ហ្វូងសត្វជ្រឹងរាប់ពាន់ក្បាលនៅវត្តបាយដំរាំ កំពុងទាក់ទាញទេសចរអន្តរជាតិបានយ៉ាងប្រសើរ

ហ្វូងសត្វជ្រឹងរាប់ពាន់ក្បាល បានរស់នៅយ៉ាងសុខសាន្តនៅលើដើមឈើចំនួនបួនដើម ដែលស្ថិតនៅក្បែរដងស្ទឹងសង្កែខាងមុខវត្តបាយដំរាំ ស្ថិតក្នុងភូមិបាយដំរាំ ឃុំបាយដំរាំ ស្រុកបាណន់ ខេត្តបាត់ដំបង ដែលទីតាំងនេះមានចម្ងាយប្រមាណ ១៤គីឡូម៉ែត្រ ពីក្រុងបាត់ដំបង តាមបណ្ដោយផ្លូវឆ្ពោះទៅកាន់រមណីយដ្ឋានប្រាសាទបាណន់។

បើគេក្រឡេកមើលទៅតាមចុងឈើដែលស្ថិតនៅក្បែរស្ពានបាយដំរាំ ក្បែររបងវត្ត គេនឹងឃើញហ្វូងសត្វជ្រឹងរស់នៅយ៉ាងសុខសាន្តទៅតាមមែកឈើនីមួយៗ ដែលសត្វទាំងនេះបានធ្វើជើងសំយុងក្បាលចុះក្រោម ហើយបក់ស្លាបរវិចៗ ដែលមើលទៅហាក់ដូចជាស្លឹកឈើកំពុងបក់ទៅតាមកម្លាំងខ្យល់ តែធាតុពិតគឺជាហ្វូងសត្វជ្រឹងដែលរស់នៅទីនេះជាច្រើនឆ្នាំមកហើយ។

បើតាមការបកស្រាយពីសំណាក់ប្រជាពលរដ្ឋដែលរស់នៅក្នុងតំបន់នេះបានបញ្ជាក់ថា កាលដើមឡើយសត្វជ្រឹងទាំងនេះគឺរស់នៅតាមដើមឈើឯវាលស្រែ ប៉ុន្តែដោយសាររងការបាញ់ប្រហារពីសំណាក់ព្រានព្រៃ និងប្រជាពលរដ្ឋខិលខូចមួយចំនួន ទើបធ្វើឲ្យសត្វទាំងនេះ ចាប់ផ្ដើមផ្លាស់ទីមករស់នៅតាមដើមឈើក្នុងទីអារាមវត្តបាយដំរាំ និងក្បែររបងជាប់ដងស្ទឹងសង្កែវិញ ដើម្បីសុវត្ថិភាព និងភាពសុខសាន្តរបស់ពួកវា ហើយការមករស់នៅទីនេះគឺតាំងពីឆ្នាំ១៩៩០ មកម៉្លេះ។

បើតាមការលើកឡើងពីមន្ត្រីទេសចរណ៍បានបញ្ជាក់ថា ការរស់នៅរបស់សត្វជ្រឹងទាំងនេះ គឺពិតជាមានភាពទាក់ទាញដល់ភ្ញៀវទេសចរឲ្យចូលទៅទស្សនា ពិសេសគឺភ្ញៀវទេសចរអន្តរជាតិតែម្ដង ដោយសារតែពពួកសត្វទាំងនេះជាប្រភេទថនិកសត្វ ពួកវាចិញ្ចឹមកូនដោយទឹកដោះ ម្យ៉ាងទៀតការភ្ជួរជើងទៅលើ និងដាំក្បាលចុះមកក្រោម គឺជាសិល្បៈម្យ៉ាងល្អប្រសើររបស់ពួកវា ដែលធ្វើឲ្យមានការទាក់ទាញដល់ភ្ញៀវទេសចរឲ្យចង់ទស្សនា ដែលរូបរាងពួកវាស្រដៀងទៅនឹងសត្វប្រចៀវ ដោយឡែកមុខរបស់វាគឺស្រដៀងទៅនឹងសត្វឆ្កែទៅវិញ ដែលពួកវារកស៊ីអាហារនៅពេលយប់ និងស៊ីផ្លែឈើជាអាហារ ពិសេសផ្លែឈើដែលមានក្លិនក្រអូប។

ដោយសារតែបច្ចុប្បន្នមានសត្វជ្រើងរាប់ពាន់ក្បាលទើបធ្វើឲ្យភ្ញៀវទេសចរជាតិ និងអន្តរជាតិចូលទៅទស្សនារាល់ថ្ងៃមិនដែលដាច់ ហើយការរស់នៅរបស់ពួកវាដែលមានរយៈពេលរាប់ឆ្នាំមកនេះដោយសារតែប្រជាពលរដ្ឋជាច្រើនយល់ដឹង និងមិនប៉ះពាល់ដល់អាយុជីវិតរបស់ពួកវា៕

អត្ថបទ៖ សោ និយមរ័ត្ន

The post ហ្វូងសត្វជ្រឹងរាប់ពាន់ក្បាលនៅវត្តបាយដំរាំ កំពុងទាក់ទាញទេសចរអន្តរជាតិបានយ៉ាងប្រសើរ appeared first on Kampuchea Thmey Daily.