ឥណ្ឌូណេស៊ី ក្លាយជាសមាជិក BRICS ពេញសិទ្ធិហើយ

ក្នុងនាមជាប្រទេសមានប្រជាជនច្រើនលំដាប់ទី៤លើពិភពលោក, នៅទីបំផុតឥណ្ឌូណេស៊ី បានក្លាយជាសមាជិក BRICS ពេញសិទ្ធិហើយ។

តាមសេចក្តីប្រកាសកាលពីថ្ងៃចន្ទទី៦ខែមករាឆ្នាំ២០២៥ ពីសំណាក់ប្រធានប្តូរវេនគឺប្រេស៊ីល, «ក្នុងនាមជាប្រទេសមានប្រជាជនច្រើនជាងគេ និងសេដ្ឋកិច្ចធំបំផុតនៅអាស៊ីអាគ្នេយ៍, ឥណ្ឌូណេស៊ី បានបង្ហាញការគាំទ្រដល់សមាជិក BRICS ផ្សេងទៀត ចំពោះកំណែទម្រង់នៃស្ថាប័នអភិបាលកិច្ចសកល ហើយរួមចំណែកយ៉ាងវិជ្ជមាន ដល់ការធ្វើឲ្យស៊ីជម្រៅនៃកិច្ចសហប្រតិបត្តិការនៅក្នុងពិភពលោកខាងត្បូង»។

យ៉ាងណា មិនមែនតែឥណ្ឌូណេស៊ីទេ, បើតាមការបញ្ជាក់ពីរុស្ស៊ីកាលពីឆ្នាំមុន, មានប្រទេសរហូតដល់ទៅ៩ឯណោះ ដែលនឹងក្លាយជារដ្ឋដៃគូ BRICS ផ្លូវការនៅខែមករាឆ្នាំនេះ ហើយក្នុងចំណោមនោះ មានប្រទេសនៃតំបន់អាស៊ីអាគ្នេយ៍ចំនួន៣។

លោក Yuri Ushakov ជំនួយការប្រធានាធិបតីរុស្ស៊ី បានប្រកាសក្នុងសន្និសីទកាសែតកាលពីថ្ងៃចន្ទទី២៣ខែធ្នូឆ្នាំ២០២៤ថា ប្រទេសទាំង៩ ដូចជា បេឡារុស បូលីវី ឥណ្ឌូណេស៊ី កាហ្សាក់ស្ថាន ថៃ គុយបា អ៊ូហ្គង់ដា ម៉ាឡេស៊ី និងអ៊ូសបេគីស្ថាន នឹងក្លាយជាដៃគូផ្លូវការរបស់ BRICS ចាប់ពីថ្ងៃទី១ខែមករាឆ្នាំ២០២៥ទៅ។

សូមបញ្ជាក់ថា ដើមឡើយ BRICS មានតែប្រេស៊ីល រុស្ស៊ី ឥណ្ឌា និងចិន ប៉ុណ្ណោះ ដោយត្រូវបានបង្កើតឡើងក្នុងឆ្នាំ២០០៩ ជាក្រុមកិច្ចសហប្រតិបត្តិការសម្រាប់ប្រទេសដែលមានសេដ្ឋកិច្ចកំពុងរីកចម្រើន ហើយមិនយូរប៉ុន្មានក៏មានអាហ្វ្រិកខាងត្បូងចូលរួមនៅឆ្នាំ២០១០។ ក្រោ​យមក ប្លុកនេះបានពង្រីកខ្លួន ដោយបន្ថែមសមាជិកថ្មីៗដូចជាអ៊ីរ៉ង់ អេហ្ស៊ីប អេត្យូពី និងអារ៉ាប់រួម ជាដើម។

BRICS តំណាងឲ្យប្រហែល៤០%នៃចំនួនប្រជាជនពិភពលោក និង១ភាគ៥នៃពាណិជ្ជកម្មសកល ប៉ុន្តែក្រុមនេះ ត្រូវបានបណ្តាប្រទេសលោកខាងលិច ចាត់ទុកជាគូប្រជែងរបស់ប្លុកដែលខ្លួនកំពុងដឹកនាំ តួយ៉ាងដូចជា G7 ជាដើម៕

អត្ថបទ៖ សុខ សុវណ្ណ

ចុចអាន៖ អាស៊ាន៤ប្រទេស ក្លាយជាដៃគូផ្លូវការរបស់ BRICS

The post ឥណ្ឌូណេស៊ី ក្លាយជាសមាជិក BRICS ពេញសិទ្ធិហើយ appeared first on Kampuchea Thmey Daily.