រញ្ជូយដីដ៏ខ្លាំងក្លា នៅភាគខាងលិច ប្រទេសចិន ជិតភ្នំ Everest បណ្តាលមនុស្សស្លាប់ ៥៣នាក់

បរទេស ៖ ការរញ្ជួយដីដ៏ខ្លាំងមួយបានបណ្តាលឱ្យមនុស្សស្លាប់ យ៉ាងហោចណាស់ ៥៣នាក់នៅទីបេ នៅថ្ងៃអង្គារនេះ និងបានធ្វើឱ្យមនុស្សជាច្រើននាក់ ផ្សេងទៀតជាប់គាំង ខណៈដែលការរញ្ជួយដី ជាច្រើនដងបានអង្រួនតំបន់ខ្ពង់រាប នៃភាគខាងលិចប្រទេសចិន និងឆ្លងកាត់ព្រំដែនក្នុងប្រទេសនេប៉ាល់ ។

យោងតាមសារព័ត៌មាន AP ចេញផ្សាយនៅថ្ងៃទី៧ ខែមករា ឆ្នាំ២០២៥ បានឱ្យដឹងថា វីដេអូនៅលើទូរទស្សន៍រដ្ឋ CCTV បានបង្ហាញពីក្រុមអ្នកជួយសង្គ្រោះ ពាក់អាវពណ៌ទឹកក្រូច ឡើងលើគំនរកម្ទេចកម្ទី នៃផ្ទះនៅក្នុងភូមិដែលរង ការខូចខាតយ៉ាងធ្ងន់ធ្ងរ ខណៈដែលដំថ្មធំៗ ត្រូវបានរុះរើចេញពីអគារ បានរាយប៉ាយតាមដងផ្លូវ និងរថយន្តដែលខូចខាតនៅតំបន់ផ្សេងទៀត។

ប្រព័ន្ធផ្សព្វផ្សាយរដ្ឋបានរាយការណ៍ថា ផ្ទះប្រហែល ១.០០០ខ្នង ត្រូវបានខូចខាត និងមនុស្ស ៦២នាក់បានរងរបួស បន្ថែមពីលើការស្លាប់នេះ ដោយដកស្រង់ពីទីស្នាក់ការកណ្តាលសង្គ្រោះគ្រោះរញ្ជួយដីនៅទីបេ។

ទីភ្នាក់ងារស្ទាបស្ទង់ភូមិសាស្ត្រអាមេរិក បាននិយាយថា ការរញ្ជួយដីមានកម្រិត ៧.១ រ៉ិចទ័រ ហើយមានកម្រិតក្នុងជម្រៅប្រហែល ១០ គីឡូម៉ែត្រ ។ ប្រទេសចិនបានកត់ត្រាថា មានកម្រិតរញ្ជួយ ៦.៨រ៉ិចទ័រ ។

បុគ្គលិកពន្លត់អគ្គីភ័យ និងសង្គ្រោះប្រហែល ១ ៥០០ នាក់ត្រូវបានដាក់ពង្រាយដើម្បីស្វែងរកមនុស្ស ។ CCTV បាននិយាយថា ទាហានពីររយនាក់ក៏បានចូលរួមការស្វែងរកផងដែរ។

មេដឹកនាំចិន លោក ស៊ី ជីនពីង បានអំពាវនាវឱ្យមានការខិតខំប្រឹងប្រែងអស់ពី កម្លាំងកាយចិត្ត ក្នុងការជួយសង្គ្រោះប្រជាជន កាត់បន្ថយចំនួនអ្នកស្លាប់ និងផ្លាស់ប្តូរទីលំនៅថ្មីដល់អ្នកដែលខូចខាតផ្ទះសម្បែង។ ឧបនាយករដ្ឋមន្ត្រី ចិន លោក Zhang Guoqing ក៏ត្រូវបានបញ្ជូនទៅកាន់តំបន់រងគ្រោះ ដើម្បីដឹកនាំការងារ៕