នាយករដ្ឋមន្ត្រីម៉ាឡេស៊ី លោក Anwar Ibrahim បានជួបពិភាក្សាជាមួយមេដឹកនាំយោធាមីយ៉ាន់ម៉ា ដោយផ្តោតលើតម្រូវការមនុស្សធម៌ក្រោយរងគ្រោះរញ្ជួយដី ប៉ុន្តែជំនួបនេះត្រូវបានគេលើកឡើងថា លោក Anwar នឹង​ស្នើ​សុំ​បទ​ឈប់​បាញ់​រវាង​យោធា​មីយ៉ាន់ម៉ា និង​កម្លាំង​គាំទ្រ​លទ្ធិប្រជាធិបតេយ្យ។ នេះបើយោងតាមការចេញផ្សាយរបស់ទូរទស្សន៍ជាតិជប៉ុនNHKនៅថ្ងៃទី១៨ខែមេសានេះ។

លោក Anwar ដែលជាប្រធានសមាគមប្រជាជាតិអាស៊ីអាគ្នេយ៍បច្ចុប្បន្ន បានបើកកិច្ចប្រជុំបិទទ្វារជាមួយ​ លោក Min Aung Hlaing នៅរាជធានីបាងកកប្រទេសថៃកាលពីថ្ងៃព្រហស្បតិ៍។ ប្រភពជាច្រើនបាននិយាយថា មេដឹកនាំទាំងពីរបានពិភាក្សាអំពីរបៀបអាចបញ្ឈប់ជម្លោះ ក៏ដូចជាប្រតិបត្តិការសង្គ្រោះសម្រាប់ការរញ្ជួយដីដ៏បំផ្លិចបំផ្លាញដែលបានវាយប្រហារកណ្តាលប្រទេសមីយ៉ាន់ម៉ាកាលពីថ្ងៃទី២៨ខែមីនា។

រយៈពេលបួនឆ្នាំមកនេះការប្រយុទ្ធគ្នារវាងយោធាមីយ៉ាន់ម៉ា និងកងកម្លាំងគាំទ្រលទ្ធិប្រជាធិបតេយ្យបានបន្តចាប់តាំងពីមានរដ្ឋប្រហារយោធាកាលពីឆ្នាំ២០២១។ ក្រោយ​ការ​រញ្ជួយ​ដី កម្លាំង​យោធា និង​ក្រុម​គាំទ្រ​លទ្ធិប្រជាធិបតេយ្យ​បាន​ប្រកាស​បទ​ឈប់​បាញ់​ជា​បណ្ដោះអាសន្ន ដើម្បី​ផ្តោត​លើ​ការ​ស្ដារ​ការ​រញ្ជួយ​ដី។ ប៉ុន្តែ លោក Anwar បាននិយាយថា ការប្រយុទ្ធគ្នានៅតែបន្តនៅក្នុងប្រទេសមីយ៉ាន់ម៉ា។

កន្លងមកអាស៊ានបានបដិសេធមិនអនុញ្ញាតឱ្យមន្ត្រីយោធាមីយ៉ាន់ម៉ាចូលរួមកិច្ចប្រជុំសំខាន់ៗ ដោយលើកនេះជាករណីលើកលែងដ៏កម្រនៃកិច្ចពិភាក្សាចុងក្រោយរវាងប្រធានអាស៊ាន និងមេដឹកនាំយោធាកំពូលរបស់មីយ៉ាន់ម៉ា។ ទោះយ៉ាងណាកងកម្លាំងគាំទ្រលទ្ធិប្រជាធិបតេយ្យថា ពួកគេប្រឆាំងយ៉ាងខ្លាំងចំពោះគំនិតផ្តួចផ្តើមណាមួយរបស់មេដឹកនាំអាស៊ានដែលចូលរួមជំនួយមនុស្សធម៌ជាមួយលោក Min Aung Hlaing នោះទេ។ ពួកគេ​បាន​និយាយ​ថា សកម្មភាព​បែប​នេះ​អាច​ជា «ការ​ធ្វើ​រដ្ឋប្រហារ​យោធា​ខុសច្បាប់»។

គួរបញ្ជាក់ថាប្រទេសជិតខាង និងប្រទេសអាស៊ានមិនបានចាប់អារម្មណ៍ក្នុងការគាំទ្រការបះបោរតាមលទ្ធិប្រជាធិបតេយ្យ នោះទេ និងក៏​មិន​មាន​ការគាំទ្រ​ការ​រងទុក្ខ​របស់​ជន​ស៊ីវិល​មីយ៉ាន់ម៉ា​ដែរ។ យុទ្ធសាស្ត្ររបស់ប្រទេសទាំងនេះគឺដើម្បីស្តារ «សណ្តាប់ធ្នាប់» ឡើងវិញ តាមរយៈការចរចាដែលទុកឱ្យរបបយោធានៅដដែលនិងទាមទារ​ឲ្យ​ពួក​បដិវត្តន៍​ទទួល​យក​ការ​គ្រប់​គ្រង​ដោយ​យោធា​ជា​អចិន្ត្រៃយ៍​លើប្រទេស សេដ្ឋកិច្ច និង​នយោបាយ៕

អត្ថបទ៖ ប៊ុន សុភាព

The post អាន់វ៉ា ជួប​​ មីន អ៊ុងឡាំង ​ដ៏​កម្រក្នុងទីក្រុងបាងកក appeared first on Kampuchea Thmey Daily.