អភិបាលរាជធានី អំពាវនាវឱ្យកងកម្លាំងពង្រឹងសន្តិសុខសណ្តាប់ធ្នាប់ឱ្យល្អប្រសើរ

លោក ឃួង ស្រេង អភិបាលរាជធានីភ្នំពេញ បានអំពាវនាវឱ្យកងកម្លាំងប្រដាប់អាវុធបន្តពង្រឹងសន្តិសុខសណ្តាប់​ធ្នាប់ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំ២០២៤ នេះឱ្យល្អប្រសើរបន្ថែមទៀត។

ក្នុងឱកាសអញ្ជើញជួបសំណេះសំណាលជាមួយកងកម្លាំងប្រដាប់អាវុធ សមត្ថកិច្ចពាក់ព័ន្ធនៅទីបញ្ជាការស្រាលនៅវាលព្រះមេរុ ដែលជាទីតាំងប្រមូលផ្តុំសមត្ថកិច្ចចម្រុះការពារ នៅថ្ងៃទី ១៤ ខែវិច្ឆិកានេះ លោក ឃួង ស្រេង បានថ្លៃអំណរគុណដល់កងកម្លាំងប្រដាប់អាវុធគ្រប់ប្រភេទ ដែលតែងតែយកចិត្តទុកដាក់ ជុំវិញការរក្សាសុវត្ថិភាពជូនប្រជាពលរដ្ឋទាំងពេលកន្លងទៅ និងក្នុងព្រះរាជពិធីបុណ្យអុំទូក។

ទន្ទឹមនឹងនេះ លោកបានជំរុញឱ្យកងកម្លាំងអស់បន្តពង្រឹងសន្តិសុខឱ្យបានល្អប្រសើរ ដើម្បីឱ្យភ្ញៀវជាតិ និងអន្តរជាតិ ទទួលនូវភាពសប្បាយរីករាយ ក្រោមម្លប់សន្តិភាព ដែលសម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃកម្ពុជា បានយកជីវិតធ្វើជាដើមទុនប្តូរយកសន្តិភាពជូនប្រជាជន។

នាឱកាសនោះដែរ លោក ឃួង ស្រេង បាននាំយកអំណោយរបស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី្ន ផ្តល់ជូនកងកម្លាំង ដើម្បីជាការលើកទឹកចិត្តក្នុងការពង្រឹងសន្តិសុខសណ្តាប់ធ្នាប់។

អំណោយទាំងនោះរួមមាន ឧបត្ថម្ភដល់កម្លាំងការពារក្នុងតំបន់A , តំបន់B និងកម្លាំងជំនាញបច្ចេកទេសចំនួន ១៣ ៧០៧ នាក់ក្នុងម្នាក់៥ម៉ឺនរៀល។ ឧបត្ថម្ភទីបញ្ជាការវាលព្រះមេរុ ៥ លានរៀល ឧបត្ថម្ភទីបញ្ជាការចំណតទូកស្នាក់នៅថវិកា៥លានរៀលឧបត្ថម្ភទីបញ្ជាការស្រាលចំនួន ១៦ទីតាំង ក្នុង១ទីតាំងថវិកាចំនួន ២លានរៀល ទឹកសុទ្ធចំនួន ៤០០០កេស និងភេសជ្ជៈចំនួន ១៣០០ កេស៕
ដោយ៖ ស្រី រ័ត្ន

The post អភិបាលរាជធានី អំពាវនាវឱ្យកងកម្លាំងពង្រឹងសន្តិសុខសណ្តាប់ធ្នាប់ឱ្យល្អប្រសើរ appeared first on Kampuchea Thmey Daily.