រុស្ស៊ី ប្រកាសថា ២០២៥ នឹងក្លាយជាឆ្នាំនៃជ័យជម្នះ យ៉ាងត្រចះត្រចង់

គ្រាន់តែឆ្លងចូលឆ្នាំថ្មីឆ្នាំសកលមិនបានប៉ុន្មានម៉ោងផង អតីតប្រធានាធិបតីរុស្ស៊ីលោក Dmitry Medvedev បានបង្ហោះសារលើបណ្តាញសង្គម X ថា ២០២៥ នឹងក្លាយជាឆ្នាំនៃជ័យជម្នះយ៉ាងត្រចះត្រចង់សម្រាប់ប្រទេសរបស់គាត់។

ក្នុងសារជាវីដេអូ លោក Medvedev និយាយថា «សួស្តីឆ្នាំថ្មីពិភពលោក! សួស្តីឆ្នាំថ្មីរុស្ស៊ីជាទីស្រឡាញ់! ២០២៥ ជាឆ្នាំនៃជ័យជម្នះដ៏ត្រចះត្រចង់។ យើងនឹងប្រមូលកម្លាំងពីប្រវត្តិសាស្ត្រដ៏រុងរឿងរបស់រុស្ស៊ី ឈានឆ្ពោះទៅកាន់អនាគត»។

ត្បិតតែមិនសំដៅទៅលើអ្វីឲ្យប្រាកដ ប៉ុន្តែបើតាមការចុះផ្សាយរបស់ Newsweek កាលពីថ្ងៃពុធទី១ខែមករាឆ្នាំ២០២៥, គេដឹងច្បាស់ថា សារនេះគឺចង់សំដៅទៅលើសង្គ្រាមជាមួយអ៊ុយក្រែន ដែលនៅតែពុះកញ្ជ្រោលខ្លាំងនិងទំនាក់ទំនងដ៏តានតឹងជាមួយលោកខាងលិច។

ការប្រយុទ្ធគ្នា បានអូសបន្លាយចូលដល់ឆ្នាំ២០២៥ហើយ ខណៈពិភពលោកបានដាក់ក្តីសង្ឃឹមយ៉ាងមុតមាំទៅលើប្រធានាធិបតីជាប់ឆ្នោតអាមេរិក ដូណាល់ ត្រាំ ថាជាបុគ្គលមានឥទ្ធិពលមួយរូប ដែលអាចបញ្ចប់ភ្លើងសង្គ្រាមនេះបាន។

ពាក់ព័ន្ធរឿងនេះដែរ ប្រមុខរដ្ឋាភិបាលទីក្រុងកៀវ លោក វ្ល៉ាឌីមៀរ ហ្សេលេនស្គី ជឿជាក់ថា លោកត្រាំ ពិតជាមានសមត្ថភាព ក្នុងការសម្រេចបានសន្តិភាពនៅអ៊ុយក្រែន។

ក្នុងសុន្ទរកថាអបអរឆ្នាំថ្មី លោកសង្កត់ធ្ងន់ថា អ៊ុយក្រែនមិនឯកោឡើយក្នុងជម្លោះជាមួយរុស្ស៊ី។ លើសពីនេះ លោកថែមទាំងសរសើរខ្នងបង្អែកបស្ចិមប្រទេសផងដែរ ជាពិសេសសហរដ្ឋអាមេរិកតែម្តង សម្រាប់ការគាំទ្រមិនងាករេ។

កាលពី២សប្តាហ៍មុននេះ រដ្ឋមន្ត្រីការបរទេសអាមេរិក Antony Blinken បញ្ជា​ក់ថា ទីក្រុងវ៉ាស៊ីនតោន បានជួយទីក្រុងកៀវ ទាំងផ្នែកហិរញ្ញវត្ថុនិងយោធាគិតជាទឹកប្រាក់អ​ស់ប្រហែល​១០០ពាន់លានដុល្លារហើយ ចាប់តាំងពីសង្គ្រាមរុស្ស៊ីផ្ទុះឡើងក្នុងឆ្នាំ២០២២មក។

យ៉ាងណា លោកអះអាងថា អ្នកជាប់ពន្ធអាមេរិក ពិតជាទទួលបានប្រយោជន៍ពីការខិតខំបំពាក់អាវុធរបស់ទីក្រុងវ៉ាស៊ីនតោនដល់អ៊ុយក្រែន ពីព្រោះការងារថ្មីៗជាច្រើន ត្រូវបានបង្កើតឡើងនៅក្នុងសហរដ្ឋអាមេរិកដើម្បីផលិតអាវុធបន្ថែមទៀត៕

អត្ថបទ៖ សុខ សុវណ្ណ

ចុចអាន៖ ការ​ដឹក​ឧស្ម័ន​របស់​រុស្ស៊ី​ទៅ​អឺរ៉ុបឆ្លង​កាត់​អ៊ុយក្រែន ត្រូវ​បញ្ឈប់​ជា​ផ្លូវការ​ហើយ!

The post រុស្ស៊ី ប្រកាសថា ២០២៥ នឹងក្លាយជាឆ្នាំនៃជ័យជម្នះ យ៉ាងត្រចះត្រចង់ appeared first on Kampuchea Thmey Daily.