ឥណ្ឌូណេស៊ី ជប៉ុនគ្រោងសហការលើគម្រោងវារីអគ្គិសនី ១៧,៨ ប៊ីលានដុល្លារ
គម្រោងនេះនឹងក្លាយជាការអភិវឌ្ឍវារីអគ្គិសនីកកើតឡើងវិញខ្នាតធំដំបូងបង្អស់របស់ឥណ្ឌូណេស៊ី និងធំបំផុតនៅអាស៊ីអាគ្នេយ៍។ The post ឥណ្ឌូណេស៊ី ជប៉ុនគ្រោងសហការលើគម្រោងវារីអគ្គិសនី ១៧,៨ ប៊ីលានដុល្លារ appeared first on Kampuchea Thmey Daily.
ក្រសួងសម្របសម្រួលកិច្ចការសេដ្ឋកិច្ចឥណ្ឌូណេស៊ី និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន (METI) បានចុះហត្ថលេខាលើលិខិតនៃការតាំងចិត្ត (LOI) ស្តីពីកិច្ចសហប្រតិបត្តិការក្នុងការអភិវឌ្ឍរោងចក្រវារីអគ្គិសនី Kayan នៅខេត្តកាលីម៉ាន់តាន់ខាងជើង ក្នុងតម្លៃ ១៧,៨ ប៊ីលានដុល្លារ ដែលជាគម្រោងវារីអគ្គិសនីធំបំផុតនៅអាស៊ីអាគ្នេយ៍។ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋឥណ្ឌូណេស៊ី Antara កាលពីសប្ដាហ៍មុន។
អនុរដ្ឋមន្រ្តីនៃក្រសួងសម្របសម្រួលកិច្ចការសេដ្ឋកិច្ចឥណ្ឌូណេស៊ី លោក Edi Prio Pambudi បាននិយាយក្នុងសេចក្ដីថ្លែងការណ៍ថា៖ «សម្រាប់ឥណ្ឌូណេស៊ី រោងចក្រវារីអគ្គិសនី Kayan មិនមែនគ្រាន់តែជាគម្រោងហេដ្ឋារចនាសម្ព័ន្ធក្នុងក្របខ័ណ្ឌនៃ AZEC (សហគមន៍គ្មានបំភាយកាបូនអាស៊ី) ប៉ុណ្ណោះទេ។ គម្រោងនេះ ជាការវិនិយោគជាយុទ្ធសាស្ត្រសម្រាប់កិច្ចខិតខំប្រឹងប្រែងផ្នែកសន្តិសុខថាមពល និងការកាត់បន្ថយកាបូនរបស់ឥណ្ឌូណេស៊ី»។
លោកបន្តថា ជប៉ុននឹងជួយប្រទេសឥណ្ឌូណេស៊ីអនុវត្តគម្រោងផ្លាស់ប្តូរថាមពល និងសម្រេចបាននូវគោលដៅអព្យាក្រឹតកាបូននៅត្រឹមឆ្នាំ ២០៦០។ ដូច្នេះហើយ រដ្ឋាភិបាលឥណ្ឌូណេស៊ីបានជំរុញឱ្យជប៉ុនបង្កើនកិច្ចសហប្រតិបត្តិការក្នុងការអនុវត្តគម្រោងផ្លាស់ប្តូរថាមពលដែលអាចអនុវត្តបាន និងមានបរិយាប័ន្នក្នុងប្រទេសឥណ្ឌូណេស៊ី។
ស្នងការរងទទួលបន្ទុកកិច្ចការអន្តរជាតិនៅក្រសួង METI របស់ជប៉ុន លោក Masanori Tsuruda បានបញ្ជាក់ថា រដ្ឋាភិបាលទាំង ២ ត្រូវតាមដានឱ្យបានឆាប់លើ LoI សម្រាប់រោងចក្រវារីអគ្គិសនី Kayan ហើយលោកមានទំនុកចិត្តថា ទំនាក់ទំនងទ្វេភាគីដ៏រឹងមាំរវាងជប៉ុន និងឥណ្ឌូណេស៊ី នឹងគាំទ្រដល់ការអភិវឌ្ឍលើគម្រោងនេះ។
យោងតាមគេហទំព័រផ្លូវការរបស់ PT Kayan Hydro Energy គម្រោងនេះនឹងក្លាយជាការអភិវឌ្ឍវារីអគ្គិសនីកកើតឡើងវិញខ្នាតធំដំបូងបង្អស់របស់ឥណ្ឌូណេស៊ី និងធំបំផុតនៅអាស៊ីអាគ្នេយ៍ ដោយមានសមត្ថភាពផលិតអគ្គិសនី ៩ ០០០ មេហ្គាវ៉ាត់ ក្រោមការវិនិយោគសរុប ១៧,៨ ប៊ីលានដុល្លារ។
គម្រោងដដែល ក៏នឹងរួមចំណែកផងដែរដល់គោលដៅរបស់ឥណ្ឌូណេស៊ី ក្នុងការសម្រេចបាននូវថាមពលកកើតឡើងវិញចំនួន ២៣ ភាគរយ ក្នុងល្បាយថាមពលជាតិរបស់ប្រទេសត្រឹមឆ្នាំ ២០២៥ និង ៣១ ភាគរយ នៅឆ្នាំ ២០៥០៕
The post ឥណ្ឌូណេស៊ី ជប៉ុនគ្រោងសហការលើគម្រោងវារីអគ្គិសនី ១៧,៨ ប៊ីលានដុល្លារ appeared first on Kampuchea Thmey Daily.
