ផ្ទុះកាប៊ីនភ្លើងឆាបឆេះរាលដាលដល់តូបលក់ដូរប្រជាពលរដ្ឋនៅក្បែរអស់ ២ តូប

ឆ្លង​ចរន្ត​អគ្គិសនី ឆេះ​កាប៊ីន​ភ្លើង​មួយ​កន្លែង បណ្តាល​ឱ្យ​រាលដាល​ដល់​តូប​លក់ដូរ​ជាប់​ផ្ទះ​ប្រជាពលរដ្ឋ​នៅ​ក្បែរ​នោះ រង​ការ​ខូចខាត​អស់ ២ តូប។

ហេតុការណ៍​នេះ​កើតឡើង​កាលពី​វេលា​ម៉ោង ២ និង ៣០ នាទី រំលង​អធ្រាត្រ ឈាន​ចូល​ថ្ងៃ​ទី ៤ ខែ​វិច្ឆិកា ឆ្នាំ ២០២៤ តាម​បណ្ដោយ​ផ្លូវ​បេតុង ភូមិ​អង្គ សង្កាត់​ចោមចៅ​ទី ៣ ខណ្ឌ​ពោធិ៍​សែន​ជ័យ រាជធានី​ភ្នំពេញ។

ប្រភព​ព័ត៌មាន​នៅ​កន្លែង​កើតហេតុ​បាន​ឱ្យ​ដឹង​ថា នៅ​មុន​ពេល​កើតហេតុ កាប៊ីន​ភ្លើង​មួយ​កន្លែង បាន​ផ្ទុះ​ឡើង​ដោយ​មិន​ដឹង​មូលហេតុ​បង្ក​ជា​អគ្គិភ័យ​ឆាបឆេះ​រាលដាល​ដល់​តូប​លក់ដូរ​ជាប់​ផ្ទះ​ប្រជាពលរដ្ឋ​នៅ​ក្បែរ​នោះ បង្ក​ការ​ភ្ញាក់ផ្អើល​ដល់​ពលរដ្ឋ​ចេញ​មក​មើល​ព្រោងព្រាត រួច​បាន​រាយការណ៍​ជូន​សមត្ថកិច្ច​ជំនាញ​នគរបាល​ពន្លត់​អគ្គិភ័យ​ចេញ​រថយន្ត​មក​អន្តរាគមន៍​បាញ់​ពន្លត់​ភ្លាមៗ ផង​ដែរ។

នៅ​ក្នុង​ហេតុការណ៍​នេះ​ដែរ សមត្ថកិច្ច​បាន​ប្រើ​រថយន្ត​ពន្លត់​អគ្គិភ័យ​ចំនួន ១ គ្រឿង ទើប​អន្តរាគមន៍​បាញ់​ពន្លត់​ទប់ស្កាត់​បាន​មួយ​រយ​ភាគរយ ហើយ​ក្នុង​ករណី​គ្រោះ​អគ្គិភ័យ​នេះ​គឺ​ឆាបឆេះ​អស់​តូប​ផ្ទះ​ចំនួន ២ និង​មិន​បង្ក​ឲ្យ​ប្រជាពលរដ្ឋ​ណា​ម្នាក់​រង​របួស​ទេ៕

អត្ថបទ ៖ សុខា

The post ផ្ទុះកាប៊ីនភ្លើងឆាបឆេះរាលដាលដល់តូបលក់ដូរប្រជាពលរដ្ឋនៅក្បែរអស់ ២ តូប appeared first on Kampuchea Thmey Daily.