្រីគ្រប់គ្រងគ្រោះមហន្តរាយបាននិយាយថា ការបិទសន្ទះបិទភ្លើងនឹងរលត់ជាយថាហេតុ។

នាយកដ្ឋានពន្លត់អគ្គីភ័យរដ្ឋ Selangor បានប្រាប់កាសែត Star ថា អណ្តាតភ្លើងដែលមានស្មើនឹងអគារកម្ពស់ ២០ ជាន់ នៅចំណុចមួយគឺតូចល្មមសម្រាប់ក្រុមពន្លត់អគ្គីភ័យចូលទៅជិតម៉ោង ២៖៤៥នាទី រសៀល។

យ៉ាងហោចណាស់ផ្ទះចំនួន ៤៩ខ្នងបានរងការខូចខាត និងមនុស្ស ១១២ នាក់បានរងរបួស ដោយ ៦៣ នាក់ត្រូវបានបញ្ជូនទៅមន្ទីរពេទ្យដោយសារការរលាក ពិបាកដកដង្ហើម និងអ្នករបួសផ្សេងទៀត។ នេះបើតាមស្នងការរងប៉ូលីស Selangor លោក Mohamad Zaini Abu Hassan ដែលត្រូវបានដកស្រង់សម្តីដោយទីភ្នាក់ងារសារព័ត៌មានជាតិ Bernama ៕

ប្រែសម្រួលៈ ណៃ តុលា