វៀតណាម កាត់ទោសប្រហារជីវិត ស្រ្តីជាមេគ្រឿងញៀន និងបក្សពួក២៦នាក់ទៀត

កាលពីថ្ងៃសុក្រទី២៧ខែតុលាឆ្នាំ២០២៤, តុលាការប្រជាជនទីក្រុងហូជីមិញ បានកាត់ទោសប្រហារជីវិតស្រ្តីម្នាក់ជាមេគ្រឿងញៀន និងបក្សពួក២៦នាក់ទៀត។

តាមការចុះផ្សាយរបស់ VN Express, ស្រ្តីជាមេក្រុមមានឈ្មោះ Vu Hoang Oanh ឬគេហៅថា Oanh Ha ហើយក្រៅពីអ្នកដែលត្រូវប្រហារជីវិតទាំង២៧នេះ អ្នកនៅសេសសល់៦នាក់ទៀត ត្រូវជាប់ពន្ធនាគារអស់មួយជីវិត ខណៈ២នាក់ជាប់ពន្ធនាគារម្នាក់២០ឆ្នាំ។

តុលាការរកឃើញថា ក្រុមនេះបានស្តុកទុកនិងជួញដូរថ្នាំញៀន៦២៦គីឡូក្រាម ពីប្រទេសក្រៅចូលវៀតណាម ចន្លោះខែមីនាឆ្នាំ២០១៨ដល់ខែវិច្ឆិកាឆ្នាំ២០២២។

វៀតណាម ស្ថិតក្នុងចំណោមប្រទេសដែលមានច្បាប់គ្រឿងញៀនតឹងរ៉ឹងបំផុតលើពិភពលោក ពោលគឺថា ជនដែលកាន់កាប់ឬរត់ពន្ធហេរ៉ូអ៊ីនលើស ៦០០ក្រាម ឬកូកាអ៊ីនឬមេតំហ្វេតាមីនលើសពី ២.៥គីឡូក្រាម ត្រូវប្រឈមនឹងការកាត់ទោសប្រហារជីវិត។

យ៉ាងណា ចំពោះករណីខាងលើនេះ គឺករណីដែលតុលាការកាត់ទោសប្រហារមនុស្សច្រើនបំផុតមិនធ្លាប់មានសោះក្នុងប្រទេសវៀតណាម នៅរយៈពេលមួយទសវត្សរ៍ចុងក្រោយ៕

អត្ថបទ៖ សុខ សុវណ្ណ

ចុចអាន៖ នេនទុំ ទម្លាយរឿង​ធ្លាប់ញៀនថ្នាំ និងផ្តាំយុវវ័យថា ត្រូវស្គាល់គ្រឿងញៀនឱ្យច្បាស់ កុំសាក ព្រោះមិនស្រួលផ្តាច់ឡើយ

The post វៀតណាម កាត់ទោសប្រហារជីវិត ស្រ្តីជាមេគ្រឿងញៀន និងបក្សពួក២៦នាក់ទៀត appeared first on Kampuchea Thmey Daily.