ដេប៉ូខ្សាច់នៅផ្លូវជាតិលេខ៥ ក្នុងសង្កាត់ស្វាយប៉ាក កំពុងបង្កគ្រោះថ្នាក់ដល់អ្នកដំណើរ

ទីតាំងដេប៉ូខ្សាច់មួយកន្លែងនៅតាមបណ្តោយផ្លូវជាតិលេខ៥ ត្រង់ចំណុចទល់មុខ ស្ថានីយប្រេងឥន្ទនៈតេលា ក្នុងមូលដ្ឋានសង្កាត់ស្វាយប៉ាក ខណ្ឌឬស្សីកែវ កំពុងបង្កគ្រោះថ្នាក់ដល់អ្នកធ្វើដំណើរលើដងផ្លូវដោយសាររថយន្ដដឹកខ្សាច់ដែលចេញចូលទីតាំងនោះ មិនបានអនុវត្តតាមការណែនាំរបស់អាជ្ញាធរធ្វើឲ្យធ្លាក់ខ្សាច់លើដងផ្លូវបង្កគ្រោះថ្នាក់ចរាចរណ៍ជាញឹកញាប់។

អ្នកស្រី សីតា ប្រជាពលរដ្ឋរស់នៅក្នុងមូលដ្ឋានសង្កាត់ស្វាយប៉ាក ប្រាប់អោយដឹងថា គាត់តែងឃើញអ្នកដំណើរជិះម៉ូតូឆ្លងកាត់ដួលដោយសារខ្សាច់នៅលើដងផ្លូវជាញឹកញាប់ មានខ្លះរអិលដួលរបួសដៃជើងរហូតដល់បាក់ជើងថែមទៀតផង។ អ្នកស្រីបន្តថា ភាគច្រើនពេលគាត់ជិះតាមបណ្តោយផ្លូវជាតិលេខ៥ ឆ្លងកាត់ដេប៉ូខ្សាច់នេះ គឺសឹងតែមិនមានហ៊ានជិះម៉ូតូតែម្តង។ ហើយពេលមានខ្យល់បក់ ដីខ្សាច់ទាំងនោះហ៊ុយខ្លាំង ឬមានភ្លៀងធ្លាក់យូរៗ នឹងកើតទៅទឹកដក់លើផ្លូវជាដើម។

លោក សុខា រតនា ពលរដ្ឋដែលតែងឆ្លងកាត់តំបន់នោះបានលើកឡើងថា រៀងរាល់ថ្ងៃ ពលរដ្ឋសង្កេតឃើញមានអាជ្ញាធរចុះទៅលាង និងកើបដីពេលថ្ងៃម្តង និងពេលល្ងាចម្តងដើម្បីសម្អាតកុំអោយមានដី។ លោកបានចោទសួរទៅកាន់អាជ្ញាធរដោយចម្ងល់ថា « តើអាជ្ញាធរមិនមានវិធានការចំពោះទីតាំងដេប៉ូខ្សាច់នេះទេ ឬយ៉ាងណា បានបណ្តោយអោយរថយន្តចេញចូលដឹកដី ដោយមិនមានការគ្រប់ត្រឹមត្រូវបែបនេះ? » ។

ពួកគាត់ក៏បានសំណូមពរទៅកាន់អាជ្ញាធរ សូមមានវិធានការចុះអប់រំ ឬចាត់តាមនីតិវិធីណាមួយ ដើម្បីកុំអោយដេប៉ូខ្សាច់ខាងលើនេះ បន្តធ្វើអោយខូចសោភ័ណ្ឌភាពដងផ្លូវ ឬបង្កគគ្រោះថ្នាក់ដល់ដំណើរបន្តទៀត។ បើនៅតែបណ្តោយបែបនេះទៅ យូរៗទៅ ក្រុមអ្នករកសុីបើកដេប៉ូខ្សាច់ នឹងក្លាយទៅជាទម្លាប់អាក្រក់បន្តបង្កផលប៉ះពាល់ដល់ពលរដ្ឋ។

ពាក់ព័ន្ធបញ្ហានេះ លោក ជិន ប៊ុនធឿន អភិបាលនៃគណអភិបាលខណ្ឌឬស្សីកែវ បានបញ្ជាក់ថា លោកនឹងណែនាំមន្រ្តីក្រោមឪវាទឲ្យចុះត្រួតពិនិត្យ រួមនឹងមានវិធានការចំពោះទីតាំងខាងលើនេះ៕

អត្ថបទ៖ រដ្ឋា

The post ដេប៉ូខ្សាច់នៅផ្លូវជាតិលេខ៥ ក្នុងសង្កាត់ស្វាយប៉ាក កំពុងបង្កគ្រោះថ្នាក់ដល់អ្នកដំណើរ appeared first on Kampuchea Thmey Daily.