អ្នកជំនួញម្នាក់បង្ហើបនីតិវិធី នាំផលិតផលសូត្រខ្មែរទៅលក់នៅក្រៅប្រទេស
អ្នកស្រី ងន វ៉ាន់ថា ជាស្ថាបនិកសហគ្រាសផលិតសូត្រ Color silk Cambodia...... The post អ្នកជំនួញម្នាក់បង្ហើបនីតិវិធី នាំផលិតផលសូត្រខ្មែរទៅលក់នៅក្រៅប្រទេស appeared first on Kampuchea Thmey Daily.
អ្នកស្រី ងន វ៉ាន់ថា ជាស្ថាបនិកសហគ្រាសផលិតសូត្រ Color silk Cambodia ដែលជាសហគ្រាសផលិតសូត្រក្នុងស្រុកដ៏ធំមួយ ផ្តោតលើការផលិតសូត្រនាំចេញទៅទីផ្សារនៅសហគមន៍អឺរ៉ុបនិងអាមេរិក។ ផលិតផលសូត្ររបស់សហគ្រាស Color silk Cambodia មួយចំនួនតូច ក៏មានការផ្គត់ផ្គង់សម្រាប់បម្រើទីផ្សារទេសចរនៅខេត្តសៀមរាប។
អ្នកស្រី ងន វ៉ាន់ថា បានឲ្យដឹងថា សហគ្រាស Color silk Cambodia កំពុងធ្វើការជាមួយកសិករជាង ២ ពាន់គ្រួសារនៅខេត្តតាកែវនិងសៀមរាប ដើម្បីផលិតសូត្រនាំចេញទៅក្រៅប្រទេស។
អ្នកស្រី ងន វ៉ាន់ថា (រួបកណ្តាល) វាគ្មិនចូលរួមពិព័រណ៌ពាណិជ្ជកម្មអន្តរជាតិកម្ពុជា
អ្នកស្រីបន្តថា ការផលិតសូត្រទៀតសោតរបស់សហគ្រាស ផ្ដោតលើការច្នៃនិងប្រើប្រាស់វត្ថុធាតុដើមក្នុងស្រុកភាគច្រើន ខណៈផលិតផលទៀតសោតត្រូវការស្តង់ដាខ្ពស់ ទើបអាចនាំចេញបាន។
ផលិតផលសូត្ររបស់សហគ្រាស Color silk Cambodia បាននាំចេញទៅទីផ្សារនៅសហគមន៍អឺរ៉ុបមានដូចជាបារាំង អាល្លឺម៉ង់ អ៊ីតាលី ស្វីស និងដាណឺម៉ាក និងទីផ្សារអាមេរិក រួមទាំងអូស្ត្រាលី។ ដោយឡែកនៅអាស៊ីមានជប៉ុន និងសិង្ហបុរី។
ពាក់ព័ន្ធការនាំផលិតផលសូត្រទៅលក់នៅក្រៅប្រទេស អ្នកស្រី ងន វ៉ាន់ថា បានចែករំលែកនីតិវិធីមួយចំនួន ដំបូងក្រុមហ៊ុនត្រូវទៅចុះបញ្ជីស្នើសុំអាជ្ញាប័ណ្ណនាំចេញ។ ត្រូវស្នើសុំវិញ្ញាបនបត្របញ្ជាក់ប្រភពដើមទំនិញ (Certificate of Origin C/O) និងត្រូវទៅចុះបញ្ជីអ្នកនាំចេញ (Registered Exporter-REX System) នៅក្រសួងពាណិជ្ជកម្ម។ ជាមួយគ្នានេះ ពីមុនក៏ត្រូវស្នើសុំបន្ថែមប្រព័ន្ធអនុគ្រោះ GSP ដើម្បីនាំចេញទៅសហគមន៍អឺរ៉ុបនិងអាមេរិក ។
អ្នកស្រី ងន វ៉ាន់ថា បានឲ្យដឹងបន្ថែមថា ផលិតផលដែលធ្វើដោយដៃនាំទៅទីផ្សារសហគមន៍អឺរ៉ុប ត្រូវបំពេញលក្ខខណ្ឌតម្រូវច្រើនទាំង គុណភាព តម្លៃ ផលិតកម្ម (Production) ពេលវេលា (timeline) ប្រព័ន្ធដឹកជញ្ជូន និង ការទូទាត់ (payment) ហើយរាល់ផលិតផលទៀតសោតត្រូវរួមចំណែកជួយដល់សហគមន៍ មិនមែនលក់ដើម្បីតែផលចំណេញនោះទេ។
បន្ថែមពីនេះ បើតាមអ្នកស្រី ង៉ន វ៉ាន់ថា បានរំលឹកថា ការធ្វើការជាមួយដៃគូក្រៅប្រទេស ក៏ចាំបាច់ត្រូវការភាពស្មោះត្រង់ ទំនុកចិត្ត និងការទំនាក់ទំនងបានល្អ។
អ្នកស្រីបានលើកឡើងពី ខ្សែចង្វាក់ផលិតកម្មសូត្ររបស់សហគ្រាស Color Silk ផលិតតាមស្តង់ដា ដែលឆ្លើយតបគាំពារដល់បរិស្ថាន។ ស្តង់ដាផលិតផលតម្រូវការប្រើប្រាស់ធនធានធម្មជាតិដែលមានស្រាប់ ដូចជាសម្បកឈើ ស្លឹក និងគ្រាប់។ ដើម្បីស្ថិរភាពចង្វាក់ផលិតផលកម្ម សហគ្រាសបានធ្វើការជាមួយកសិករលើការផ្គត់ផ្គង់ពូជឈើ ផ្កា និងគ្រាប់ ដើម្បីរួមចំណែករក្សាស្ថិរភាពដល់ខ្សែចង្វាក់ផលិតកម្មឲ្យបានគង់វង្ស ចៀសវាងប្រើប្រាស់សារធាតុគីមីនៅលើផលិតផល។
អ្នកស្រីបន្តថា រាល់ផលិតផលដែលមានស្តង់ដារគឺមិនបង្កផលប៉ះពាល់អ្នកផលិត អ្នកប្រើប្រាស់ និងដល់បរិស្ថាន៕
The post អ្នកជំនួញម្នាក់បង្ហើបនីតិវិធី នាំផលិតផលសូត្រខ្មែរទៅលក់នៅក្រៅប្រទេស appeared first on Kampuchea Thmey Daily.
