ខេត្តកែបមានឆ្នេរកម្សាន្តយ៉ាងហោចណាស់ ៣ កន្លែង សម្រាប់ភ្ញៀវទេសចរសម្រាកលំហែ
ខេត្តកែបមានឆ្នេរកម្សាន្តយ៉ាងហោចណាស់ ៣ កន្លែង សម្រាប់ភ្ញៀវទេសចរ...... The post ខេត្តកែបមានឆ្នេរកម្សាន្តយ៉ាងហោចណាស់ ៣ កន្លែង សម្រាប់ភ្ញៀវទេសចរសម្រាកលំហែ appeared first on Kampuchea Thmey Daily.
ជាខេត្តមួយស្ថិតនៅតំបន់ឆ្នេរ ខេត្តកែបមានឆ្នេរកម្សាន្តយ៉ាងហោចណាស់ ៣ កន្លែង សម្រាប់ភ្ញៀវទេសចរអាចមកសម្រាកលំហែ។ នេះបើតាមលោក សោម ពិសិដ្ឋ អភិបាលនៃគណៈអភិបាលខេត្តកែប។
ខេត្តកែបជាខេត្តគោលដៅខេត្តជាប់សមុទ្រដ៏ទាក់ទាញមួយ សម្រាប់ទេសចរចូលចិត្តមកសម្រាកលំហែតាមមាត់ឆ្នេរ ខណៈខេត្តដ៏តូចនេះមានឆ្នេរសមុទ្រជាប់ដីគោកប្រវែង ២៧ គីឡូម៉ែត្រ ដែលលាតសន្ធឹងទៅដល់ព្រំប្រទល់ព្រែកចាកខេត្តកំពត។ ។
បើតាមលោក សោម ពិសិដ្ឋ ឆ្នេរខេត្តកែបបច្ចុប្បន្ននេះមាន ៣ កន្លែង និងមានប្រវែងយ៉ាងតិចណាស់ ៦ ០០០ ម៉ែត្រ ដែលកន្លងទៅមានត្រឹមតែ ៥០០ ម៉ែត្រ សម្រាប់ទេសចរកម្សាន្ត។
ឆ្នេរកម្សាន្តទាំង ៣ កន្លែងនៅក្នុងខេត្តកែប ដែលភ្ញៀវទេសចរអាចមកអង្គុយសម្រាកលំហែ ស្រូបខ្យល់អាកាស ញាំអាហារ លេងទឹកជាដើម មានឆ្នេរស្រីស ដែលមានប្រវែងជាង ៥០០ ម៉ែត្រ ឆ្នេរអង្កោលដែលមានប្រវែងជាង ៣ ០០០ ម៉ែត្រ និងឆ្នេរតេជោសន្តិភាពកែប ដែលកំពុងអភិវឌ្ឍជាឆ្នេរប្រណិតកម្រិតខ្ពស់មានប្រវែង ២ ៧០០ ម៉ែត្រ។
ខេត្តកែបគឺជាខេត្តក្នុងតំបន់ឆ្នេរ ដែលមានលក្ខខណ្ឌអំណោយផល និងសក្តានុពលពីធម្មជាតិសម្រាប់ការអភិវឌ្ឍវិស័យទេសចរណ៍ ជាពិសេស ទេសចរណ៍ធម្មជាតិ និងទេសចរណ៍វប្បធម៌ជាដើម។
បើតាមគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ឆ្នេរសមុទ្រខេត្តកែបចែកចេញជា ៥ ប្រភេទក្នុងនោះមាន៖
-ឆ្នេរខ្សាច់ ប្រវែងប្រមាណ ២,២២ គីឡូម៉ែត្រ មានចំនួន ៦ ទីតាំង
-ឆ្នេរថ្ម ប្រវែងប្រមាណ ១១,៤២ គីឡូម៉ែត្រ មានចំនួន ៦ ទីតាំង
-ឆ្នេរភក់ ប្រវែងប្រមាណ ៦,៧៦ គីឡូម៉ែត្រ មានចំនួន ៣ ទីតាំង
-ឆ្នេរព្រៃកោងកាង ប្រវែងប្រមាណ ៦,៣៣ គីឡូម៉ែត្រ មានចំនួន ១០ ទីតាំង
-ឆ្នេរផ្សេងៗ ប្រវែងប្រមាណ ០,៤០ គីឡូម៉ែត្រ មានចំនួន ១១ ទីតាំង។
រាជរដ្ឋាភិបាលបានរៀបចំប្លង់គោលចក្ខុវិស័យឆ្នាំ ២០៣០ រៀបចំនិងអភិវឌ្ឍ “ក្រុងកែបជាទីក្រុងទំនើប មានខ្យល់អាកាសធម្មជាតិបរិសុទ្ធ សម្រាប់ការស្នាក់នៅ ប្រកបការងារ និង ទេសចរណ៍ ជាបុរីលំនៅឋានស្ងប់ស្ងាត់ ដែលមានហេដ្ឋារចនាសម្ព័ន្ធ សេវាកម្ម និងគុណភាពបរិស្ថានរស់នៅបៃតងធម្មជាតិល្អប្រណីត ប្រកបដោយសុភមង្គល និងជាតំបន់ឆ្នេរសមុទ្រដែលស្អាតបំផុតលើសកលលោក ដែលភ្ញៀវទេសចរជាតិ និងអន្តរជាតិអាចមកសម្រាកលម្លែកម្សាន្តគ្រប់រដូវកាល៕
The post ខេត្តកែបមានឆ្នេរកម្សាន្តយ៉ាងហោចណាស់ ៣ កន្លែង សម្រាប់ភ្ញៀវទេសចរសម្រាកលំហែ appeared first on Kampuchea Thmey Daily.
