រដ្ឋបាលរាជធានីភ្នំពេញ ត្រៀមរៀបចំព្រឹត្តិការណ៍បាល់ទាត់​ ដេីម្បីគាំទ្រកាកបាទក្រហមកម្ពុជា

ព្រឹត្តិការណ៍បាល់ទាត់​ដេីម្បីគាំទ្រកាកបាទក្រហមកម្ពុជា និងចលនាមនុស្សធម៌នៅកម្ពុជាគ្រោងនឹងធ្វើឡើងនៅថ្ងៃ៨ឧសភាខាងមុខនេះ ដោយ​គ្រោងនឹងមានមនុស្សប្រមាណចន្លោះពី២ទៅ៣ម៉ឺននាក់ចូលរួមទស្សនា។

នេះ​បើ​តាម​ការបង្ហាញឱ្យដឹងក្នុងកិច្ចប្រជុំ​ស្តីពីការត្រៀមរៀបចំព្រឹត្តិការណ៍បាល់ទាត់​ដេីម្បីគាំទ្រកាកបាទក្រហមកម្ពុជា និងចលនាមនុស្សធម៌នៅសាលារាជធានីភ្នំពេញនារសៀលថ្ងៃទី១៨ មេសា ឆ្នាំ២០២៥នេះ ក្រោមវត្តមានលោកកេីត ឆែ អភិបាលរងនិងជាតំណាងលោកឃួង ស្រេង អភិបាលនៃគណៈអភិបាលរាជធានីភ្នំពេញ។

ខួបលេីកទី១៦២ទិវាពិភពលោកកាកបាទក្រហម និងអឌ្ឍចន្ទក្រហម៨ ឧសភា ២០២៥ ក្រោមមូលបទ រួមគ្នាស្ម័គ្រចិត្តដេីម្បីសហគមន៍មានសុខភាពល្អ និងមានភាពធន់ និងអាកាសធាតុ។

លោកកេីត ឆែ បានមានប្រសាសន៍ថា ក្រុមការងារត្រូវរៀបចំមហាជនចូលរួមដែលតាមគម្រោងមានមនុស្សប្រមាណចន្លោះពី២ទៅ៣ម៉ឺននាក់។

លោកកើត ឆែ ក៏បានបំផុសឱ្យក្រុមលោកពាក់មី «ផ្ការីកគ្រប់រដូវ»ធ្វេីស្ពត ផ្សព្វផ្សាយ​ហេីយក្រុមតារាកម្ពុជារបស់យេីងត្រូវធ្វេីការផ្សព្វផ្សាយគ្រប់ៗគ្នា​ឱ្យ​បាន​ទូលំទូលាយទាំងការប្រកួត និងការប្រគុំតន្ត្រីជាដេីម គឺធ្វេីម៉េច​ឱ្យ​មាន​ការ​ចាប់អារម្មណ៍ពីមហាជន។

ទាក់​ទង​សមាគម​សិល្បករ​ខ្មែរ​ឱ្យចូលរួមបញ្ជូនក្រុមតារាល្បីៗមកសហការសម្តែង។ ព្រឹត្តិការណ៍​បាល់ទាត់​នេះ​ទទួលបានការសម្រេចដ៏ខ្ពង់ខ្ពស់ពីសម្តេចអគ្គមហាសេនាបតីតេជោហ៊ុន សែន ប្រធាន​ព្រឹទ្ធសភានៃព្រះរាជាណាចក្រកម្ពុជា។

នេះជាព្រឹត្តិការណ៍បាល់ទាត់មិត្តភាពដេីម្បីមនុស្សធម៌ដោយរៀបចំឱ្យមាន១ប្រកួតគឺ ក្រុមបាល់ទាត់ផ្ការីកគ្រប់រដូវ ជាមួយនឹងក្រុមតារាកម្ពុជាដែលអាចចាប់ផ្តេីមនៅម៉ោង៤ ឫម៉ោង៤កន្លះ។

ការប្រកួតនេះគ្រោងនឹងដំណេីរការទៅក្រោម​វត្តមានសម្តេច​កិត្តិ​ព្រឹទ្ធបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ឬ លោកជំទាវ ទី១ បណ្ឌិតពេជ ចន្ទមុនីហ៊ុន ម៉ាណែត។ អង្គ​ប្រជុំ​ត្រៀមរៀប​ចំ​ការ​ប្រកួតកីឡាបាល់ទាត់ខាងលើនេះនឹងបេីកកិច្ចប្រជុំមួយលេីកទៀត ដោយ​លោក​កេីត ឆែ អភិបាលរង​រាជធានីបាន​ស្នេីសុំ​ឱ្យ​សមាជិក​អង្គប្រជុំយកស្មារតី​នៃកិច្ចប្រជុំនេះ​ទៅអនុវត្តតាមតួនាទី ភារកិច្ចរៀងៗខ្លួន​ឱ្យ​សម្រេច​បាន​ជោគជ័យ៕

ដោយ ៖ ស្រីរ័ត្ន

The post រដ្ឋបាលរាជធានីភ្នំពេញ ត្រៀមរៀបចំព្រឹត្តិការណ៍បាល់ទាត់​ ដេីម្បីគាំទ្រកាកបាទក្រហមកម្ពុជា appeared first on Kampuchea Thmey Daily.