ក្រុមហេសបូឡា ប្រកាសជ័យជម្នះលើអ៊ីស្រាអែល ក្រោយបទឈប់បាញ់ចូលជាធរមាន

កាលពីថ្ងៃពុធទី២៧ខែវិច្ឆិកាឆ្នាំ២០២៤ បទឈប់បាញ់អ៊ីស្រាអែល-ហេសបូឡា បានចូលជាធរមានហើយ ដោយមានថ្នាក់ដឹកនាំពិភពលោកជាច្រើនចូលរួមសាទរថា ជាសញ្ញាវិជ្ជមានឈានឆ្ពោះទៅរកការបញ្ចប់អំពើហិង្សារយៈពេលជាងមួយឆ្នាំ ហើយភ្លាមៗនោះដែរ ក្រុមហេសបូឡា ស្រាប់តែប្រកាសថា កិច្ចព្រមព្រៀងនេះគឺជាជ័យជម្នះលើប្រទេសអ៊ីស្រាអែល។

ក្នុងសារលើកដំបូងចាប់តាំងពីបទឈប់បាញ់លេចចេញជារូបរាង ចលនាសកម្មប្រយុទ្ធមានមូលដ្ឋាននៅប្រទេសលីបង់ និយាយថា «ជ័យជម្នះដែលផ្តល់ដោយព្រះដ៏មានមហិទ្ធិឫទ្ធិ គឺជាកម្មសិទ្ធិរបស់ភាគីសុចរិត។ អ្នកប្រយុទ្ធរបស់យើង ត្រៀមខ្លួនជានិច្ចដើម្បីឆ្លើយតបទៅនឹងមហិច្ឆតានិងការវាយប្រហាររបស់សត្រូវ»។

ហេសបូឡានិយាយថា កងទ័ពអ៊ីស្រាអែល មិនអាចកាន់កាប់និងបង្កើតទីតាំងនៅតាមទីប្រជុំជនបានទេ ហើយក៏មិនអាចទប់ស្កាត់ការវាយប្រហារឆ្លងដែនរបស់ក្រុមហេសបូឡា ឬបង្កើតតំបន់ទ្រនាប់សន្តិសុខយោធាតាមចិត្តបានដែរ។ ពួកគេនឹង​កំណត់​គោលដៅ​លើ​កងកម្លាំង​អ៊ីស្រាអែល ​រហូត​ដល់សង្គ្រាម​ថ្ងៃ​ចុងក្រោយ។

មុននេះដែរ នាយករដ្ឋមន្ត្រីអ៊ីស្រាអែលប្រកាសថា ​ខ្លួនសូមរក្សាសិទ្ធិវាយប្រហារចលនាសកម្មប្រយុទ្ធលីបង់ដដែល ទោះមានបទឈប់បាញ់ក៏ដោយ។

យោងតាមលោក Benjamin Netanyahu, អ៊ីស្រាអែល បានប្រាប់អាមេរិកទៅរួចហើយថា ខ្លួននៅតែមានសិទ្ធិ​ធ្វើសកម្មភាព​យោធា​ក្នុង​ប្រទេស​លីបង់ បើក្រុមហេសបូឡា នៅតែព្យាយាមបំពាក់អាវុធ កសាងហេដ្ឋារចនាសម្ព័ន្ធឡើងវិញ ឬប្រើប្រាស់គ្រាប់រ៉ុកកែតជាលេសដើម្បីវាយប្រហារ។

សូមបញ្ជាក់ជាថ្មី ក្នុងបទឈប់បាញ់នេះ កងទ័ពអ៊ីស្រាអែល នឹងត្រូវដកចេញពីភាគខាងត្បូងប្រទេ​សលីបង់ ហើយក្រុមហេសបូឡា ក៏នឹងដកថយចេញពីភាគខាងជើងនៃទន្លេ Litani ដូចគ្នា។

កិច្ចព្រមព្រៀង​នេះ​គូសបញ្ជាក់​ថា ក្រុមហេសបូឡានិង​អ៊ីស្រាអែល​ ​មាន​ពេល៦០ថ្ងៃ​ដើម្បី​ដក​កងកម្លាំងនិង​សព្វាវុធ​ចេញពី​តំបន់និង​ខ្សែបន្ទាត់​ខៀវ «Blue Line» ដែលគេស្គាល់ថា ជា​ព្រំដែន​ក្រៅ​ផ្លូវការ​រវាង​ប្រទេស​លីបង់និង​អ៊ីស្រាអែល។ លើសពីនេះ លីបង់ នឹងដាក់ពង្រាយកងទ័ព ៥ ០០០នាក់ទៅភាគខាងត្បូងប្រទេស ដើម្បីគ្រប់គ្រងផ្នែកសន្តិសុខ៕

អត្ថបទ៖ សុខ សុវណ្ណ

ចុចអាន៖ ទីបំផុត អ៊ីស្រាអែល យល់ព្រមលើបទឈប់បាញ់ជាមួយ ក្រុមហេសបូឡា

The post ក្រុមហេសបូឡា ប្រកាសជ័យជម្នះលើអ៊ីស្រាអែល ក្រោយបទឈប់បាញ់ចូលជាធរមាន appeared first on Kampuchea Thmey Daily.