ចៅក្រមសម្រេចឃុំខ្លួនជនដៃដល់សម្លាប់សង្សារ នៅខណ្ឌពោធិ៍សែនជ័យ

ចៅក្រម​សាលាដំបូង​រាជធានី​ភ្នំពេញ បាន​សម្រេច​ឃុំខ្លួន​ជន​ត្រូវ​ចោទ​ឈ្មោះ កង សុផន្នា (​កង សុផាន់​ណា​) ដែល​ជា​ឃាតក​សម្លាប់​សង្សារ នៅ​ចំណុច​បន្ទប់​ជួល​លេខ ៦៦ ជាន់​ទី ២ ស្ថិត​ក្នុង​ភូមិ​ជម្ពូ​វ័ន ២ សង្កាត់​ចោមចៅ​ទី ៣ ខណ្ឌ​ពោធិ៍​សែន​ជ័យ កាលពី​ថ្ងៃ​ទី ២០ ខែ​មករា ឆ្នាំ ២០២៥ តាម​បញ្ញត្តិ​មាត្រា ២០០ នៃ​ក្រមព្រហ្មទណ្ឌ ដាក់​ពន្ធនាគារ ម ១ ដើម្បី​រង់ចាំ​ការ​ជំនុំជម្រះ​តាម​នីតិវិធី។

សូម​បញ្ជាក់​ថា ជនរងគ្រោះ​ឈ្មោះ ជ ស មាន​ទីលំនៅ​ភូមិ​ត្រពាំង​លាន ឃុំ​ព្រៃ​ក្រសាំង ស្រុក​ឧដុង្គ ខេត្ត​កំពង់ស្ពឺ អាយុ ៣៩ ឆ្នាំ មុខរបរ​កម្មការិនី​រោងចក្រ​កាត់ដេរ ប៊ឺ​រី អឹ​ភែ​រឹល (​ខេ​ម​បូ​ឌា​) ត្រូវ​បាន​គេ​ប្រទះឃើញ​ស្លាប់​ដោយ​ឃាតក​ប្រើ​ខ្សែ​រឹត.ក សម្លាប់​ក្នុង​បន្ទប់​លេខ ៦៦ ជាន់​ទី ៣ ផ្ទះ​ជួល​ស្ថិតនៅ​ក្នុង​ភូមិ​ជម្ពូ​វ័ន​ ២ សង្កាត់​ចោមចៅ​ទី ​៣ ខណ្ឌ​ពោធិ៍​សែន​ជ័យ រាជធានី​ភ្នំពេញ ដែល​សាកសព​មាន​សភាព​ហើម​ស្អុយ​ទៅ​ហើយ។

ហេតុការណ៍​នេះ​បង្ក​ឲ្យ​មាន​ការ​ភ្ញាក់ផ្អើល​កាលពី​វេលា​ម៉ោង ១ និង ៣០ នាទី​រសៀល​ ថ្ងៃ​ទី ២០ ខែ​មករា ឆ្នាំ ២០២៥ ហើយ​ត្រូវ​បាន​គេ​សង្ស័យ​ថា​ជា​អំពើ​ឃាតកម្ម។

បច្ចុប្បន្ន​ជន​ត្រូវ​ចោទ​ជា​ឃាតក ត្រូវ​បាន​សមត្ថកិច្ច​បញ្ជូន​ទៅ​ឃុំខ្លួន​នៅ​ពន្ធនាគារ​ព្រៃ.ស (​ម ១) ជា​បណ្ដោះអាសន្ន រង់ចាំ​ថ្ងៃ​ជំនុំ​ជម្រះ​ក្តី៕

អត្ថបទ ៖ សំណាង

The post ចៅក្រមសម្រេចឃុំខ្លួនជនដៃដល់សម្លាប់សង្សារ នៅខណ្ឌពោធិ៍សែនជ័យ appeared first on Kampuchea Thmey Daily.